LeBron Džejms ździŭleny, što jon nie staŭ adnaasobnym pieramožcam u sprečcy samych zamožnych spartsmienaŭ. Fota: mocah.org
Varta adznačyć, što analizu padlahali jak niepasredna kantraktnyja hanarary spartoŭcaŭ, tak i bonusy rekłamnaha kštałtu, a taksama profity ad biznes-prajektaŭ, miedyjnych pravoŭ na ŭłasnaje imia dy manietyzacyi sacyjalnych sietak. U vyniku šort-list ź dziasiatka miljanieraŭ, jakija za hod zarabili sumarna 992 młn dalaraŭ, atrymaŭsia ŭ abodvuch ŚMI amal identyčny. Ale pa šerahu pazicyj — u tym liku lidarskich — zafiksavanyja adroźnieńni.
Dyk chto pieramoh, Miesi ci LeBron?
Hledziačy, jakoj analityčnaj krynicy vy daviarajecie bolš. Forbes stavić na futboł, niahledziačy na toje, što forvard «Pary Sen-Žermen» paśla adjezdu z «Barsiełony» zhubiŭ u kantraktnych hrošach. Adnak sastupka čempijonam Francyi ŭ 22 młn dalaraŭ na rachunku Miesi nie adbiłasia. Arhienciniec kampiensavaŭ straty za košt uhody z Socios — aplikacyi dla zabaŭleńnia fanaŭ, zasnavanaj na błokčejn-technałohii.
Da taho ž menedžary Lea vycisnuli maksimum z suśvietna viadomych vytvorcaŭ kštałtu Pepsi, Budweiser dy Adidas. Plus futbalist staŭ pieršym ambasadaram brendu Hard Rock International sa spartyŭnaj supołki — i za heta atrymaŭ ščodryja bonusy.
Jak vynik, pa mierkavańni Forbes, forvard za siezon zarabiŭ 75 młn dalaraŭ z PSŽ i jašče 55 za košt pa-za futbolnaj aktyŭnaści dy pieramoh u honkach miljanieraŭ, dziakujučy sumie ŭ 130 młn.
A voś Sportico ličyć prybytak arhiencinca mienšym na 8 młn, što vyvodzić u lidary LeBrona Džejmsa. Supierzorka NBA kolki tydniaŭ tamu zaviaršyła vystupy ŭ čempijanacie, bo jaho kłub, «Łos-Andželes Łejkiers», navat u płej-of nie patrapiŭ. Adnak heta nie pieraškodziła 37-hadovamu hulcu ŭzbahacicca na 127 młn dalaraŭ. Prybytak vieteranu zabiaśpiečyła samaja ščodraja ŭ historyi baskietboła ŭhoda z vytvorcam hulniavoha abutku dy kaapieracyja z kryptavalutnaj kampanijaj «Crypto.com».
Adnačasova z vystupami ŭ NBA Džejms nie zabyvaŭsia na zdymki ŭ rekłamie (rolik ź im pakazvali navat padčas Supierboŭłu — samy darahi słot płaniety u kamiercyjnym viaščańni), handal majomaściu, prodaž akcyj i prasoŭvańnie ŭłasnych miedyja-praduktaŭ, filmaŭ dy tok-šoŭ. Zamacavacca ž ŭ lidarach LeBronu dapamahła inviestycyja ŭ startap, jaki stvaraje spartovyja treniroŭki ŭ virtualnaj realnaści.
Ale ž futbalisty ŭ śpisie usio roŭna daminujuć, tak?
A voś i nie! Zrazumieła, u top-10 navat pry samych niespryjalnych abstavinach zastanucca Kryšcijanu Ranałdu dy Nejmar. «Krašy» sacyjalnych sietak kožny dzień hienierujuć trafiku na miljony dalaraŭ. A značycca, deficytu sponsaraŭ tut nie budzie nikoli. Tamu partuhalski pryhažun ciahnie hrošy z Herbalife, Nike dy kampanij, što handlujuć srodkami pa dahladzie cieła. Brazilec ža bolš pahružany ŭ sučasnyja technałohii, tamu ekspłuatuje NFT-markiet dy apracoŭvaje hlebu OTT-płatform kštałtu Netflix. Pry hetym abodva hulcy ŭpeŭniena trymajucca ŭ top-5 śpisu z zarobkam u 115 (KryRo) i 95 (Nej) młn adpaviedna.
Adnak na dziesiać lidaraŭ spartyŭnaha suśvietu futbalistaŭ tolki troje. Tady jak hulcy NBA farmirujuć kvartet miljanieraŭ — LeBrona pieraśledujuć Stef Kary, Kievin Dziurant dy Janis Adetakunba.
I tamu jość łahičnaje tłumačeńnie: akramia supiermaksimalnych kantraktaŭ (piacihadovaje pahadnieńnie hreka, naprykład, abyšłosia «Miłuoki Baks» u 200+ młn dalaraŭ) kožnaja z zorak aktyŭna pracuje z hulcami kryptamarkietaŭ dy NFT-płatformami.
Hetyja rynki ŭ Štatach zaraz dynamična raźvivajucca dy kankurujuć. A tamu hatovyja vydatkavać šalonyja hrošy na prasoŭvańnie pradukcyi z dapamohaj spartsmienaŭ, aŭtarytetnych siarod moładzievaj dy płaciožazdolnaj aŭdytoryj.
A kaho tam u top-10 jašče možna pabačyć?
Cikavaja dynamika i ŭ bolš šyrokim razrezie.
Na sto samych zamožnych spartoŭcaŭ śvietu prychodzicca 36 baskietbalistaŭ, tady jak pradstaŭnikoŭ futboła tolki 13. I heta nie druhaja pazicyja! Miž tymi, chto kidaje miač rukami dy pinaje nahami źmiaścilisia ŭniviersały — prafiesijanały z amierykanskaha futboła, jakich siarod miljanieraŭ ažno 25.
Uznačalvajuć ich Tom Brejdzi dy Mećju Stefard, dachody jakich aceńvajucca dzieści u 70-80 młn dalaraŭ. Składanaść u daskanałym vyznačeńni prybytkaŭ źviazana z varyjatyŭnaściu kantraktnych bonusaŭ. Da taho ž nie zrazumieła, kolki sapraŭdnych uhod zaklučyła pradakšn-kampanija Brejdzi (dzieści abjaŭlałasia tolki pra namier niešta rabić, dzieści nie abviaščalisia finansavyja akaličnaści) dy nakolki surjozna ŭciahvajecca ŭ šerah suprac Stefard — ad stupieni aktyŭnaści zaležać jaho bonusy.
Taksama ŭ topie lohka pabačyć tenisista Rodžera Fiederera dy baksiora-prafiesijanała Kaneła Alvaresa. Apošnija hady zarabić na korcie šviejcarcu zaminali traŭmy. Tym nie mienš jon nie zyšoŭ u «minus», bo mieŭ daŭhaterminovyja i ščodryja kantrakty z premium-sponsarami, Uniqlo dy Rolex. Da taho ž pačaŭ kvitnieć brend spartyŭnaha abutku On, u jaki Rodžer surjozna ŭkłaŭsia jašče ŭ 2019-m. Jak vynik, u minułym siezonie Fiederer pakłaŭ u kišeniu 85,7 młn dalaraŭ.
Što da Alvaresa, to jaho ŭzbahacili nie tolki pieramohi ŭ rynhu minułym traŭniem dy listapadam, a taksama i ščodry hanarar ad «Hennessy». Niebłahoje raźvićcio atrymaŭ i restaranny biznes baksiora, jaki z rodnaj Mieksiki sieciŭna pačaŭ zachoplivać ZŠA. Heta pryniesła Kanieła za hod la 80 młn dalaraŭ.
Nu dobra, a žynčyny ŭ topie jość?
Hiendernaha praryvu nie adbyłosia:
jak i hod tamu, u top-100 prabilisia tolki dźvie tenisistki, Naomi Osaka dy Sierena Uiljams.
Japonka znajšła svajo proźvišča na 20-j pazicyi, adnak mahła i vyšej — traŭmy pieraškodzili pieramoham na turnirach i atrymańniu pryzavych. Adnak tuzin of-kort partnioraŭ dapamoh eks-pieršaj rakietcy śvietu zachavać flor raskošy. Asabliva ŭdałaj nazaviem kaapieracyju z BodyArmor — kampanijaj, jakuju nabyła Coca-Cola ŭ listapadzie. Profit ad hetaj uhody daŭ značny bust rachunkam Osaki, kab jany dasiahnuli miežaŭ 52 młn dalaraŭ.
Uiljams ža pajšła inšaj kamiercyjnaj ściežkaj dy schiliłasia da vienčurnych inviestycyj — navat kampaniju ŭłasnuju zasnavała. Sierena padtrymała bolš za 60 prajektaŭ, što pryviało jaje da zarobku ŭ 35,3 młn za hod i 52-ha radka ŭ rejtynhu.
Hodzie viadomych ludziej — niespadziavanki davaj!
Tut jość dzie razharnucca! Naprykład, u topavuju sotniu zdoleŭ zaskočyć Virat Kali — čałaviek, proźvišča jakoha vy peŭna budziecie huhlić, kali nie cikaviciesia krykietam. Adnak vychadziec z Deli zasłužyŭ svoj abzac słavy, bo zarabiŭ za hod 33,9 młn dalaraŭ.
Niepadalok — na 44-m miescy ŭ adroźnieńni ad indzijskaha 61-ha — źmiaściŭsia Fił Mikielsan.
Halfist kudy mienš viadomy, čym Tajhier Vuds, adnak varty ŭvahi. Bo ŭ 51 hod jon źjaŭlajecca samym uzrostavym fihurantam rejtynhu.
Darečy, na rachunku spartsmiena mahło być bolš, čym 30 młn u hod, adnak jaho kamientary ŭ dačynieńni da zabojstva Džamala Chašohi dy pravoŭ čałavieka, jakija nie pracujuć u Saudaŭskaj Aravii, pryviali da zhuby Mikielsanam šerahu kantraktaŭ.
Adznačym i Trevara Łoŭrensa — jaho prykład śviedčyć pra toje, što navat ŭ 22 hady možna hladzieć na śviet z horda ŭźniataj hałavoj. Hulec «Džeksanvila» maje na rachunku 32,8 młn dalaraŭ, što nie tak užo i błaha dla pačatku ŭzychodžańnia na viaršyniu piramidy.
