Fota: pixabay.com
Prodaž nafty — krynica mahutnaści rasijskaj ekanomiki i, adpaviedna, krynica hrošaj dla vajennaj mašyny Maskvy. Z ulikam hetaha ZŠA, Brytanija, Kanada i Aŭstralija zabaranili ekspart rasijskaj nafty, ale ž Jeŭrasajuzu bolš składana heta zrabić — kraina impartuje z Rasii 27% usioj uvaznoj nafty, piša Wall Street Journal.
Jeŭrapiejskija palityki taksama razhladali mahčymaść uvieści embarha na rasijskuju naftu, ale ž pakul nie pajšli na hety krok. Jany sprabujuć znajści załatuju siaredzinu pamiž nieabchodnaściu izalavać Rasiju i žadańniem nie naškodzić ułasnym ekanomikam praz vysokija ceny na enierharesursy.
Niahledziačy na adsutnaść aficyjnaha embarha, šmat jeŭrapiejskich enierhietyčnych kampanij sami admovilisia ad častki naftavych pahadnieńniaŭ z Rasijaj. U sakaviku ekspart nafty z Rasii źniziŭsia, ale ž u krasaviku Maskva pačała vazić u Jeŭropu bolš nafty. Pa adnych danych, ekspart nafty z rasijskich partoŭ u jeŭrapiejskija vyras z 1,3 miljona baralaŭ u dzień u sakaviku da 1,6 miljona ŭ krasaviku, inšyja krynicy pryvodziać ličby 1 i 1,3 miljona baralaŭ.
Ale ž ciapier zachodnich pakupnikoŭ turbuje mahčymaja ryzyka dla ich reputacyi, źviazanaja z kuplaj nafty ŭ dziaržavy, jakuju Zachad abvinavačvaje ŭ vajennych złačynstvach, i ŭ vyniku naftu z Rasii ŭsio čaściej dastaŭlajuć u tankierach z pamietkaj «punkt pryznačeńnia nieviadomy». U krasaviku takim čynam transpartavali bolš za 11,1 miljona baralaŭ nafty — bolš, čym u lubuju krainu śvietu. Pry hetym da ŭvarvańnia va Ukrainu naftu padobnym čynam amal nie pieravozili.
Navošta heta robiać?
Nafta vielmi patrebnaja jeŭrapiejskim krainam, kab zabiaśpiečyć pracu ekanomiki i spynić dalejšy rost cenaŭ na paliva. Ale ž kampanii chočuć kuplać jaje tajna, kab praduchilić mahčymyja nastupstvy dla siabie praz suviaź z rasijskaja vajennaj mašynaj.
Što da samoj taktyki nie ŭkazvać punkt pryznačeńnia, raniej jana ŭžo dapamahała zabiaśpiečvać ekspart z krain, jakija znachodziacca pad sankcyjami — u pryvatnaści, ź Irana i Vieniesueły. Chutčej za ŭsio, taktyka pracuje nastupnym čynam: u mory rasijskuju naftu pieranosiać na bolš vialikija karabli i vyhružajuć, a potym źmiešvajuć z hruzam novaha sudna, što nie daje mahčymaści vyśvietlić, adkul hetaja nafta.
Tym nie mienš, šmat rasijskaj nafty ŭsio jašče pieravozicca ŭ Jeŭropu z dakładnymi źviestkami pra punkt pryznačeńnia. U krasaviku kolkaść nafty, transpartavanaj z Rasii ŭ Rumyniju, Estoniju, Hrecyju i Bałharyju, vyrasła bolš čym u dva razy ŭ paraŭnańni z sakavikom. Taksama našmat bolš rasijskaj nafty stali ŭvozić u Niderłandy i Finlandyju.
Sprava ŭ tym, što častka pakupnikoŭ baicca mahčymaha ŭviadzieńnia novych abmiežavańniaŭ, tamu i viadzie ciapier aktyŭny handal, inšyja ž sprabujuć vykanać pahadnieńni, zaklučanyja jašče da ŭvarvańnia. Kali źjaviacca novyja sankcyi, heta prymusić pakupnikoŭ razarvać kantrakty.
«Naša Niva» adnaŭlaje zbor danataŭ — padtrymać prosta
Čytajcie taksama:
Viecier i sonca znoŭ zabiaśpiečvajuć bolš za pałovu elektraenierhii ŭ Hiermanii
Tonkaści niamieckaj palityki. Čamu Hiermanija nie admaŭlajecca ad rasijskaha hazu i dazvalaje aŭtaprabiehi pucinistaŭ?
