Mapa bajavych dziejańniaŭ pa stanie na 20 maja. U nastupnyja dni rasijanam udałosia ścisnuć kalco atačeńnia vakoł Lisičanska i Sievieradaniecka. Čyrvonym paznačanyja akupavanyja terytoryi. Krynica: liveuamap.com
Situacyja na ŭschodzie Danbasa dla abaroncaŭ stała vielmi ciažkaj. Za apošni tydzień rasijanie prarvali front i damahlisia surjoznych pośpiechaŭ. Ukraincam, padobna, brakuje sił, i jany zmušanyja adstupać.
Dva tydni tamu rasijanie paciarpieli bujnuju parazu na paŭnočnym fłanzie Danbasa pry sprobie farsiravać raku Sievierski Daniec. Ale na inšych kirunkach spravy ŭ Rasii pajšli lepš.
Spačatku im udałosia prarvać liniju abarony ŭ rajonie Papasnaj i prasunucca dalej u troch kirunkach. Niekatoryja analityki kažuć, što takuju canu daviałosia zapłacić za abaronu Danca, siły byli adciahnutyja tudy. A 25 maja rasijanie vyjšli na darohu Bachmut-Lisičansk, hałoŭnuju arteryju zabieśpiačeńnia ŭkrainskich vojskaŭ u rajonie pramysłovaha Lisičanska i Sievieradaniecka, administratyŭnaha centra Łuhanskaj vobłaści. Pakul abaroncy trymajucca, ale jość šaniec, što im daviadziecca adstupić, kab paźbiehnuć akružeńnia.
Akramia taho, składanaja situacyja i ŭ abaroncaŭ Limana, apošniaha vialikaha horada na poŭnač ad raki Sievierski Daniec. Rasijskaje vojska ŭžo ŭvajšło ŭ horad, a abaroncy adstupili ŭ pryharady i za liniju čyhunki.
Na poŭdni Danbasa rasijanie taksama cisnuć. Im udałosia ŭvajści ŭ pryharad Daniecka Aŭdziejeŭku, ale tut nie adbyłosia takoha maštabnaha praryvu, jak u rajonie Papasnaj.
Na inšych frantach u rajonie Charkava, na Chiersonščynie i ŭ Zaparožžy, usio stabilna.
Vyhladaje, što ruskija majuć pieravahu ŭ bajach na Danbasie. Ekśpierty źviazvajuć heta z tym, što pieradavyja čaści ŭkraincaŭ značna paciarpieli ŭ vyniku praciahłych bajoŭ, a daminavańnie rasijan u pavietry i źniščeńnie paliŭnaj infrastruktury ŭskładniaje pierakidańnie ŭkrainskich umacavańniaŭ. Paśla pravału blickryha rasijanie pavolna i mietadyčna atakujuć siało za siałom i horad za horadam.
Ale Ihar Hirkin, były ministr abarony h. zv. «DNR», śćviardžaje, što va ukraincaŭ usio idzie pa płanie. Pavodle jahonych słovaŭ, jany ŭžo vyrašyli pastupova vyvodzić vojski z uschodniaj častki vystupu ŭ Danbasie i farmiravać mocnuju liniju abarony na linii Bachmut-Sieviersk, u pryharadach Kramatorska i Słavianska, dzie pazicyi va ŭkrainskaha vojska padrychtavanyja.
Heta jašče nie paraza
Choć heta vyhladaje jak katastrofa, ale situacyja nie zusim takaja. Dla Ukrainy ciapier važniej zachavać žyvymi jak maha bolej svaich dobrych vajaroŭ.
Z pačatku vajny jany abaraniajucca hnutka. Čas ad času navat adychodziać z pazicyj biez boju, kab nanieści mocny ŭdar rasijanam u inšym miescy. Ciapier hałoŭnaja zadača — heta nie spynić rasijskaje vojska, jak heta zrabili na poŭnačy Ukrainy, a nanieści jamu najbolš strataŭ i abiaskrović jaho. Heta zrobić dalejšy nastup i prasoŭvańnie ŭhłyb Ukrainy prosta niemahčymym.
Navat kali rasijanie zachopiać bolšuju častku Danbasa, heta nie budzie aznačać ichniuju pieramohu. Rasijskaja prapahanda budzie padavać heta jak vielizarny pośpiech, ale hety pośpiech budzie apłačany vializarnaj kryvioju. Niezrazumieła, jaki sens u takich «pieramohach». Bo ŭ vajnie važna nie toje, jakuju ty akupavaŭ terytoryju, a toje, ci zdolny vorah supraciŭlacca. Va ŭkraincaŭ z hetym niama prablemaŭ.
Mnohija analityki miarkujuć, što Rasija kinuła ŭsie svaje siły na zachop Danbasa i nie maje bolej reziervaŭ. I kali ŭkraincy buduć razumna adstupać i vybudujuć hnutkuju, ale mocnuju liniju abarony, to spyniać nastup. U vyniku rasijanie nie zdolejuć akružyć hrupoŭki ŭkrainskich vojskaŭ na Danbasie, a ŭkraincy nie zhubiać bajazdolnych čaściej.
Zahadka jašče ŭ tym, dzie mienavita Ukraina nazapašvaje svaje vialikija reziervy. Tearetyčna, tyja siły, jakija ciapier akumuluje kraina i jakija nie vajujuć na pieradavoj Danbasa, možna ŭvieści ŭ hulniu ŭ zručny momant.
Ukraincy mohuć marudzić z uvodam ich u stroj, kab spačatku paškumatać rasijan i dobra padrychtavać svaje vojski. Toj fakt, što jany nie kinuli ŭsie siły ŭ Danbas, śviedčyć pra niejki płan i pra toje, što Ukraina pačuvajecca dosyć upeŭniena ŭ biahučaj situacyi.
