Koratka nahadajem pieradhistoryju. Na minułyja vychodnyja adnaho z naviednikaŭ bara, azierbajdžanca Nurłana Safaralijeva, nie puścili ŭnutr. Abstaviny nieviadomyja, ale toj napisaŭ u sacsietkach, što pryčynaj nibyta stała jaho nacyjanalnaść.
Bar imhnienna trapiŭ u niamiłaść łukašystaŭ. Choć za hučnaj nazvaj — zvyčajnaja ŭstanova z papsoj i kaktejlami.
Padrabiaźniej: Azaronak patrabuje začynić minski bar «Kalinoŭski» — nibyta praz nacyjanalny kanflikt. Raskazvajem
Videa ŭčorašniaha rejdu vykłali ŭ adnym z kanałaŭ.
«Bar «Kalinoŭski» — usio. Jon demilitaryzavany i denacyfikavany»,
— kaža na videa Ryhor Azaronak.
«Z kožnym pradprymalnikam, jaki dazvolić sabie dyskredytavać našu dziaržavu, niejkim čynam siehrehiravać klijentaŭ pa palityčnym, sacyjalnym ci kanfiesijnym składniku, budzie mienavita heta», — kamientuje člen Moładzievaha parłamienta Jahor Makarevič.
Na bary visić šylda, što jon zakryty z techničnych pryčyn.
«Heta ŭstanova zakryta nie z techničnych, a z antysiemickich pryčyn, — zajaŭlaje staršynia BRSM Alaksandr Łukjanaŭ, vidać, nie viedajučy značeńnia termina «antysiemityzm». — My raźličvajem na toje, što kiraŭnik paniasie adkaznaść».
«Za antydziaržaŭnuju dziejnaść», — dadaje hołas Ludmiły Hładkaj za kadram.
Jany prapanujuć na miescy «Kalinoŭskaha» adčynić bar u honar 16 žniŭnia 2020 hoda, bo ŭ toj dzień prachodziŭ mitynh u padtrymku Łukašenki. «Baćkaŭ vuhał» — hučyć ideja pa naźvie. Kaniečnie, pra marš pad bčb-ściahami, jaki sabraŭ u toj dzień pa roznych padlikach 200-400 tysiač čałaviek, jany ničoha nie zhadvajuć.
Łukašenkaŭcy paabiacali i dalej pravodzić rejdy pa ŭstanovach, jakija im nie padabajucca.
