— Što adbyvajecca na «Azoŭstali»?
— Aficyjna Pucin daŭ zahad zavod nie šturmavać. Ale paśla hetaj zajavy ŭžo adbyłasia masiravanaja bambardziroŭka, čaho ja i čakaŭ. Toje, što Pucin skazaŭ, što my nie budziem zajmacca zavodam, nie aznačała, što nie buduć zajmacca.
Heta aznačała, što jon nie choča dadatkova hublać rasijskich sałdat. Padlik byŭ taki, što za kožnaha ŭkrainskaha sałdata jamu pryjdziecca zahubić 6—8 rasijskich. Chutčej za ŭsio, buduć i novyja bambiožki. Kali heta nie daść vyniku, isnuje vialikaja niebiaśpieka, što budzie ŭžytaja chimičnaja zbroja.
Pavodle našych źviestak, infarmacyja, što tam była ŭžytaja fosfarnaja bomba, — niedakazanaja.
Toje, što było skinuta, vyhladała jak vobłaka biełaha dymu, heta vielmi padobna da taho hazu, jaki vykarystoŭvaŭsia FSB dla šturmu teatra ŭ Maskvie. Całkam mahčyma, što heta była sproba abiasškodzić im bajcoŭ pałka «Azoŭ». I pakolki pieršaja sproba była, całkam mahčyma, što druhaja sproba budzie bolš mahutnaj.
— Rasijskaja armija prosta ŭziała ŭ abłohu «Azoŭstal» ci jana ruchajecca na Zachad?
— Ruchu my pakul nie bačyli. Tut cikava pahladzieć analiz Hirkina-Strałkova. Jahony analiz — aptymistyčny dla nas, možna skazać. Jon kaža, što ruch, jaki my ŭbačym ciapier na Danbasie, — jon tolki taktyčny, jon nie moža być stratehičnym. I jon budzie pavolnym — tudy-siudy kožny dzień. A vialikaha zruchu na Zachad nie budzie. Kožny pieražyty dzień pavialičvaje bajazdolnaść ukrainskaj armii i stvaraje dla jaje mahčymaść adkryć druhi front.
Kali Ukraina adkryje druhi front — heta budzie krach rasijskaj stratehii.
— U nas dzieści majačyć 9 maja, kali Rasii chočacca pravieści parad, pažadana ŭ Maryupali. Rasija paśpiavaje da hetaj daty damahčysia chacia b adnoj svajoj zadačy?
— Budzie zroblena ŭsio, kab adna z hetych metaŭ była dasiahnutaja. I heta budzie navat dobra, kali Pucin paličyć, što adnoj z hetych metaŭ jamu da 9 maja budzie dastatkova.
Ale kali adnačasova z hetym pačniecca sacyjalnaja niezadavolenaść, što śmierciaŭ našmat bolš, čym było abiacana, usio bolš svajaki źnikłych čalcoŭ ekipažu krejsiera «Maskva» buduć skardzicca, šukać, što zdaryłasia…
Kali hetaja sacyjalnaja niezadavolenaść budzie zdavacca jamu takoj vialikaj, što častkovaj pieramohi nakštałt Maryupala budzie niedastatkova, to vyrastaje ryzyka, što jon pasprabuje chimičnuju zbroju na Kijevie ci navat jadziernuju zbroju, pra što amierykanskaja vyviedka taksama papiaredžvała.
— Ale ŭ takim vypadku ŭkrainski bok z dapamohaj Zachadu moža pieranieści vajennyja dziejańni na rasijskuju terytoryju?
— Ja sumniavaŭsia, što heta mahčyma. Ale paśla taho, jak i Hirkin skazaŭ, što vielmi vierahodna, što praź miesiac my budziem realna bačyć pieranos dziejańniaŭ z ukrainskaha boku na terytoryju Biełharada i Kurska, to ja liču, što heta ŭžo možna dapuścić.
— Strałkoŭ-Hirkin — heta vajenny złačynca i adna z hałoŭnych asob 2014 hoda, jaho kamandu abvinavačvajuć u źbićci «Boinha» MN-17. Nakolki jamu možna daviarać?
— Kali ja jaho čytaju, ja ŭličvaju jaho žadańnie pomścić Ukrainie, u jaho jość i žadańnie pomścić Pucinu, tamu što jon nie zrabiŭ jaho Hierojem Rasii, a inšych zrabiŭ. My ličymsia z hetym. Ale toje, što ruchaje Hirkinym, heta ŭ pieršuju čarhu, — impierskaje pačućcio. Jamu pryznać, što Ukraina, jakuju jon nienavidzić, jakuju jon piša ŭ dvukośsiach, što Ukraina moža mieć siłu, kab pieranieści vajnu na rasijskuju terytoryju… U sudovym pracesie heta nazyvajecca arhumient, jaki niavyhadny tamu boku, jaki jaho śćviardžaje, i tamu treba jaho pryniać.
Kali navat jon heta kaža, to, chutčej za ŭsio, situacyja takaja drennaja dla rasijskaj stratehii, i treba heta pryniać da viedama.
— Mnohija čytali niadaŭni artykuł ahienctva «Błumbierh», jak Pucin prymaŭ rašeńnie ab uvarvańni va Ukrainu. I, viadoma, cikava, što jon ciapier dumaje — padmanuła jaho najbližejšaje atačeńnie ci što? Što vy z hetaj nahody dumajecie?
— Analityka pakazvaje, što jon nie moža nie bačyć, što toje, što jamu było abiacana jak praktyčna harantavanaje, nie vykananaje. Piataja kałona va Ukrainie prosta źnikła, zhubiłasia tam. Hamieapatyčnaja niejkaja źjaŭlajecca na ŭzroŭni dziesiaci demanstrantaŭ u Mielitopali. A voś tyja, chto musiŭ padaryć uładu Kramlu, jany źnikli. Dla jaho vidavočna, što Piataja słužba FSB, jana całkam jaho padmanuła. Uziaćcie Kijeva dakładna było častkaj pieršaj stratehii, jakaja nie ŭdałasia i ad jakoj admovilisia.
Naziralniki hadajuć, čamu Pucin usiu sustreču ź ministram Šajhu 22 krasavika prasiadzieŭ, ścisnuŭšy pravaj rukoj stalnicu.
Pucin razumieje, što heta źjaŭlajecca vielizarnaj reputacyjnaj strataj i dla jaho samoha. Tamu jamu zastacca ŭ staroj pazicyi i vieryć hetym ludziam — niemahčyma.
Insajd taksama paćviardžaje, što Pucin nikomu nie vieryć, što jon sprabuje sam brać udzieł, razdavać kamandy, i heta paćviardžaje sustreča z Šajhu, dzie Pucin daŭ ukazańni, što rabić, a čaho nie rabić u Maryupali.
Mnie zdajecca, hetaja sustreča nie tolki pakaznaja. Jon ciapier sam sprabuje ŭdzielničać i być hałoŭnakamandujučym. Heta budzie vielmi cikava. Novaja stadyja hetaj vajny, kali Pucin nie vieryć nikomu i sam užo daje zahady.
— Vy skazali, što straty rasijskaha vojska našmat bolšyja, čym čakałasia. Ci mohuć hienierały niejak abjadnacca i praz hałavu Šajhu danieści niezadavolenaść im Pucinu? Ci jość złość i niezadavolenaść u rasijskich vajskovych kołach?
— Davajcie analityčna pahladzim. Što my viedajem? Toje, što samaja jakasnaja, samaja prafiesijnaja častka rasijskaha vojska — a mienavita śpiecnazaŭcy, desantniki z Pskova, inšyja elitnyja desantnyja čaści — była realna stračanaja. Bolšaści hetych ludziej niama.
Heta samaja jakasnaja častka rasijskich vajskoŭcaŭ, jakija, darečy, byli i samymi prafiesijnymi z punktu hledžańnia praviłaŭ viadzieńnia vajny — jany nie hvałtavali. Ale ich źniščyli praź niapravilnuju stratehiju, niapravilnuju infarmacyju. Ci moža hienieralitet nie škadavać tych desantnikaŭ, źniščanych praz drennuju stratehiju, praz drennuju infarmacyju, jakuju FSB im pastaŭlała? Viadoma, heta stvaraje napružańnie.
Druhi ešałon, jaki pajšoŭ za imi, kali jany byli stračanyja, heta byŭ miks sa struktur vahnieraŭcaŭ i piensijanieraŭ, jakija mieli vialiki vopyt, častka ź ich viarnulisia ź Siryi, ź Livii, mnohija ź ich taksama byli stračanyja. Heta stvaraje vialikuju dzirku. Hetyja hienierały taksama atrymlivali kamisijnyja za pracu pryvatnych vojskaŭ u Afrycy i na Blizkim Uschodzie. Ja mahu tak praciahvać dalej. Heta značyć, pryčyny dla niezadavolenaści siarod hienieralitetu jość.
Ale tut pytańnie, što jany taksama mohuć panieści častku viny, bo jany pahadzilisia z hetaj stratehijaj i nie skazali, što ŭziać Kijeŭ nielha, tamu nielha desantnikaŭ našych tudy kidać. Tamu ja dumaju, što ciapier idzie ŭzajemny niedavier, uzajemnyja abvinavačvańni, jany padstaŭlajuć adzin adnaho — chutčej za ŭsio, heta asnoŭny praces, jaki tam idzie.
— Ciapier jość takaja dumka, što vajna — jana źviazanaja z usim tym, što było da hetaha, — razhrom ŚMI, zabarona na apazicyjnuju dziejnaść, sproba zabojstva Navalnaha, jurydyčnaje źniščeńnie Fondu baraćby z karupcyjaj. Hetyja padziei byli padrychtoŭkaj da vajny ci heta padziei, jakija nie źviazanyja adna z adnoj?
— Heta absalutna źviazana. I ja dumaju, što vajna nie była kančatkovaj metaj. Jana była rašeńniem inšaj mety, a mienavita pieratvareńnia Rasii ŭ kazarmu. Heta nie maje słovy, a słovy našaj krynicy ź siłavikoŭ, jakaja hod tamu skazała pra płan da sakavika hetaha hoda pieratvaryć Rasiju ŭ Paŭnočnuju Kareju 2.0 — spres kantralavanaje vojskam hramadstva, bieź interneta, bieź ŚMI. Jon tady papiaredžvaŭ, što lepš vyvieźci žurnalistaŭ.
Całkam mahčyma, što tyja vučeńni, jakija my bačyli hod tamu, jany i byli mahčymym płanam uvarvańnia va Ukrainu jašče tady, ale heta nie atrymlivałasia, tamu što Navalny viarnuŭsia i źjaviłasia zanadta šmat frantoŭ.
Treba było Rashvardyju pasłać na vulicu, aryštavać tysiačy ludziej i nielha było hetuju ž Rashvardyju pasłać va Ukrainu. Tak što mahčyma, što jašče letaś rychtavałasia hetaja vajna, ale palityčnyja padziei jaje adkłali.
Adzinaje pytańnie — vajna była metaj ci srodkam dla Pucina?
— Ci zmoža čałaviek z bekhraŭndam Pucina być dobrym vojenačalnikam?
— Pucin moža skarektavać tyja pamyłki, jakija ŭžo ŭsim vidavočnyja, nu, naprykład, toje, što jon siońnia addaŭ zahad spynić ataku ludźmi, vojskami na «Azoŭstal», — heta i zvyčajnamu čałavieku taksama zdajecca łahičnym. Pieršaje pytańnie: kolki my stracim, kab tysiaču azoŭcaŭ źniščyć? 7—8 tysiač? Nie, tak nielha. Voś takija karektujučyja dziejańni mohuć być pravilnymi.
Ale pabudavać novuju stratehiju zamiest toj, pravalenaj — jon absalutna nie moža hetaha zrabić. Tak što davajcie praz tydzień pahladzim, što budzie, Jakija novyja stratehii źjaviacca. Tamu što čym bolš jon asabista ŭdzielničaje, tym horš budzie dla stratehii.
Čytajcie taksama:
Surazmoŭcy Błumbierha raspaviali, jak Pucin prymaŭ rašeńnie ab uvarvańni va Ukrainu
