«Da majoj aplikacyi «Kałabajk» pryviazanaja čužaja kartka»
Da krasavika Źmicier karystaŭsia Mastercard ad Biełahraprambanka, ale potym pierajšoŭ na VISA Technabanka, bo źmianiŭ pracu.
«Ź Biełahraprambankam ja jašče nie paśpieŭ adčuć na sabie prablem, a voś kali ŭžo atrymlivaŭ novuju kartku, mianie papiaredzili, što ŭ internecie jana pracavać nie budzie. I sapraŭdy: niemahčyma apłacić «Kałabajk», «Je-dastaŭku», skarystacca choć jakoj internet-kramaj, u jakoj niama ARIP».
Źmicier vykručvajecca tym, što źviartajecca da karystalnikaŭ kartak inšych bankaŭ — u pryvatnaści Pryjorbanka.
«Da majoj aplikacyi «Kałabajk» akurat pryviazanaja čužaja kartka. Astatniaje ja apłačvaju ci praz ARIP, ci praz bankaŭski terminał. U banku kazali, što papiaredziać, kali niešta źmienicca, ale ciapier ad majoj kartki karyści mała».
Ilustracyjnaje fota
Praź situacyju z vajnoj mužčyna šukaje sabie novuju pracu za miažoj.
«Pakul prapanovy byli tolki z Rasii, ale ja ad ich admaŭlajusia», — kamientuje naš surazmoŭca.
«Usie pierajšli na najaŭnyja»
Jašče adna ŭładalnica kartki Technabanka Julija prosta źviała ŭsie anłajn-płaciažy amal da nula.
«Prablemy pačalisia akurat 24 lutaha. Dźvie maje supracoŭnicy dahetul nie mohuć atrymać hrošy za viartańnie kvitkoŭ u teatr i za turpucioŭku. Z časam rabiłasia tolki horš, banki z mahčymaściu anłajn-apłaty advalvalisia pa čarzie. Na «Aliekspres» pakul prachodziać kartki Biełarusbanka i Biełhazprambanka. Ale hłabalna ŭ maim atačeńni ŭsie pierajšli na najaŭnyja. Navat dla apłaty taksi ŭ prahramie vybirajem prosta hrošy, tamu što i tam kartki nie prachodziać».
Ilustracyjnaje fota
Julija raskazvaje, što mnohija jaje znajomyja aformili sabie rachunki ŭ Pryjorbanku — mienavita dla zamiežnych pieravodaŭ i apłat.
«Pa vyniku, kali kamuści z nas nieabchodna pravieści apłatu anłajn, prosim kaleh z kartkami Pryjorbanka. Naprykład, mnie treba było apłacić strachoŭku aŭto, a znajomaj — dadatkovuju pamiać na Huhł-dysku. Potym viartajem hrošy najaŭnymi ci na inšuju kartku.
Jašče zhadała, što na samym pačatku vajny mužu treba było kupić zapčastku na mašynu. U jaho kartka Biełhazprambanka, i ni jon, ni ja nie zmahli raźličycca anłajn. Prasili dačku, jakaja žyvie ŭ Polščy», — dzielicca składanaściami Julija.
Niahledziačy na ŭsie niazručnaści, žančyna pryznajecca, što adčuvaje złaradnaść:
«Chaj tyja, kaho ŭsio raniej zadavalniała, taksama sutyknucca ź ciažkaściami. My dajšli da takoha žyćcia, pry jakim, čym horš, tym lepš».
«Ježu zamaŭlać pierastali — zaadno i ekanomija»
Maryla apošnim časam źjaŭlajecca klijentkaj Bielinviestbanka plus karystajecca virtualnaj kartkaj ad BPS-Śbierbanka. Dziaŭčyna — sietkavaja piśmieńnica i časam nabyvaje ilustracyi da svaich knih u niekatorych rasijskich supołkach.
«Ja jašče vosieńniu čamuści nie mahła pieravieści ŭ Rasiju hrošy ź Bielinviestbanka — ratavaŭ servis JuMoney, a z sakavika z majoj kartki pakłaści hrošy na JuMoney užo nie atrymlivajecca. Tady ja pajšła ŭ adździaleńnie BPS-Śbierbanka i za try rubli aformiła kartku ŭ rasijskich rublach, heta stała vyrašeńniem prablemy. A voś z padpiskami va UKantakcie tak ničoha i nie atrymałasia: ja nie zmahła praciahnuć ich ni z adnoj svajoj kartki, u tym liku rasijskarublovaj virtualnaj.
Spačatku ja i znajomyja prasili rasijskich siabroŭ płacić za nas niešta na miescy ŭ Rasii, ale ŭsio ž praz trecija ruki vielmi niazručna».
Pierastali pracavać kartki dziaŭčyny ŭ «Jandeks.Taksi»: jana ciapier karystajecca najaŭnymi.
«Kali my zamaŭlali «Jandeks-ježu», była taja ž prablema. Dobra, što ŭ majho maładoha čałavieka jość kartka Pryjorbanka, jakaja prymajecca servisam. Ale ahułam my ježu anłajn zamaŭlać pierastali — zaadno i ekanomija».
«Dasłaŭ rekvizity kartki ŭkraincu, jakomu daviaraju. Ën aformiŭ jaje na svajo imia»
Illa — supracoŭnik IT-kampanii, u śniežni jon rełakavaŭsia va Ukrainu i staŭ žyć niedaloka ad Kijeva. Z pačatkam vajny ŭsie jaho bankaŭskija rachunki ŭ krainie zabłakavali i jon nie moža karystacca imi pa miescy žycharstva. Ale vyjście znajšłosia.
«Ledź nie ŭ kožnaj kramie Ukrainy možna kupić kartku monobank i aformić jaje na inšuju asobu z ukrainskim pašpartam. Ja tak i zrabiŭ: dasłaŭ rekvizity kartki ŭkraincu, jakomu daviaraju. Ën aformiŭ jaje na svajo imia — jurydyčna kartka na im, a fizična ŭ mianie na rukach. Na žal, z našymi pašpartami ci ruskimi tut pakul nielha zavieści rachunak».
Illa karystajecca kartkaj sam, ale ŭ tym liku dapamahaje biełarusam unutry krainy.
«Mianie časam prosiać pieravieści hrošy USU, biežancam, vałanciorskim, zamiežnym dabračynnym fondam ci prosta blizkim, jakija žyvuć va Ukrainie. Ja ŭ svaju čarhu prašu čałavieka, na jakoha maja kartka aformlenaja (jana ŭ mianie na rukach, ale mienavita elektronnaha dostupu ja nie maju) ździejśnić anłajn-płaciož. A biełarusy ŭžo viartajuć mnie hrošy na maju ajčynnuju kartku Pryjorbanka», — tłumačyć schiemu ŭzajemadapamohi Illa.
Ź biełaruskaj kartki jon ažyćciaŭlaje zachavanyja płaciažy, jakija nie patrabujuć dadatkovaha sms-paćvierdžańnia. A MTBank, dzie zastajecca nievialikaja suma, vykarystoŭvaje dla aŭtamatyčnaj apłaty padpiski na «Jandeks.Muzyku» raz na miesiac.
Ilustracyjnaje fota
«Ź virtualnaj kartki płaču za siabie i siabroŭ»
U Macieja, jašče adnaho klijenta Bielinviestbanka, pieršaja prablema z płaciažami ŭźnikła ŭžo pry kancy lutaha: s kartki Mastercard nie ŭznaviłasia padpiska na VK-muzyku. Taksama stała drenna pracavać mabilnaja prahrama «Apłaci».
«Raniej tam była virtualnaja kartka Mastercard, jakoj možna było płacić praz NFC, a ciapier zamiest jaje — BIEŁKART, jakoj nielha. Hetuju novuju kartku rekłamujuć jak tuju, što dazvalaje płacić na Ozon i Wildberries, ale ja tam ničoha nie nabyvaju», — skardzicca chłopiec.
Pakolki asnoŭnyja zamiežnyja apłaty ŭ Macieja abmiažoŭvajucca Rasijaj, to dla abychodu niazručnaściaŭ jon ciapier karystajecca sistemaj QIWI, dzie zarehistravaŭsia jašče paru hod tamu.
«Papaŭniać kašalok možna praz mabilnuju aplikacyju banka «Rašeńnie» (adpraŭlajem biełaruskija rubli, a bank ich pa kursie mianiaje na rasijskija i zaličvaje na kašalok). Jak pačałasia vajna, płaciažy z samoha kašalka nie prachodzili, ale možna było vypuścić virtualnuju kartu QIWI, što ja i zrabiŭ. Ź jaje možna apłacić tavary i pasłuhi ŭ Rasii, uznavić padpisku na muzyku. Z usim hetym ja ŭ tym liku dapamahaju siabram. Heta nie tak zručna, jak było da vajny, dadałosia kłopatu, ale pracuje, dziakuj bohu», — dzielicca naš surazmoŭca.
Maciej upeŭnieny, što vyjście možna znajści zaŭsiody, bo zanadta šmat ludziej choča pieravodzić hrošy praz «žaleznuju zasłonu».
«Kali nas nie adklučać ad suśvietnaj sietki, to možna karystacca kryptavalutami — adnosna zručna i biaśpiečna. Tym bolš, što naša hramadstva ŭ hetym dosyć daśviedčanaje».
Čytajcie taksama:
Častku rasijskich bankaŭ adklučyli ad SWIFT, a Jeŭrasajuz zabaraniŭ pastaŭlać najaŭnyja jeŭra. Jak heta nas zakranie?
Śpiecsłužby, kachanki, zahadkavyja śmierci: detali vialikaj biełaruskaj pahoni za $65 miljonami ad Suśvietnaha banka
