Fota: Instahram
«Ja pačaŭ visieć na turniku intensiŭna z 2007 hoda, kab vyraści, bo byŭ mały i, mahčyma, takim by i zastaŭsia. Miedsiastra ŭ 11 kłasie skazała, što mnie abaviazkova treba pačać visieć na turniku, kab nie zastacca nizkim. Ja prysłuchaŭsia i visieŭ usie hetyja hady, dadaŭ u zale z 2018-ha jašče paru ŭłasnych varyjantaŭ praktykavańniaŭ dla mahčymaha rostu», — padzialiŭsia Apci Ezijeŭ i vykłaŭ videa admysłovaj treniroŭki.
Ci varta paŭtarać ekśpierymient?
Traŭmatołah-artapied Rustam Ajzatulin pastaviŭsia da takoha vielmi skieptyčna. Doktar kaža, što ŭ darosłym uzroście heta niemahčyma. Jon tłumačyć: jość zony rostu, za košt jakich adbyvajecca rost kancavin i chrybta. Ale navat kali takija ŭčastki zastajucca niezakrytyja da 20 hod, paśla 15—18 hadoŭ jany ŭžo nie tak aktyŭnyja.
«Tamu kali my havorym pra padletka 14—16 hod, to tak, u hety pieryjad skoki rostu mohuć być. Kali paźniej — nie, — kaža doktar.
Z 18 da 20 hadoŭ možna vyraści maksimum na paŭsantymietra, dadaje Ajzatulin. Zaniatki sportam taksama ŭ hetaj spravie nijak nie dapamohuć.
«Va ŭsim śviecie tysiačy spartsmienaŭ, jakija zajmajucca i nie rastuć. Navat kali ŭ takim uzroście kałoć harmony, to heta niemahčyma.
Visieńnie na turniku da rostu kancavin nie pryvodzić. Takim čynam možna zrabić chrybiet bolš ełastyčnym, ale heta ŭ budučyni pryviadzie da traŭm. Heta škodna», — papiaredžvaje artapied.
Tearetyčna, kali ŭ čałavieka skalijoz i jon krychu vyraŭniaje śpinu, to tut mahčyma źmiena rostu na 1—2 santymietry. Prosta za košt taho, što voś chrybta stała bolš viertykalnaja. Dyj naohuł vyprastanaja śpina robić čałavieka vizualny vyšejšym.
Rezki rost u darosłym uzroście musić naadvarot naściarožyć — bo jon moža być vyklikany endakrynnymi prablemami.
«Rost vyznačajecca hienietykaj i dobrym charčavańniem u dziacinstvie ŭ pieryjad intensiŭnaha rostu. Zajavy ab tym, što možna vyraści, pavisieŭšy na turniku, miakka kažučy, chitraść, — ličyć i Andrej Tkačoŭ, jaki ŭ minułym pracavaŭ fitnes-trenieram.
— Visieńnie na turniku nie moža paŭpłyvać na hienietyku, a raściahnuć kostki niemahčyma. Možna dabicca karotkačasovaha efiektu na santymietr-paŭtara maksimum z-za dekampresii pazvankoŭ. Ale toj samy efiekt dasiahajecca ŭ śnie. Kali mierać rost ranicaj, adrazu paśla taho jak ustać z łožka, i ŭviečary, to možna zaŭvažyć nievialikuju roźnicu, ale jana nieistotnaja».
Tkačoŭ źviartaje ŭvahu tych, chto dumaje, ci nie paŭtaryć ekśpierymient: visieć na turniku moža być supraćpakazana z-za zališniaj vahi ci parušeńniaŭ aporna-ruchalnaha aparata.
Čytajcie taksama:
Tech neck: što smartfony robiać z našym ciełam?
Palapšajem zdaroŭje kostak: voś što dla hetaha treba jeści
