Devid Bienet i jaho syn. Fota: UNIVERSITY OF MARYLAND SCHOOL OF MEDICINE / AP
57-hadovy Devid Bienet z amierykanskaha štata Merylend pamior u pačatku sakavika, praz dva miesiacy paśla taho, jak jamu pierasadzili śvinoje serca. I niadaŭna stała viadoma, što ŭnutry novaha serca daśledčyki znajšli DNK žyviolnaha virusa. Tym nie mienš, niama śviedčańniaŭ, što śviny cytamiehałavirus — mienavita jaho znajšli ŭ sercy — vyklikaŭ sapraŭdnuju infiekcyju ŭ mužčyny, piša The Times.
Pierasadka orhanaŭ ad žyvioł da ludziej — pierśpiektyŭnaja halina transpłantałohii, ale ž navukoŭcy bajacca, što takija apieracyi pryviaduć da źjaŭleńnia novych infiekcyj. Niekatoryja virusy mohuć prysutničać u arhaniźmie i pry hetym nie vyklikać chvarobu, tamu ich bolš ciažka vyjavić.
Virus u sercy Bieneta jakraz moh być adnym ź ich. Tamu zaraz navukoŭcam patrebnyja lepšyja pa jakaści mietady teściravańnia, kab vyjaŭlać i takija virusy.
Kali Devid Bienet atrymaŭ prapanovu niezvyčajnaj transpłantacyi, jon pamiraŭ ad chvaroby serca, i pierasadka čałaviečaha serca jamu nie padychodziła. Tamu vučonyja pierasadzili mužčynie serca śvińni, a pierad apieracyjaj hienietyčna madyficyravali orhan, kab źnizić ryzyku adarvańnia novaha serca.
Miedyki śćviardžajuć, što śvińnia-donar była zdarovaj, prajšła ŭsie pravierki na infiekcyi i była vyraščanaja ŭ śpiecyjalnym asiarodździ sa źnižanaj vierahodnaściu padchapić infiekcyju.
Paśla pierasadki pacyjent dobra adnaŭlaŭsia, ale ž adnojčy ranicaj u jaho prajavilisia simptomy, padobnyja da prykmiet niejkaj infiekcyi. Daktary praviali šmat testaŭ, kab vyśvietlić, što heta za chvaroba, davali Bienetu antybijotyki i antyvirusnyja preparaty, a taksama leki, što pavinny byli palepšyć jaho imunitet. Tym nie mienš, śvinoje serca apuchła, zapoŭniłasia vadkaściu i ŭ vyniku spyniłasia.
Na siońnia navukoŭcy nie mohuć adkazać, jak virus uździejničaŭ na novaje serca Bieneta, ale ž jany śviedčać, što hetyja simptomy nie padobnyja da zvyčajnaha adarvańnia pierasadžanaha orhana. Miedyki, što pracavali z pacyjentam, kažuć, što jon razumieŭ ryzyku, ale ž pierasadka była jaho apošnim šansam na žyćcio.
Doktar Bartli Hryfit, jaki pravioŭ tuju samuju pierasadku, kaža, što śmierć Bieneta nie śviedčyć pra krach transpłantacyi ad žyvioł, i što takija pierasadki serca ŭsio jašče mohuć być budučyniaj transpłantałohii. Vysnovy, jakija možna zrabić pa vypadku z Devidam Bienetam, u budučyni mohuć dapamahčy zrabić takija apieracyi bolš paśpiachovymi.
«Našu Nivu» finansujuć jaje čytačy — padtrymać prosta
Čytajcie taksama:
Japoniec z šyzafrenijaj zachvareŭ na rak. Jamu pierasadzili kaściavy mozh. Vylečyli i rak, i šyzafreniju
