Na minułym tydni žonka Aleha Marjana trapiła na spatkańnie ź im:
«Na spatkańni Aleh skazaŭ, što, kali ščyra, to jon užo chacieŭ by chutčej pierajechać na «novaje miesca žycharstva» ŭ kałoniju, bo ŭ SIZA jamu ŭžo ciažka — mała ruchu i śviežaha pavietra (sukamierniki kurać). Skazaŭ, što ŭ cełym adčuvaje siabie niadrenna, starajecca hladzieć za zdaroŭjem. Kožnuju ranicu abcirajecca chałodnaj vadoj (inšaj niama ŭvieś hety čas), robić fizičnyja praktykavanni (adciskajecca, prysiadaje i h.d.), chodzić i biehaje pa pierymietrach u dvorykach padčas prahułak».
Pastajanna pravodzić rabotu siarod chłopcaŭ-sukamiernikaŭ, kab kidali kuryć. U vyniku niekatoryja chłopcy stali kuryć radziej udzień, a adzin 18-hadovy chłopiec navat kinuŭ.
Aleh raspaviadaje chłopcam šmat roznych cikavych rečaŭ, asabliva histaryčnych. I hety chłopiec časta padychodziŭ da jaho i kazaŭ: «Dziadźka Aleh, a raskažycie jašče štości cikavaje», albo sam zadavaŭ jamu histaryčnyja pytańni. Aleh kaža, što zaŭsiody i z usimi jon razmaŭlaje tolki pa-biełarusku, i ŭsie ŭžo pryvykli — i sukamierniki, i supracoŭniki SIZA.
Spadziavajusia, što hetak budzie i ŭ kałonii. Ciapier jon musić znachodzicca tam na karancinie 2-3 tydni. Kolki dakładna jon budzie, daviedajemsia paźniej, kali pryjduć pieršyja źviestki z «novaha miesca žycharstva», — raskazała Marjana Hruździłovič «Radyjo Svaboda».
Taksam da žonki praciahvajuć prychodzić listy i malunki žurnalista, jakija jon pasyłaŭ jašče ź SIZA.
Partret žonki, namalavany Aleham Hruździłovičam
***
3 sakavika Hruździłoviča asudzili na 1,5 hoda kałonii pavodle č. 1 art. 342 KK — jon nibyta prymaŭ udzieł u niesankcyjanavanaj akcyi ŭ toj momant, kali jaho pazbavili akredytacyi MZS Biełarusi.
Adras dla padtrymki: PK №15, 213105, h. Mahiloŭ, p/a Viejna, Słaŭharadskaja šaša, 183 (na listach paznačajcie «karancin»).
Usiaho za kratami na hety momant znachodzicca 27 žurnalistaŭ i rabotnikaŭ ŚMI.
