U hetym mini-sieryjale jość dva hałoŭnyja piersanažy. Pieršy — heta Kora Sibarn (Kłer Dejns), žančyna, jakaja niadaŭna aŭdavieła. Ciapier jana pačynaje vyvučać pryrodaznaŭstva, pryčym asabliva joj cikavyja marskija źmiei. U volny čas Kora daśleduje ich pa starych knihach, kartach i zdymkach z haziet.
U niejki momant źjaŭlajucca čutki, što vialiki źmiej teraryzuje maleńkuju rybackuju viosku ŭ hrafstvie Eseks, i tady Kora razam z maleńkim synam i siabroŭkaj sadzicca na ciahnik z Łondana, kab pryjechać tudy i pravieści rasśledavańnie. Ale ž na miescy žančyna znachodzić nie pačvaru, a haradok, jaki na vačach varjacieje praz strach. Źnikaje dzicia, i ŭsie pačynajuć vinavacić u hetym mifičnaha źmieja, jaki nibyta napadaje na samych hrešnych z haradžan, piša The Verge.
Adnym ź pieršych ludziej, jakich Kora sustrakaje ŭ haradku, stanovicca miascovy pastar Uił Rensam (Tom Chidłstan). Jon adzin ź niešmatlikich miascovych, chto nie ličyć, što źmiaja źjaŭlajecca drennym znakam ad Boha.
Kali Kora i Uił upieršyniu sustrakajucca, jany ničoha nie viedajuć adzin pra adnaho, ale ž Kora nie ŭ zachapleńni ad novaha znajomaha. Paźniej Uiła pradstaŭlajuć joj naležnym čynam, i tady zdarajecca typovy momant dla ramantyčnych kamiedyj — žančyna ŭśviedamlaje, nibyta pastar, jaki raniej zdavaŭsia joj davoli hrubym, nasamreč źjaŭlajecca davoli miłym čałaviekam.
Łohika suprać viery
Sieryjał raskryvaje jašče adnu temu, i heta — supraćstajańnie navuki i viery. Kora vielmi žadaje znajści łahičnaje tłumačeńnie isnavańniu źmieja, jana tracić šmat času na vykopvańnie akamianiełaściaŭ i kanfliktuje z bolšaściu žycharoŭ haradka, jakija schilajucca da viersii, što źmiejem jany abaviazanyja pomślivamu bostvu.
Jość čałaviek, jaki zatrymaŭsia pasiaredzinie pamiž navukaj i vieraj, i heta Uił. Jon — čałaviek viery, ale ž u toj ža čas nie moža pryniać zvyšnaturalnyja tłumačeńni ŭsiaho, z čym sutykajecca horad. U vyniku pastar šmat sumniavajecca nakont svaich pierakanańniaŭ i taho, nakolki jon moža być karysny supolnaści, jakoj słužyć.
U vyniku možna skazać, «Źmiej u Eseksie» bolš pryśviečany adnosinam miž ludźmi, čym ekzistencyjalnym razvaham, chacia i hetaja tema zastajecca važnaj. Sieryjał zamiaščaje šmat vielmi pryhožych hierojaŭ u zmročnaje miesca, a potym dazvalaje nazirać za tym, jak hetyja ludzi chavajuć pačućci adzin da adnaho.
Ciažki šlub Kory padyšoŭ da kanca, i ciapier jana adčuvaje niešta padobnaje da svabody. Ale ŭ vyniku žančyna zatrymlivajecca pamiž Uiłam (nie tolki pastaram, ale i žanatym baćkam dvuch dziaciej) i Lukam, pryhožym maładym doktaram, jaki akazvajecca adnym z pačynalnikaŭ chirurhii na adkrytym sercy.
Hieroi akazvajucca pa-brytansku zanadta strymanymi, kab skazać uhołas, što jany adčuvajuć. I hetaja baraćba ŭnutry ich nie mienš jaskravaja, čym pošuk mifičnaha źmieja abo raźvićcio technałohii apieracyj na sercy. U vyniku my atrymlivajem sieryjał pra pryhožy chaos, jaki naradžajecca z kanfliktu, i karani ŭ hetaha kanfliktu šmatlikija. Časam heta supraćstajańnie pamiž navukaj i vieraj, časam — pamiž luboŭju i nianaviściu, a časam prosta nastupstva taho, što šmat pryhožych ludziej apynulisia razam u depresiŭnym miastečku.
Ciapier žyvicie z hetym: Disney vypuściŭ praciah «Čypa i Dejła», u im Haječka naradziła 42 muchamyšy
Hrošy, top-madeli i absurdnaść kapitalizmu. Raskazvajem pra šviedski film, jaki pieramoh u Kanach
