Jaŭhien Pranovič. Fota: vk.com/fcshakhterby
Usio pačałosia ŭ žniŭni 2020 hoda, paśla sfalsifikavanych prezidenckich vybaraŭ, jakija nibyta vyjhraŭ Alaksandr Łukašenka. Sotni tysiač biełarusaŭ vyjšli pratestavać suprać skradzienych hałasoŭ, ale ž mirnyja demanstranty sutyknulisia z žorstkim hvałtam z boku siłavikoŭ.
Pranovič taksama vykazvaŭ svoj pratest. Jon daŭ intervju, u jakim vykazaŭ, što jon dumaje pra Łukašenku, ale ž Jaŭhien nijak nie čakaŭ taho, što budzie potym, piša onet.pl.
Jak raskazvaje Pranovič, siłaviki skrali jaho z aŭtobusnaha prypynku i advieźli ŭ les. Jon nazyvaje heta zvyčajnym mietadam dziejańnia biełaruskich siłavikoŭ — skraści čałavieka i prynižać jaho. Ad Jaŭhiena patrabavali, kab jon vypuściŭ zajavu, dzie skazaŭ by, što ŭsio, što jon skazaŭ u intervju, niapraŭda, i što nasamreč jon padtrymlivaje Łukašenku. Na jaho kryčali, da jaho hałavy prystavili pistalet, ale Jaŭhien usio roŭna nie vykanaŭ patrabavańni siłavikoŭ, bo «sumlennyja ludzi tak nie robiać».
Voś čym usio skončyłasia: «Ja bajaŭsia za svajo žyćcio, ale admoviŭsia. Narešcie, praz 40 chvilin, jany pakinuli mianie i źjechali adtul. Mnie spatrebiŭsia niejki čas dla taho, kab vyśvietlić, dzie ja, i viarnucca ŭ horad». Ź ciaham času Jaŭhien zrazumieŭ, što rana ci pozna jon moža apynucca praz svaje pohlady ŭ turmie, i pryniaŭ rašeńnie źjechać za miažu.
Stracić pracu praz adnu sumlennuju hulniu
Jon nie sumuje pa toj Biełarusi, u jakoj žyŭ, dzie siłaj prymušajuć padtrymlivać režym Łukašenki, dzie režym źniščaje ŭsich apanientaŭ i kantraluje ŭsie śfiery žyćcia. Siarod takich śfier navat sport, dzie sudździam naŭprost kažuć, za čyju kamandu jany siońnia buduć hulać, i kali jany nie pasłuchajucca, u ich buduć prablemy.
Tak zdaryłasia z arbitram Vitalom Anichimoŭskim, jakoha pryznačyli ŭ vieraśni 2021 hoda sudzić matč 23 tura ŭ pieršaj lizie pamiž «Biełšynaj» i pinskaj «Chvalaj». Za paru dzion da hulni Anichimoŭskamu pazvaniŭ Hieorhij Viarbicki, adzin ź inśpiektaraŭ pieršaj lihi, i naŭprost paviedamiŭ: kiraŭnictva Biełaruskaj fiederacyi futboła choča, kab «Biełšyna» pieramahła i vyjšła ŭ vyšejšuju lihu. Takaja zacikaŭlenaść u babrujskim kłubie była całkam zrazumiełaj: u toj momant «Biełšyna» išła treciaj u tablicy i na dva ački adstavała ad nienavisnych režymu Łukašenki «Krumkačoŭ».
Apošnija ŭsio-tki nie zdoleli vyjści ŭ vyšejšuju lihu, ale Anichimoŭski nie mieŭ da taho dačynieńnia. Jon adkazaŭ Viarbickamu, što jaho takoje nie cikavić, i zrabiŭ paśla toj hulni vysnovu, što jamu niama čaho šukać u Biełarusi. Nasamreč, paśla taho matču Anichimoŭski adpracavaŭ tolki na adnoj hulni, potym na dva miesiacy byŭ adchileny ad pracy, a paźniej pačuŭ ad svajho šefa, što jamu niama miesca ŭ biełaruskim futbole.
Paśla taho, jak Anichimoŭski vyjechaŭ z krainy, jon pakinuŭ u svaim Instagram zaklik da kalehaŭ-arbitraŭ spynić pracu na matčach u znak pratestu suprać vajny va Ukrainie. Ciapier Vital razumieje, što jon nie moža viarnucca u Biełaruś — jak minimum padčas praŭleńnia Łukašenki. Jak jon ličyć, žyćcio ŭ Biełarusi ŭsio ž źmienicca, ale da hetaha pavinien prajści niejki čas — niedzie piać-dziesiać hadoŭ.
Mahčyma, što takija arbitry, jak Jaŭhien Pranovič ci Vital Anichimoŭski, paźniej zdoleli b sudzić matčy ŭ inšych krainach. Prynamsi, Anichimoŭski płanuje z nastupnaha siezona viarnucca da pracy ŭ niejkaj krainie, ale pakul nieviadoma, u jakoj.
«Našu Nivu» finansujuć jaje čytačy — padtrymać prosta
Čytajcie taksama:
Biełaruski futbolny trenier nazvaŭ vajnu va Ukrainie hienacydam i nie zmoh strymać śloz VIDEA
