Pa słovach Pinieviča, u Ministerstvie achovy zdaroŭja situacyju z rezanansnaj spravaj traŭmatołahaŭ razhladajuć jak «svaju niedapracoŭku». Ciapier ludzi viartajucca na miescy, pieravažnaja bolšaść praciahvaje pracavać tam, dzie i raniej. Ale ŭžo nie ŭ ranhu zahadčykaŭ adździaleńniami abo hałoŭuračoŭ.
«Čamu im pajšli nasustrač? Heta vysakakłasnyja śpiecyjalisty, jany pracavali rukami i prynosili karyść pacyjentam. Z majho punktu hledžańnia, ich spravakavała pryvatnaja kampanija, jakaja prasoŭvała svoj tavar. Što, viadoma, nie admianiaje kodeksa honaru miedrabotnika. To-bok ja nie apraŭdvaju lekaraŭ, prosta dzialusia mierkavańniem», — skazaŭ Pinievič.
Pavodle jaho, ciapier treba pradumać usio da drobiaziaŭ: stvaryć prazrystuju sistemu ź inšymi hulcami na rynku, u tym liku dziaržaŭnymi.
«Tym bolš traŭmatałahičnuju słužbu ja viedaju dobra. Pacyjenty sapraŭdy nie zaŭsiody addajuć pieravahu ajčynnym materyjałam, tamu my pavinny dać im mahčymaść vybirać, nie vyjazdžajučy za miažu».
Prakamientavaŭ Pinievič i prypynieńnie licenzii «Łade».
«Ludzi, jakija budujuć biznes u miedycynskaj śfiery, pavinny razumieć adno: ad ich zaležyć žyćcio i zdaroŭje pacyjentaŭ. Kantrol byŭ, jość i budzie ŭzrastać — heta nie niešta ŭnikalnaje. My, naprykład, užo prypyniali dazvoł na chirurhičnuju dapamohu ŭ «Nardzinie». Byli pytańni da mnohich stamatałahičnych ustanovaŭ.
U «Łade» byŭ ceły kompleks prablem, pačynajučy ad dakumientaŭ, zakančvajučy parušeńniami sanepidrežymu i ŭmoŭ zachoŭvańnia imunnych bijapreparataŭ», — skazaŭ čynoŭnik.
Pinievič dadaŭ, što ŭ «Łade» było šmat parušeńniaŭ pa balničnych.
«My dazvalajem pryvatnym centram płatna vakcynavać ludziej: zvyš nacyjanalnaha kalendara pryščepak albo inšymi preparatami, jakija nie ŭvachodziać u dziaržzakupku (jak ad hrypu, naprykład). Ale zachoŭvać ich treba pravilna. Taksama my nie suprać, kab jany vydavali balničnyja listy. Raniej było jak: čałaviek z tempieraturaj moh pajści ŭ miedcentr za rekamiendacyjami ad lekara, ale balničny jon usio roŭna atrymlivaŭ u svajoj paliklinicy. Dziakujučy hetaj navacyi, pacyjentaŭ u pryvatnikaŭ stała bolš, i ŭsie jany — płatnyja. Atrymlivajecca, što my dapamahajem, a nie niešta tam zakručvajem.
Ale kali ja ŭbačyŭ u «Łade» kala 90 parušeńniaŭ pa balničnych, heta vyklikała, miakka kažučy, niehatyŭnuju reakcyju.
Pavodle Pinieviča, «prypynieńnie dziejańnia licenzii idzie biznesu tolki na karyść. Niekatoryja znakamityja kampanii mianiali supracoŭnikaŭ pa dva-try razy, a ciapier vykazvajuć padziaku».
Łukašenka: Pryvatnaj miedycyny ja ŭžo najeŭsia
Čamu razam z «Łade» zakryli i drobnuju «Kliniku A1»? Kanflikt pamiž padpałkoŭnikam miedycynskaj słužby i dyrektarkaj
Krynicy: Miedcentr «Łade» vystaŭleny na prodaž
