Jon dakładna apisaŭ, što jaho bili rukami ŭ palčatkach pa korpusie, nahach i hałavie, paśla admovy skazać parol ad smartfona — bolš intensiŭna, paviedamlaje «Viasna».
«Ja patrochu pačaŭ adklučacca. Jany heta zaŭvažyli, pieraviarnuli na śpinu. Adzin adkryŭ mnie rot, ustaviŭ niejki pradmiet nakštałt ałoŭka i ścisnuŭ mnie nos, a druhi pačaŭ zalivać mnie ŭ horła mocnaałkaholnuju vadkaść, mierkavana — harełku.
U peŭny momant ja nie zmoh bolš strymlivać pavietra, staŭ zadychacca i tamu hłytać pavietra razam z harełkaj. Potym pa nieabačlivaści asłabili nos, i ja prymudraŭsia bolš dychać im. Znoŭ pieraviarnuli na žyvot. Stanavilisia nahoj na śpinu.
Zatym adzin z bykoŭ skazaŭ, što «zaje…sia so mnoj voziťsia, kak s Diedkom» (majecca na ŭvazie palitźniavoleny anarchist Mikałaj Dziadok, da jakoha pry zatrymańni taksama prymianialisia katavańni). I pačaŭ nanosić mnie mocnyja chutkija ŭdary ŭ źniešni bok levaha ściahna, u adno i toje ž miesca. Paśla 10-15 udaraŭ ja skazaŭ, što paviedamlu parol».
Taksama Jaŭhien raspavioŭ, što sudmiedekśpiertyza była praviedzienaja amal praz paŭtara miesiaca. Ale navat tady byli zafiksavanyja «ślady na zapiaściach i ščykałatkach ad naručnikaŭ, hiematomy u vobłaści levaha ściahna, levaha kalena, halenastopaŭ, 5-6 rebraŭ, pa levaj nižniaj klučynnaj linii».
Apisvajučy ciapierašnija ŭmovy ŭ SIZA, Jaŭhien adznačaje, što «Vaładarcy daloka da kancłahiera Akreścina». Jon šmat čytaje i navat zastajecca «z naciažkaj viehietaryjancam». Adnak jon kaža, što ŭ SIZA isnujuć peŭnyja prablemy ź miedycynskaj dapamohaj. Rubaška taksama zhadaŭ, što palitźniavolenaha Arcioma Sałaŭja prymusili napisać jaŭku z pavinnaj, pahražajučy seksualnym hvałtam.
Nahadajem, na minułym tydni Jaŭhiena Rubašku asudzili da piaci hadoŭ pazbaŭleńnia voli. Pasiadžeńnie było zakrytym, tamu pra sud amal ničoha nie viadoma.
Padtrymać palitviaźnia paštoŭkami, telehramami, pasyłkami i hrašovymi pieravodami možna pa adrasie: SIZA-1. 220030, h. Minsk, vuł. Vaładarskaha, 2, Jaŭhienu Alaksandraviču Rubašku.
