Fota: asabisty archiŭ

Fota: asabisty archiŭ

Arciomu 33 hady, jon fihurant spravy ab paškodžańni aŭtamabila supracoŭnika departamienta vykanańnia pakarańniaŭ MUS. Mužčynu zatrymali 29 vieraśnia 2020 hoda, abvinavacili pa 339 artykule (chulihanstva, ździejśnienaje hrupaj asobaŭ) i asudzili na dva hady pazbaŭleńnia voli. Etapavali jaho ŭ mahiloŭskuju kałoniju №15. 

Paśla na Arcioma zaviali jašče adnu kryminalnuju spravu pa 411 artykule (złosnaje niepadparadkavańnie patrabavańniam administracyi papraŭčaj ŭstanovy — takija abvinavačańni biespadstaŭna vystaŭlajuć mnohim palitviaźniam). Hetuju spravu pavinny byli zakryć u suviazi z adsutnaściu składu złačynstva. Ale hetaha pakul nie adbyłosia, chacia i była adpaviednaja pastanova prakuratury. 

U vieraśni 2021-ha mužčynu pieraviali ŭ babrujskuju kałoniju №2. I niezadoŭha da zakančeńnia terminu pradjavili novyja abvinavačańni. Ciapier užo pa artykule 369 — publičnaja abraza pradstaŭnika ŭłady ŭ suviazi z vykanańniem im słužbovych abaviazkaŭ.

Jak viadoma «Našaj Nivie», 28 śniežnia 2021 hoda ŭ kvatery Arcioma i jaho žonki ŭ Minsku adbyŭsia pieratrus. Jaho pravodzili supracoŭniki HUBAZ. Jany patłumačyli, što nibyta Arciom u sacyjalnych sietkach niepachvalna vykazaŭsia pra dvuch amapaŭcaŭ. Ale ŭ sacsietkach mužčyna nie zarehistravany. 

Vyśvietliłasia, što zaviali novuju kryminalnuju spravu za «abrazu milicyjanta» ŭ zakrytym telehram-čacie (kamientaryj byŭ pakinuty jašče da pieršaha zatrymańnia). 

U liście blizkim Arciom napisaŭ, što jaho pieravodziać u Mahiloŭ. Chutčej za ŭsio, u turmu №4. 

Pry pieratrusie ŭ kvatery kanfiskavali try telefony. Ich ža zabirali pa raniejšaj spravie pa 339 artykule. Navošta jany spatrebilisia siłavikam znoŭ, nieviadoma. 

Dakumienty, jakija pacviardžali b praviadzieńnie vobšuku, supracoŭniki HUBAZiKa nie pakinuli. 

Raniej Aniščuk zajaŭlaŭ pra katavańni i źbićcio ŭ mahiloŭskaj PK-15. Kab spynić hvałt i cisk, jon na znak pratestu prahłynuŭ mietaličnyja pradmiety.

Paśla prakurorskaj pravierki pa tych faktach mužčynu źbiŭ načalnik kałonii Alaksiej Łazarenka, pisała «Viasna».

U babrujskaj kałonii №2 Arciom taksama byŭ pad ciskam. Admianiali spatkańni, padsadžvali pravakataraŭ, trymali ŭ ŠIZA.

20 červienia ŭ Arcioma dzień naradžeńnia. Pavinšavać i padtrymać mužčynu možna listom: 

Turma №4, 212011, h. Mahiloŭ, vuł. Krupskaj, 99A,

Arciom Iharavič Aniščuk.

Čytajcie taksama: 

Fitnes-treniera Kanstancina Jaršova asudzili da troch hadoŭ chimii

U Minsku zatrymali čarhovaha supracoŭnika IT-kampanii

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?