Asudžany za vyrab zbroi i zachoŭvańnie narkotykaŭ Usman Sukujeŭ (źleva) na zonie ličyŭsia «schilnym da členaškodnictva» złosnym parušalnikam. Ledź vyjšaŭšy na volu, jon adpraviŭsia na vajnu
Kožny dziaviaty — sudzimy
Jak padličyŭ kanał «Možiem objaśniť», paraŭnoŭvajučy śpis, apublikavany raźviedkaj Ukrainy (u im 2,5 tys. čałaviek) i pastanovy na sajtach rasijskich sudoŭ,
tolki ŭ sakaviku z 953 dobraachvotnikaŭ z Čačni, jakija adpravilisia vajavać va Ukrainu, minimum 101 akazaŭsia z kryminalnym minułym i sučasnaściu.
Pa danych sajtaŭ sudoŭ, samymi raspaŭsiudžanymi kryminalnymi artykułami, pavodle jakich sudzili hetych bajcoŭ, akazalisia kradziažy i rabavańni, machlarstva, niezakonny abarot narkotykaŭ i zbroi, parušeńnie PDR. Ale sustrakajucca i «ekzatyčnyja» artykuły za seksualnyja znosiny ź niepaŭnaletnimi, niezakonny abarot atrutnych rečyvaŭ abo słužbovyja padrobki.
Pa sudzie — siadzić, u realnaści — vajuje
Mnohija z čačencaŭ-dobraachvotnikaŭ pa zakonie nie mahli jechać vajavać i navat pakidać miesca žycharstva z-za kryminalnych prysudaŭ abo administracyjnaha nahladu.
Naprykład, recydyvist Biekchan Tajsumaŭ, jaki apynuŭsia va Ukrainie, pavodle prysudu Hudermieskaha harsuda Čačni da kanca 2022 hoda pavinien adbyvać termin u kałonii strohaha režymu za machlarstva — raniej kasacyjny sud nie znajšoŭ padstaŭ dla źmiakčeńnia jaho prysudu.
Pieršy svoj prysud za kradziež — dva hady pazbaŭleńnia voli ŭmoŭna — Tajsumaŭ atrymaŭ u 2013 hodzie. Praz hod jon atrymaŭ 3 hady ŭmoŭna za machlarstva pa prysudzie Šaŭkoŭskaha rajsuda Čačni. U 2015 hodzie Šalinski harsud Čačni asudziŭ užo jaho na 4 hady i 6 miesiacaŭ kałonii ahulnaha režymu za niekalki epizodaŭ machlarstva, ale zatym Viarchoŭny sud RF źniziŭ hety termin da 2 hadoŭ i 6 miesiacaŭ.
Viasnoj 2019 hoda Hudermieski harsud Čačni asudziŭ Tajsumava za kiravańnie aŭtamabilem u pjanym vyhladzie na 1 hod pazbaŭleńnia voli ŭmoŭna. Uletku 2019 hoda novy prysud Šaŭkoŭskaha rajsuda za bujnoje machlarstva — 2 hady i 6 miesiacaŭ kałonii strohaha režymu.
U lutym 2020 hoda prysud Hudermieskaha harsuda Čačni za čarhovaje machlarstva — 3 hady kałonii strohaha režymu.
A ŭ śniežni 2020 hoda za jašče adno machlarstva Leninski rajsud Hroznaha asudziŭ Tajsumava da 2 hadoŭ pazbaŭleńnia voli ŭmoŭna. U vyniku pa sukupnaści terminaŭ Tajsumavu dali ŭ 3 hady 6 miesiacaŭ kałonii strohaha režymu i abmiežavańnie voli na 6 miesiacaŭ paśla vyzvaleńnia.
Z ulikam času adbytaha pakarańnia z červienia 2019 hoda termin Tajsumava zakančvaŭsia ŭ kancy 2022-ha. Hetaje rašeńnie taksama paćvierdziŭ letam 2021 hoda i piaty kasacyjny sud, jaki nie znajšoŭ padstaŭ dla źmiakčeńnia prysudu Tajsumavu.
Tym nie mienš sudzimy siem razoŭ za siem hadoŭ Tajsumaŭ znachodzicca nie ŭ kałonii, jak zahadaŭ sud, a na froncie. Na jakim uzroŭni prymalisia rašeńni pa im, zastajecca tolki zdahadvacca.
Umoŭny termin Chusejna Šamsudzinava za kradziež pa prysudzie Šaŭkoŭskaha rajsuda Čačni zakančvajecca ŭ 2024 hodzie, ale i jon apynuŭsia ŭ śpisie tych, chto vajuje va Ukrainie.
A voś nieadnarazova sudzimy Tamierłan Mahamierzujeŭ u sakaviku 2022 hoda pa prysudzie Viadzienskaha rajsuda Čačni atrymaŭ 1 hod prymusovych rabot za niezakonny zbyt mocnadziejnych rečyvaŭ. Mužčyna pavinien byŭ samastojna adpravicca ŭ «Papraŭčy centr №1» Čačni, ale zamiest hetaha adpraviŭsia vajavać va Ukrainu, praihnaravaŭšy rašeńnie suda.
Na pasiadžeńnie pa svajoj čarhovaj spravie ab niezakonnym zachoŭvańni narkotykaŭ u krasaviku 2022 hoda jon užo nie źjaviŭsia ‒ rajsud Kabardzina-Bałkaryi paviedamiŭ, što padsudny schavaŭsia, pasiadžeńnie pryjšłosia admianić.
Adnak pa zakonie Mahamierzujeŭ nie moh pakidać krainu, jaho pavinny byli zatrymać, etapavać i zamianić papraŭčyja raboty na pazbaŭleńnie voli.
Recydyvist Chasan Isajeŭ paśla vyzvaleńnia ŭ 2022 hodzie taksama nie mieŭ prava pakidać miesca žycharstva — da 2030 hoda jon pavinien znachodzicca pad administracyjnym nahladam pa rašeńni Čahiemkaha rajsuda.
«Denacyfikatary» sa śpisu terarystaŭ
Apynulisia ŭ śpisie čačenskich dobraachvotnikaŭ i dvoje datyčnych da teraryzmu.
Pieršy — sudzimy za dva asabliva ciažkija złačynstvy recydyvist Lema Achajeŭ. Padčas źniavoleńnia kiraŭnictva kałonii charaktaryzavała jaho «jak schilnaha da napadu na pradstaŭnikoŭ administracyi i inšych supracoŭnikaŭ pravaachoŭnych orhanaŭ», «lidara i aktyŭnaha ŭdzielnika hrupovak admoŭnaj nakiravanaści» i «asobu, jakaja akazvaje niehatyŭny ŭpłyŭ na inšych asudžanych, jakaja vyvučaje, prapahanduje, vyznaje albo raspaŭsiudžvaje ekstremisckuju ideałohiju».
Druhi — sudzimy za ŭdzieł u masavych biesparadkach Chasan Arsachanaŭ, jaki maje administracyjny nahlad da 2026 hoda.
Jašče piać čałaviek sa śpisu dobraachvotnikaŭ u roznyja hady taksama znachodzilisia ŭ pieraliku pamahatych i sponsaraŭ ekstremizmu i teraryzmu.
Z kałonii — adrazu na front
Bolšaść asudžanych, jakija ŭdzielničajuć u vajnie, chavajuć svaje tvary. Vyklučeńnie — Usman Sukujeŭ, jakoha apaznali na fota žychary Čačni.
U traŭni 2017 hoda Šalinski harsud Čačni asudziŭ Sukujeva na 3 hady i 6 miesiacaŭ pazbaŭleńnia voli ŭmoŭna za niezakonnaje zachoŭvańnie i vyrab zbroi. U kastryčniku taho ž hoda Starapramysłoŭski rajsud Čačni asudziŭ jaho na 1 hod papraŭčych rabot za niezakonny abarot psichaaktyŭnych rečyvaŭ. U krasaviku 2018 hoda rajsud asudziŭ jaho pa artykule ab niezakonnym zachoŭvańni narkotykaŭ na 1 hod pazbaŭleńnia voli. Taksama sud admianiŭ papiarednija ŭmoŭnyja prysudy, i pa sukupnaści Sukajeŭ atrymaŭ 3 hady, 8 miesiacaŭ kałonii-pasialeńnia.
Z-za parušeńnia paradku jaho nieŭzabavie pieraviali ŭ kałoniju ahulnaha režymu. U sakaviku 2021 hoda Naŭrski rajsud Čačni pastanaviŭ vyzvalić Sukujeva pa UDV, niahledziačy na toje, što ŭ kałonii jaho charaktaryzavali jak «złosnaha parušalnika» i «asobu, schilnuju da suicydu i členaškodnictva».
Prakuratura Naŭrskaha rajona apratestavała hetuju pastanovu, i Viarchoŭny sud Čačni adpraviŭ spravu na novy razhlad. U vyniku Sukujeva pavinny byli vyzvalić u studzieni 2022 hoda.
U lutym 2022 hoda kiraŭnictva kałonii źviarnułasia ŭ Naŭrski sud pa spravie ab administracyjnym nahladzie za Sukujevym. Ale ŭ sakaviku 2022 hoda pasiadžeńnie spačatku adkłali pa techničnych pryčynach, a ŭ krasaviku hety isk pakinuli biez razhladu «pa inšych padstavach». Padčas hetych pasiadžeńniaŭ Sukujeŭ užo ŭdzielničaŭ u «śpiecapieracyi».
Ciapier, pa infarmacyi «Možiem objaśniť», umovy naboru ŭ dobraachvotniki źmianili — nibyta źjaviłasia zabarona na najom sudzimych. Ale sotni recydyvistaŭ užo na froncie.
«Hałoŭnaje, što my pravasłaŭnyja, i nam niama čaho dzialić». Znajšli mietadyčku rasijskich vajskoŭcaŭ pra toje, jak havaryć z ukraincami
Pucin admianiŭ vierchniuju ŭzrostavuju miažu dla kantraktnikaŭ
Novy pakiet dapamohi Ukrainie: što mohuć «Harpuny» i «Ekskalibury»
