Na pačatku maja padčas vizitu ŭ Prahu Śviatłana Cichanoŭskaja zajaviła, što kiraŭnik MZS Čechii zapeŭniŭ jaje, što ambasada ŭ Minsku chutka znoŭ budzie vydavać biełarusam vizy. Adnak u vyniku zakon Lex Ukraina byŭ pryniaty takim čynam, što biełarusy ŭsio ž zastalisia praktyčna bieź viz.
— U zakonie było vielmi žorstka prapisana, što nijakich viz biełarusam vydavacca nie budzie. Kali my jechali, my ŭžo viedali, što hety zakon budzie pryniaty, — raskazaŭ Franak Viačorka. — I naša zadača była skarektavać hety zakon, kab tudy ŭnieści jak maha bolš vyklučeńniaŭ. Naprykład, vyklučeńni pa ŭźjadnańni siamji, dla studentaŭ, pa humanitarnych pryčynach, dla aktyvistaŭ, žurnalistaŭ, pravaabaroncaŭ.
Častkova, pa słovach Viačorki, svajho zmahli damahčysia.
«U zakonie ŭžo niama słova «Biełaruś», u im havorycca «trecija krainy». Ale ŭ pastanovie Ministerstva, jakaja ŭdakładniaje zakon, — tam užo napisana «Biełaruś». Taksama zrabili vyklučeńnie [dla vydačy viz] pa ŭźjadnańni siamji i zapuścili śpiecyjalnuju prahramu vydačy viz dla tych, chto vyjazdžaje ŭ Čechiju pa palityčnych pryčynach».
A voś studenckija vizy adstajać pakul nie ŭdałosia.
«Ciapier viadziecca vielmi składany praces pieramovaŭ, my tłumačym, čamu nielha izalavać studentaŭ. Ja dumaju, u najbližejšy miesiac-dva my ŭsio ž taki hetuju prablemu vyrašym», — skazaŭ jon.
Franak Viačorka sa škadavańniem dadaŭ, što ciapier niekatorych zachodnich palitykaŭ stała vielmi ciažka pierakanać u nieabchodnaści sadziejničańnia biełaruskamu hramadstvu. Kali ŭ 2020-m biełarusy byli hierojami i prykładam baraćby za svabodu, to ciapier ich ličać saahresarami ŭ vajnie, i mnohija nie adździalajuć hramadstva ad dziaržavy. Na dumku Viačorki, pieršapačatkovaje rašeńnie ab spynieńni vydačy viz biełarusam u Čechii pryniali pad upłyvam śpiecsłužbaŭ, jakija paśla pačatku vajny vyrašyli, što luby biełarus moža być ahientam i špijonam. Da taho ž, dadaŭ jon, ciapier usie zaniatyja inšymi pytańniami — dapamohaj Ukrainie i ŭkrainskim uciekačam.
