«Heta adrazu achoplivaje bolš za 2/3 impartu nafty z Rasii, skaračajučy vielizarnuju krynicu finansavańnia dla jaje vajennaj mašyny. Maksimalny cisk na Rasiju z metaj spynieńnia vajny», — paviedamiŭ dypłamat.
Akramia taho, uzhodnieny sankcyjny pakiet uklučaje adklučeńnie rasijskaha Śbierbanka ad mižnarodnaj apłatnaj sistemy SWIFT, zabaronu jašče troch rasijskich dziaržaŭnych viaščalnikaŭ i pakarańnie adkaznych za vajennyja złačynstvy va Ukrainie.
Dźvie traciny nafty i naftapraduktaŭ, ad jakich źbirajecca admovicca Jeŭrasajuz — heta taja častka impartu z Rasii, jakaja pastaŭlajecca moram, praz party. Astatniaja tracina idzie pa naftapravodzie, i zabaronie na hety vid impartu mocna piarečyła nadzvyčaj zaležnaja ad jaho Vienhryja na čale ź Viktaram Orbanam, jaki zaŭsiody mieŭ dobryja adnosiny z Uładzimiram Pucinym.
Ale i tut jość mahčymaści da pašyreńnia sankcyj. Kiraŭnica Jeŭrakamisii Ursuła fon der Lajen, jakaja była inicyjataram uviadzieńnia šostaha pakieta, zajaviła ŭviečary ŭ paniadziełak, što Jeŭraźviaz spadziajecca da kanca hoda admovicca ad 90% naftavaha impartu z Rasii.
Samit Jeŭrapiejskaha sajuza, dzie abmiarkoŭvali pytańnie šostaha pakieta sankcyj, jašče praciahvajecca. Dypłamaty jašče pavinny damovicca pra techničnyja detali realizacyi pastanovy, a sankcyi pavinny być aficyjna pryniatyja ŭsimi 27 krainami.
Pa infarmacyi vydańnia Bloomberg, Vienhryja, jakaja błakavała rašeńnie ab embarha, atrymała harantyi ad lidaraŭ ES, što zmoža atrymać zamienu ŭ vypadku admovy ad ekspartu nafty trubapravodami.
Bloomberg, spasyłajučysia na krynicy, taksama piša, što Jeŭrapiejskaja kamisija prapanavała zabaranić ekspart syroj nafty z Rasii na praciahu 6 miesiacaŭ i naftapradukty na praciahu 8 miesiacaŭ. Pastaŭki nafty praz naftapravod «Družba» ŭ Centralnuju Jeŭropu buduć abmiežavanyja, pakul nie budzie znojdziena techničnaje rašeńnie, jakoje zadavolić enierhietyčnyja patreby Vienhryi i inšych krain, jakija nie majuć vychadu da mora.
Čytajcie taksama:
Polski premjer: Treba zrabić tak, kab Vienhryja nie vyjhrała ad impartu rasijskaj nafty
Orban hatovy padtrymać šosty pakiet sankcyj suprać Rasii, kali Vienhryju zabiaśpiečać syravinaj
