«Niekalki faktaraŭ pahražajuć zdolnaści Złučanych Štataŭ zabiaśpiečvać dastatkovuju vytvorčaść elektraenierhii dla zadavalnieńnia čakanaha spažyvieckaha popytu», — adznačyŭ prezident ZŠA.
U pryvatnaści, hetyja faktary ŭklučajuć zboi na enierhietyčnych rynkach, vyklikanyja ŭvarvańniem Rasii va Ukrainu, i ekstremalnyja ŭmovy nadvorja, jakija ŭzmacniajucca klimatyčnymi źmienami, adznačyŭ Bajden.
«Naprykład, u niekatorych častkach krainy zasucha ŭ spałučeńni ź pieryjadami mocnaj śpiakoty adnačasova vyklikajuć prahnazavany deficyt elektraenierhii i rekordny popyt na jaje. U vyniku Fiederalnaja kamisija pa rehulavańni enierhietyki i Paŭnočnaamierykanskaja karparacyja pa nadziejnaści elektrazabieśpiačeńnia papiaredzili pra karotkaterminovyja prablemy z nadziejnaściu elektraenierhii ŭ svaich niadaŭnich letnich acenkach nadziejnaści», — paviedamiŭ prezident ZŠA.
Pavodle jaho słoŭ, navat asobnyja pieraboi ŭ pastaŭkach elektraenierhii mohuć mieć katastrafičnyja nastupstvy dla zdaroŭja i ekanomiki.
«Takim čynam, nadziejnaja sistema elektrazabieśpiačeńnia źjaŭlajecca nie tolki asnoŭnaj patrebaj čałavieka, ale i maje vyrašalnaje značeńnie dla nacyjanalnaj biaśpieki i nacyjanalnaj abarony», — padkreśliŭ Bajden.
Tamu dla zabieśpiačeńnia resursaŭ kamunalnyja pradpryjemstvy i apieratary sietak ZŠA pavinny zahadzia płanavać stvareńnie novych mahutnaściaŭ ŭžo ciapier, kab zadavolić čakany popyt spažyŭcoŭ, dadaŭ prezident ZŠA.
Bajden zajaviŭ, što ZŠA płanujuć pavialičvać vykarystańnie enierhii sonca dla elektrahienieracyi:
«Elektryčnaść, vyrablenaja z dapamohaj soniečnaj enierhii, taksama maje vyrašalnaje značeńnie dla źnižeńnia našaj zaležnaści ad elektryčnaści, vyrablenaj pry spalvańni vykapniovaha paliva, što pryvodzić da źmieny klimatu. Ministerstva abarony pryznała źmianieńnie klimatu pahrozaj dla našaj nacyjanalnaj biaśpieki».
