Supracoŭnica dziaržaŭnaha vydańnia «SB. Biełaruś siehodnia», jakaja prysutničaje na sudzie, paviedamiła ŭ svaim telehram-kanale, što namieśnica staršyni prakurora Ludmiła Hierasimienka chadajničała ab tym, kab viarnuć Aŭtuchoviča i Hundara na sudovy praces. Fiłataŭ zadavoliŭ chadajnictva.
U sudzie ad ranicy začytvajuć abvinavačvańnie Aŭtuchoviču. Ludmiła Hładkaja publikuje niekatoryja vytrymki:
«Hrupoŭka Aŭtuchoviča pa ŭkazańni ŭkrainskich śpiecsłužbaŭ rychtavałasia zachapić rasijskich vajskoŭcaŭ na terytoryi Biełarusi. Dla katavańniaŭ, pieradačy atrymanych u ich źviestak».
Nahadajem, padziei, u jakich vinavaciać fihurantaŭ, zhodna z pravaachoŭnymi orhanami, adbylisia ŭ kastryčniku 2020 hoda.
Pavodle abvinavačvańnia, Hundar razam z Aŭtuchovičam dapamahaŭ u abjadnańni ich hrupoŭki ź mižnarodnaj złačynnaj arhanizacyjaj. Nibyta abvinavačanyja pa nielehalnym kalidory jeździli va Ukrainu, dzie miascovyja śpiecsłužby pryznačyli Aŭtuchoviča «kiraŭnikom ich jačejki na terytoryi Biełarusi». Usio heta, jak pieradaje Hładkaja, «stvarałasia mienavita dla teraktaŭ i zachopu dziaržaŭnaj ułady niekanstytucyjnym šlacham».
Pavodle abvinavačvańnia, va Ukrainie vosieńniu 2020 hoda pa inicyjatyvie Hałoŭnaha ŭpraŭleńnia raźviedki Minabarony Ukrainy nibyta była stvoranaja ŭzbrojenaja hrupa. Jana pavinna była dapamahčy hrupie Aŭtuchoviča ŭ hvałtoŭnym zachopie ŭłady. Pry hetym adznačajecca, što nie vyklučałasia fizičnaje źniščeńnie Łukašenki. Pa ŭkazańni śpiecsłužbaŭ hrupa Aŭtuchoviča stała «biełaruskaj» jačejkaj mižnarodnaj złačynnaj arhanizacyi, jakoj kiravaŭ Aŭtuchovič.
Abvinavačvańnie śćviardžaje, što Aŭtuchovič rychtavaŭ terakty i źbiraŭ źviestki pra siłavikoŭ pa ŭkazańni ŭkrainskich śpiecsłužbaŭ. Akramia hetaha, hrupa nibyta płanavała zbor danych pra rasijskich vajskoŭcaŭ, kab ich vykraści i atrymać infarmacyju pra zadačy, płany i raźmiaščeńnie rasijskich vojskaŭ u Biełarusi. Hetyja danyja, pa viersii śledstva, Aŭtuchovič pieradavaŭ pradstaŭnikam ukrainskich śpiecsłužbaŭ.
Viadoma, što Aŭtuchoviča i Majoravu abvinavačvajuć u stvareńni i administravańni telehram-kanała «DaVoli!», dzie, pavodle śledstva, publikavałasia «ekstremisckaja» infarmacyja, zakliki da pratestaŭ i da hvałtoŭnaha zachopu ŭłady.
Čytajcie taksama:
Dziaržaŭnyja ŚMI: «Aŭtuchoviča mohuć rasstralać». Ci praŭda heta?
