Niedahledžany i nieapracavany ŭčastak

Žadajučym nabyć daču ŭ adlehłaści da 50 km ad MKAD treba być hatovymi, što ceny na niešta bolš-mienš hodnaje pačynajucca z čatyrochznačnych ličbaŭ. 

Ale kali 40-50 km ad stalicy dla vas nie adlehłaść i vy nie baiciesia dobra papracavać rukami, to navat pa cenach da 5000 dalaraŭ možna adšukać niekalki cikavych varyjantaŭ.

Tak, naprykład, za 4000 dalaraŭ pradajecca dača ŭ viescy Łosi Maładziečanskaha rajona, što ŭ 47 kiłamietrach ad MKAD.

Za hetyja hrošy vy atrymajecie 5 sotak ziamli i cahlany domik 1993 hoda pabudovy z ahulnaj płoščaj bolš za 50 m². Pradaviec apisvaje ŭčastak, jak niedahledžany i nieapracavany z častkovaj aharodžaj ź sietki-rabicy. Na ŭčastku majucca pładova-jahadnyja nasadžeńni, haspadarčyja pabudovy, letni duš i tualet.

Sam dom zvonku vyhladaje trochi pryvabniej, čym unutry, ale i košt daleka nie samy vysoki dla dačy, jakaja znachodzicca ŭ 20 kiłamietrach ad Maładziečna i 50 ad Minska.

Šeść sotak i ścipłyja interjery

Inšy bolš-mienš cikavy varyjant u canavym dyjapazonie da 5 tysiač dalaraŭ, pradajecca ŭ Puchavickim rajonie. Tam za 4500 $ addajuć draŭlany domik 1991 hoda pabudovy, jaki mieścicca na zapavietnych šaści sotkach pryvatyzavanaj ziamli.

Interjery ścipłyja, ale prynamsi zakinutaj hetaja dača nie vyhladaje. Siarod pieravah ułaśniki adznačajuć najaŭnaś pobač jahadna-hrybnoha lesu.

Učastak z vychadam u les

Pry pavieličeńni biudžetu bližej da 10 tysiač dalaraŭ vybar leciščaŭ značna pašyrajecca, źjaŭlajucca prapanovy bližej da Minska. Adzinaje, što zastajecca praktyčna niaźmienny, — interjery sadovych domikaŭ. 

Na adlehłaści 45 km ad MKAD pradajecca dača ŭ žyvapisnym miescy pa canie 9800 $. Łakacyja — Maładziečanski rajon, niepadalok ad trasy, jakaja złučaje rajcentr sa stalicaj.

Draŭlany dom ahulnaj płoščaj 48 m² mieścica na ŭčastku pamieram 10 sotak, što značna bolš za standartnyja 6. Jašče adzin plus — vychad z učastka naŭprost u les.

Aproč sadovaha domika, na 10 sotkach jość altanka i haspadarčyja pabudovy. 

Niahledziačy na šerah pieravah, interjer hetaha domika vas naŭradci ŭrazić.

Ułasnaja śvidravina i vada ŭ domie

Pa canie 9900 dalaraŭ pradajecca lecišča ŭ h.p Rudensk Puchavickaha rajona. Ahulnaja płošča doma — 55 m², pamier učastka — 5,5 sotki. 

Pasiarod asnoŭnaha pakoju płoščaj 27 m² staić pieč, z mebli tolki staraja kanapa. U kuchonnym pakojčyku taksama minimalizm, ale pakryćcie na padłozie śviežaje. 

«Adnapaviarchovy ŭciepleny draŭlany dom, ababity sajdynham. Piačnoje aciapleńnie, vada zaviedzienaja u dom, škłopakiety. Učastak kvadratnaj formy. Jeść śvidravina i prybiralnia. Pobač les, u varot sadovaha tavarysta jość prypynak hramadskaha transparta», — havorycca ŭ apisańni.

«15 chvilin — i vy ŭžo na dačy»

Naturalna, što pry pavieličeńni biudžetu da 15 tysiač dalaraŭ vybar stanovicca jašče šyrejšym, ale treba budzie vyznačacca — vam važna najpierš blizkaść da Minska ci jakaść lecišča.

Kali hałoŭny faktar — blizkaść da stalicy, to za 14 tysiač možna prydbać lecišča, jakoje znachodzicca ŭsiaho ŭ 7 kiłamietrach ad MKAD. 

Stolki prosiać za maleńki domik i 4 sotki ziamli. Na ŭčastku raźmiaščajecca sadovy domik ź piačnym aciapleńniem. Jość haraž.

«Dom dahledžany, hatovy da pražyvańnia. Vada siezonnaja», — havorycca ŭ apisańni. 

Rekłamujučy svaju daču, pradaviec abiacaje, što da jaje ź Minska možna dabracca za 15 chvilin. Vidać, jon nie raźličvaje na pakupnikoŭ z vulicy Anharskaja.

Što tyčycca interjera, to jon mała čym adroźnivajecca ad tych dač, što vystaŭleny na prodaž za 4-10 tysiač dalaraŭ.

Akuratny domik z brusa

Za 14 600 dalaraŭ u Maładziečanskim rajonie vystaŭlena na prodaž dača z brusa. Domik z ahulnaj płoščaj u 50 m² maje dva pakoi. Adzin na pieršym paviersie, inšy na druhim.

Ustalavany škłopakiety i stalnyja dźviery. Na ščaście, dom pazbaŭleny niepatrebnaj mebli i inšych pradmietaŭ, jakija časta vyvoziać na daču tolki tamu, što vykidać ich škada.

«Učastak abniesieny płotam ź sietki-rabicy, pasadžanyja pładovyja drevy — ślivy, višni, jabłyni. Pry žadańni na ŭčastku možna raźbić hradki, ustalavać manhalnuju zonu z altankaj. Les u 60 mietrach ad doma», — havorycca ŭ apisańni.

«Miesca dla rełaksu i adpačynku»

Amal u 15 tysiač dalaraŭ aceniena dača ź nievialikim domikam 2015 hoda pabudovy, jaki mieścicca na prastornym ŭčastku pamieram 22 sotki.

Terytoryja ŭčastka dahledžanaja. Aproč hradak, kłumbaŭ i hazonaŭ, tut jość dziciačaja placoŭka.

«Jość pładovyja drevy i chmyźniaki, kvietki, ułasny kałodziež. Pobač les, voziera ŭ 3 km. U 1,5 km pasiołak Śvisłač. Miesca dla rełaksu i adpačynku», — apisvajuć učastak ŭ abjavie.

Dadatkova tut jość haspadarčaja pabudova, u jakoj mieścicca sanvuzieł, duš i letniaja kuchnia. Praviedziena miascovaja kanalizacyja.

Čytajcie taksama: 

 Jak stary dom pierabudavali ŭ barnchaŭs i kolki heta kaštavała

Ź italjanskaj plitkaj, ułasnym SPA-kompleksam i liftam. Kolki kaštujuć i jak vyhladajuć samyja darahija katedžy Minska

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?