Bahdanaŭ raspavioŭ, što tradycyjna ŭ Biełarusi ŭ zimovy čas ceny rastuć. Heta, kaža jon, abumoŭlena peŭnymi faktarami.
«Pieršaje — studzień, heta admiena ŭsich navahodnich źnižak, akcyj. U dačynieńni da śniežnia minułaha hoda zaŭsiody ŭpłyvaje hety faktar, my zaŭsiody jaho ŭličvali. U lutym, naprykład, u adpaviednaści z zakanadaŭstvam, tradycyjna pavyšajucca taryfy na kamunalnyja pasłuhi. U cełym, u zimovy pieryjad rastuć ceny na harodninu, tamu što heta mižsiezońnie.
Vialikija vydatki atrymlivajucca na jaje vyroščvańnie, na zachoŭvańnie. Treba bolš elektryčnaści i hetak dalej. Tamu jana atrymlivajecca daražejšaj, čym u letni pieryjad», — raspavioŭ Alaksiej Bahdanaŭ.
Paśla «tradycyjnaha» rostu adbyŭsia rost niečakany.
«A situacyja ŭ sakaviku, kali ŭ nas byŭ skačok, 6,1% miesiačnaja inflacyja atrymałasia… Viadoma, hety ŭpłyŭ byŭ reakcyjaj u pryncypie suśvietnaj ekanomiki na pačatak śpiecyjalnaj apieracyi [vajny Rasii va Ukrainie]. Užo my bačym, što ŭ krasaviku, dziakujučy namahańniam našaha ŭrada ŭ cełym, i rasijskaha, kali rubiel staŭ i rasijski, i biełaruski ŭmacoŭvacca, my bačym u čatyry razy źnižeńnie inflacyjnych pracesaŭ,
u krasaviku — 1,6%, u mai čakajem inflacyju da 1%. U cełym jana budzie zapavolvacca ŭ letnija miesiacy», — rastłumačyŭ Alaksiej Bahdanaŭ.
Pavodle jaho, urad «napružana pracuje nad hetymi pytańniami», jość antyinflacyjnaja prahrama.
«Dadatkova siońnia jašče zaradžanaja prahrama pa strymlivańni cen, jakaja była raspracavanaja MARH sumiesna z zacikaŭlenymi dziaržorhanami, jana na razhladzie ŭ Saviecie Ministraŭ znachodzicca», — skazaŭ ministr.
