Hruzija. Rost cenaŭ arendy ŭ 2—3 razy
Pavodle źviestak uładaŭ Hruzii, za pieršy miesiac vajny va Ukrainie ŭ Hruziju pryjechali kala 20 tysiač biełarusaŭ. Heta ŭ dziesiać razoŭ bolš, čym zvyčajna. Biełarusaŭ u kaŭkazskuju krainu pryjechała navat bolš, čym ukraincaŭ (kala 16 tysiač, pavodle aficyjnych ličbaŭ. — RS). Razam z hramadzianami Rasii jany kardynalna pamianiali raskład na rynku arendy nieruchomaści.
Batumi
Biełarus Andrej žyvie ŭ Batumi amal hod. Razam z žonkaj i dziećmi najmaje «jeŭradvušku» ŭ domie pobač z marskim uźbiarežžam. Dom novy, kvatera pamieram 45 kvadrataŭ, abstalavanaja meblaj, na kuchni jość posud. Usio novaje, ale samaje prostaje, ź miascovaha anałaha IKEA. Letam 2021 hoda takoje žyllo kaštavała 450 dalaraŭ u miesiac, ale ŭžo ŭ kastryčniku haspadar źniziŭ košt da 250. Pierahlad rascenak pa siezonach byŭ narmalnaj dla Batumi źjavaj da 2022 hodu. Ciapier usio pamianiałasia.
«Miascovyja kažuć nam, što biełarusy złamali sistemu (arendy žylla ŭ Hruzii. — RS), — raskazvaje Andrej. — Refarmavali rynak. Šmat chto ź biełarusaŭ pryjechaŭ siudy adrazu paśla žniŭnia 2020-ha, my byli daloka nie pieršyja. Tut žyllo letam zvyčajna arandavali na miesiac. Biełarusy pryjechali i rabili heta adrazu na hod. Da minułaha hoda ŭ Batumi nie było nikoli takoha, kab niechta navat na pieršaj linii (u krokavaj dastupnaści da plažaŭ. — RS) u starych damach prasiŭ 300—350 dalaraŭ za miesiac. Samaja vysokaja cana była — 250».
Ciapier taki košt nie prapanujuć navat u addalenych ad mora rajonach. Ź lutaha 2022 hoda realnych cenaŭ na arendu žylla ŭ Batumi nie viedajuć navat haspadary kvater, kaža Andrej. Pryčym jakaść žylla ŭ Hruzii nie najlepšaja. Za 10 miesiacaŭ biełarusu pryjšłosia častkova mianiać u arendnym žylli santechniku i inšaje.
«Vybuch byŭ u siaredzinie sakavika, nas haspadary papiaredzili, što košt arendy vyraście, navat niahledziačy na raniejšyja damoŭlenaści jaho nie pavyšać, — raskazvaje surazmoŭca. — Krasavik i travień užo płacim pa-novamu. A na leta skazali ad 500. Dumaju, treba rychtavacca na 600, i heta budzie jašče dobraja cana. Ceny, viadoma, prapisvajucca ŭ damovach, ale haspadary žylla ich mohuć razryvać. U našym domie žyllo ŭžo zdajecca pa 700 dalaraŭ na miesiac. Na pieršaj linii z dobrym vidam moža być i 1000 dalaraŭ».
Andrej raskazvaje, što vizualna kolkaść biełarusaŭ na vulicach Batumi z kanca lutaha pačała «pavialičvacca ŭ razy». Navat u zusim nieturystyčnym miescy možna lohka pačuć razmovu pra toje, što ciapier adbyvajecca, naprykład, u Maładziečnie.
Pry hetym dyskryminacyi da siabie z boku hruzinaŭ surazmoŭca nie adčuvaje. Kaža, što ŭ sakaviku i krasaviku była jašče niejkaja napružanaść. Naprykład, u banku mahli admovicca mianiać banknotu z paškodžanym krajem. Ale ciapier zbolšaha ŭsio tak, jak było da pačatku vajny.
Ciažej rasiejcam, jakija taksama masava pryjechali ŭ Hruziju. Im časta admaŭlajuć u arendzie žylla i ŭ inšych pasłuhach. Ź biełarusami takija vypadki zdarajucca adzinkava.
Litva. Ceny ŭ siarednim vyraśli z 500 da 700 jeŭra
Za pieršy hod, što prajšoŭ z vybaraŭ žniŭnia 2020 hoda, u Litvu ź Biełarusi tolki pa humanitarnych vizach pierajechali kala 20 tysiač biełarusaŭ. Z pačatkam vajny va Ukrainie situacyja tolki abvastryłasia.
Stary horad u Vilni
U kancy sakavika MZS Litvy paviedamlała, što ŭ ambasadzie ŭ Minsku sabrałasia kala 10 tysiač zajavak na atrymańnie vizaŭ dla pierajezdu.
Usio heta paŭpłyvała na košty arendy žylla ŭ Vilni.
Kali vosieńniu 2020 hoda adnapakajovaja studyja tut kaštavała 450—500 jeŭra ŭ miesiac, to ciapier takoje ž žyllo mohuć zdavać užo navat za 700 jeŭra. Taksama źniziłasia kolkaść prapanoŭ. Kali ŭ studzieni 2022 hoda ŭ Vilni zdavali kala 2500 kvater, to ŭ kancy traŭnia — tolki 400, paviedamlaje partał delfi.lt. Rost koštaŭ na arendu žylla z pačatku sakavika dasiahnuŭ 20—30%.
«Ja šukaju žyllo ŭ Vilni pakul dystancyjna, śpisvajusia z ułaśnikami i ahientami, — raskazvaje Svabodzie biełaruska, jakaja źbirajecca pierajechać u Litvu letam. — Kala pałovy ŭłaśnikaŭ admaŭlajucca zdavać zamiežnikam. Ja nie viedaju, ci heta tamu, što ja biełaruska, ci ź niejkaj inšaj pryčyny. Žyllo šukaju ŭžo miesiac, za hety čas ceny vyraśli na 100—150 jeŭra. Raniej razhladała mahčymaść pierajezdu ŭ Hruziju, ale ceny na kvatery tam ciapier takija samyja, jak u Litvie, tamu praściej pierabracca siudy».
Jak raskazali Svabodzie jašče niekalki čałaviek, jakija ciapier šukajuć varyjanty pierajezdu ź Biełarusi za miažu, vysokija ceny na arendu žylla ŭ Litvie robiać heta prablematyčnym.
Pracadaŭcy sa śfiery IT časta achvotna dapamahajuć ź pierajezdam, ale našmat mienš achvotna iduć na padvyšeńnie zarobkaŭ albo apłatu arendy kvater dla svaich supracoŭnikaŭ. U vyniku tyja, chto nie moža źjechać, zastajucca ŭ Biełarusi biez pracy.
Polšča. «Atrymała čatyry admovy za adzin dzień»
Kolkaść biełarusaŭ, jakija z 2020 hoda pierajechali na stałaje miesca žycharstva ŭ Polšču, nieviadomaja. Prezident Polščy Andžej Duda letam 2021 hoda nazyvaŭ ličbu ŭ 200 tysiač čałaviek. Pry hetym kolkaść humanitarnych vizaŭ, jakija Polšča vydała biełarusam za pieršy hod paśla pratestaŭ, značna nižejšaja — kala 20 tysiač.
Viečarovaja Varšava
Śviežych źviestak pra toje, jak na situacyju paŭpłyvali padziei va Ukrainie, pakul niama. Ale znajści žytło ŭ Varšavie i inšych polskich haradach stała našmat składaniej, čym navat hod tamu. Upłyvajuć na situacyju ŭciekačy z Ukrainy.
«My kvateru ŭ Varšavie pačali šukać u siaredzinie traŭnia, ale za tendencyjami na rynku sačyli jašče sa studzienia, — raskazvaje Volha, jakaja dniami pierajechała ź Biełarusi ŭ Polšču. — Ceny ŭvierch pajšli, viadoma. Ale mnie padajecca, što heta nie niejkaje žadańnie palakaŭ zadrać ich, a prosta ŭmovy rynku, jaki reahuje na situacyju. Kali paraŭnoŭvać sa studzieniem, to kvatery, jakija tady kaštavali kala 3800 złotych (820 jeŭra), ciapier kaštujuć 4500—5000 (980—1100 jeŭra)».
Jak raskazvaje Volha, u Varšavie jana adpačatku šukała trochpakajovuju kvateru, bo płanuje pracavać z domu, maje chatniaha hadavanca. Da biełarusaŭ, jak kaža surazmoŭca, palaki pa-raniejšamu staviacca dobra. Asabliva kali arandatar krychu vałodaje polskaj movaj. Prablemy stvarajuć chutčej umovy, u jakija trapili šukalniki arendnaha žylla. Chutka jaho znajści praktyčna nierealna, kaža Volha.
«My šukali kvateru z ryełtarami, navat z tryma, — raskazvaje surazmoŭca. — Usich nam paraili. Kvatery vielmi chutka sychodziać. Treba adrazu damaŭlacca na prahlad, inačaj ty akazvaješsia dvanaccataj u čarzie. Šancaŭ, što ty chacia b pahladziš kvateru, prosta niama. Ludzi navat prosta pa zvanku najmajuć, nie hledziačy. Treba pryznačać sustreču adrazu z haspadarami. Vyklikać taksoŭku i jechać. Kali nie paśpieješ, kvateru zdaduć. U mianie byŭ dzień, kali ja nie paśpieła takim čynam čatyry razy».
U vyniku Volha źniała kvateru za 5000 złotych u miesiac niedaloka ad centru Varšavy ŭ novym domie. Prykładna takoje ž žyllo bližej da ŭskrainy polskaj stalicy kaštuje kala 3800-4000 złotych u miesiac.
U Minsku ŭ Volhi zastałasia svaja kvatera, zdavać jaje jana nie płanuje.
Biełaruś. «Ceny na arendu žylla ŭpali da ŭzroŭniu 2012 hoda»
Dakładnaja ličba biełarusaŭ, jakija źjechali z krainy paśla vybaraŭ 2020 hoda i z pačatkam vajny Rasii suprać Ukrainy, nieviadomaja. Ale heta ŭžo paŭpłyvała na rynak arendy žylla, pierš za ŭsio ŭ Minsku.
Mikrarajon Novaja Baravaja ŭ Mienskim rajonie. Archiŭnaje fota
«Ceny ciapier na ŭzroŭni dziesiacihadovaj daŭniny, — raskazaŭ u razmovie sa Svabodaj adzin z ryełtaraŭ, jaki dapamahaje znajści arendnaje žyllo ŭ Minsku. — Prapanova ŭvieś čas pavialičvajecca, a popyt, naadvarot, źnižajecca. «Adnuški» navat la mietro ŭžo kaštujuć 150—200 dalaraŭ u miesiac. Takoha nie było z pačatku 2010-ch hadoŭ. Pryčym haspadary hatovyja skidać i takuju canu. Kvatery nie mohuć zdać miesiacami».
Pa słovach surazmoŭcy, popyt ciapier jość najpierš na adnosna tannyja kvatery. Častka ŭłaśnikaŭ, jakija źjechali ź Biełarusi niadaŭna, admaŭlajecca zdavać svaje kvatery pa nizkich cenach. Dla ich praściej praciahvać apłačvać kamunałku z-za miažy, čym puścić niekaha čužoha žyć u svaich kvaterach i mieć z hetaha 200—300 dalaraŭ prybytku.
«Ale nielha skazać, što pryčynaj źnižeńnia cenaŭ stała vajna, — kaža surazmoŭca. — Jany pačali padać jašče ŭ 2020 hodzie i praciahvajuć pavolna apuskacca. U ludziej stała mienš hrošaj, zarobki źmianšajucca. Adsiul i źnižeńnie cenaŭ na arendu. Rezkaha rostu kolkaści prapanovaŭ ja nie baču. Vierahodna, ceny na arendu žylla ŭžo dasiahnuli najnižejšaha ŭzroŭniu. Ciažka prahnazavać, što jany jašče mohuć źnižacca».
Čytajcie taksama:
Ci sapraŭdy tanna žyć u Hruzii? Raskazvajuć biełarusy
Biełarusy staviać rekordy pa kupli nieruchomaści ŭ Polščy
«Haspadar admoviŭsia brać hrošy». Biełarusy, jakija praciahvajuć zdymać kvatery ŭ Kijevie, raspaviali pra svoj dośvied
Źniać kvateru ŭ Minsku ciapier realna ad 100 dalaraŭ. Pahladzieli na samyja tannyja varyjanty arendy ŭ stalicy
