Telefon Hienadzia Kazakova niedasiažny, u mesendžarach hienierał apošni raz byŭ 24 krasavika. Proźvišča Kazakova źnikła sa staronki «kiraŭnictva» na sajcie kirujučaj kampanii chołdynha «Ahat — Sistemy kiravańnia».
Jon uznačalvaŭ pradpryjemstva z 2017 hoda.
Hienadź Kazakoŭ
«Ahat» — heta adzin z fłahmanaŭ biełaruskaj abaronnaj pramysłovaści. Pradpryjemstva zajmajecca raspracoŭkaj i vyrabam srodkaŭ kiravańnia vojskami, abstalavańniem dla vyviedki, radyjoelektronnaj baraćby, srodkaŭ radyjołakacyi i suviazi. A taksama raspracoŭvaje elektronnyja sistemy, na čym sprabuje zarablać dadatkova. Takaja sabie dziaržaŭnaja IT-kampanija.
Kab zrazumieć značeńnie «Ahata», dastatkova nahadać, što z 2003 da 2005 hoda načalnikam adździeła zamiežnaekanamičnych suviaziaŭ hałaŭnoha pradpryjemstva chołdynha pracavaŭ staršy syn Alaksandra Łukašenki Viktar, i z hetaj pasady jon pierasieŭ u kresła pamočnika prezidenta pa nacyjanalnaj biaśpiecy.
Insajdary nievysoka aceńvajuć vyniki kiravańnia hienierała Kazakova.
Adzin z pravałaŭ «Naša Niva» padrabiazna raśpisvali na pačatku 2020-ha: «Ahat» nie zdoleŭ dać rady prymityŭnamu pa siońniašnich mierkach IT-rašeńniu ŭ napisańni prahramy-katałoha, patraciŭšy na heta 2 miljony rubloŭ i 4 hady.
Čytajcie taksama: Jak patracić 2 miljony dziaržaŭnych rubloŭ, kab ničoha nie było
Tady Kazakoŭ uvajšoŭ u pikiroŭku z Kiraŭcnictvam spraŭ Alaksandra Łukašenki i Viktaram Šejmanam, ale biez nastupstvaŭ dla siabie asabista.
Hučnym pravałam była i historyja z raspracoŭkaj biełaruskich bieśpiłotnikaŭ na dziaržaŭnyja srodki pad dziasiatak miljonaŭ dalaraŭ, dzie zamoŭcam vystupała Minabarony. Mierkavałasia, što budzie niešta kštałtu «Bajraktara», ale raspracoŭku, jakaja atrymałasia, zamoŭca admoviŭsia prymać.
«Nie skazać, kab zusim nie latała, ale bolš čym pałochać varon nie hadziłasia», — skazaŭ «Našaj Nivie» abaznany ŭ hetym pytańni vajskoviec.
U vyniku «Ahat» pravioŭ viekapomnuju dla biełaruskaha dziaržaŭnaha biznesu «kamiercyjalizacyju» praduktu, pradpisanuju va ŭmovach vydzialeńnia finansavańnia: pry prodažy pakistancam savieckich «Bukaŭ» ahataŭskija bieśpiłotniki padniali ŭ pavietra, kab na ich prademanstravać pracazdolnaść zienitna-rakietnych kompleksaŭ. Za źbityja ŭ chodzie demanstracyi bieśpiłotniki z pakistancaŭ uziali hrošy i, takim čynam, «kamiercyjalizavali» niaŭdały pradukt.
Na fonie sankcyj suprać daččynych kampanij i pravalenych prajektaŭ z «Ahatam» pačali admaŭlacca bujnyja zamiežnyja zamoŭcy.
Raniej asnoŭnyja valutnyja pastupleńni dla zavoda davali kantrakty z Kitajem.
«Raniej našym hałoŭnym partnioram byŭ Kitaj, ale ŭžo bolš za hod jany z nami nie pracujuć. I ad Rasii zamovaŭ niama. Dla rabotnikaŭ paadmianiali ŭsie dadatkovyja vypłaty, tradycyjny 13-y zarobak skazali nie čakać, dapamohu da adpačynku admianili, miedstrachoŭku ŭrezali — ciemra», — kaža adzin z rabotnikaŭ.
Hienadź Kazakoŭ naradziŭsia ŭ 1964 hodzie ŭ vioscy Siemukačy Mahiloŭskaha rajona. Skončyŭ Uljanaŭskuju vyšejšuju kamandnuju vučelniu suviazi ŭ Rasii. U 2005-m staŭ načalnikam suviazi Uzbrojenych siłaŭ Biełarusi — načalnikam upraŭleńnia suviazi Hienštaba US RB.
