Ślady pažaru ŭ RAUS
Jak paviedamili žurnalistam try nie źviazanyja pamiž saboj krynicy, nadzvyčajnaje zdareńnie adbyłosia ŭ aŭtorak.
— Horad abmiarkoŭvaje, vidavočcy raspaviadajuć, što mužčynu vyklikali na dopyt, i jon padpaliŭ siabie i śledčaha. U kabiniecie byŭ pažar, zastalisia ślady na budynku — napisaŭ supracoŭnik adnaho sa škłoŭskich pradpryjemstvaŭ. — Znajomy bačyŭ abpalenyja rečy i kuču raziavak kala RAUS.
Pavodle jaho słoŭ, śledčy atrymaŭ apioki 90% cieła i znachodzicca ŭ rajonnaj balnicy. Supracoŭniki Škłoŭskaj CRB paćvierdzili: tudy pastupiŭ supracoŭnik milicyi 1995 hoda naradžeńnia z apiokami 90% cieła.
— Jon u reanimacyi, a toj, chto ŭčyniŭ padpał, niby jak, pamior, — raspaviali ŭ balnicy.
Pra toje, što mužčyna, jaki ŭčyniŭ padpał, zahinuŭ, kazaŭ i jašče adzin naš surazmoŭca. Pa jaho słovach, toj pranios u budynak bienzin. Bolš pra jaho ničoha nie viadoma.
Pa infarmacyi Zerkalo.io, paciarpiełaha śledčaha zavuć Dźmitryj Chadarenka, jamu 27 hadoŭ. U mai 2018 hoda na sajcie rajonnaj haziety «Udarny front» vychodziła publikacyja ab pracy Škłoŭskaha RAUS, u joj zhadvaŭsia opierupaŭnavažany kryminalnaha vyšuku Dźmitryj Chadarenka. Tady jon raspaviadaŭ, što ŭładkavaŭsia ŭ rajadździeł u žniŭni 2017 hoda, pryjšoŭ paśla instytuta MUS, «možna skazać, ździejśniŭ dziciačuju maru».
Praź piać miesiacaŭ, u kastryčniku 2018-ha, na śviatkavańni jubileju kryminalnaha vyšuku Biełarusi Dźmitryju Chadarenku ŭručyli hramatu UUS Mahiloŭskaha abłvykankama, jon byŭ u zvańni staršaha lejtenanta milicyi. Uvosień 2020-ha taksama atrymaŭ hramatu ad načalnika UUS.
Taksama paviedamlajuć, što ŭ pamiaškańni padčas pažaru moh znachodzicca jašče adzin supracoŭnik milicyi. Jon nie paciarpieŭ.
Śledčy kamitet aficyjna paćvierdziŭ incydent
Paviedamlajecca, što dniom 31 maja ŭ rajadździeł dastavili dla razboru žychara Mahilova, «adbyłosia ŭzharańnie kanfiskavanaj majomaści», u pracoŭnym kabiniecie pačaŭsia pažar. Mužčyna zahinuŭ, supracoŭnik adździeła špitalizavany.
— Pa hetym fakcie śledčym upraŭleńniem USK pa Mahiloŭskaj vobłaści pravodzicca pravierka. Pryčyna zdareńnia vyjaŭlajecca, — havorycca ŭ paviedamleńni.
Paźniej aficyjnyja orhany ŭdakładnili, što ŭ milicyjaniera apioki 76% cieła.
