Uciekačy z Ukrainy. Fota: Homielski abłvykankam
Adna z uciakačak z Maryupala z mužam, dvuma dziećmi i baćkami-piensijanierami ŭ kancy krasavika pryjechała ŭ Žłobin. Žančyna sprabavała ŭładkavacca na BMZ razam z mužam. Jany zrabili ŭsie nieabchodnyja dakumienty dla pryjomu na pracu, ale na zavod ni jaje, ni muža nie ŭziali. Skazali, što tam vialikija prablemy praz sankcyi.
«Stryječnaja siastra ŭ Rastoŭ źjechała z Ukrainy. Jana druhuju zarpłatu ŭžo budzie atrymlivać za hety čas. I my budziem pierajazdžać u Rasiju, bo tut nijak nie ŭładkavalisia»,
— dzialiłasia žančyna, u jakoj za hety čas stali zakančvacca źbieražeńni.
Heta nie adzinkavy vypadak, kaža vałanciorka, jakaja dapamahaje ŭkrainskim biežancam u Biełarusi. Uładkavacca na pracu ŭkraincam u nas ciapier ciažka. Sami pracadaŭcy ŭ hetym nie zacikaŭlenyja: kab uładkavać zamiežnaha hramadzianina, im treba rabić lišnija ruchi. I miascovyja orhany časta nie tłumačać najmalnikam, jak dziejničać, i nie viedajuć, što prapanavać ludziam, jakija biehli ad vajny.
«Ludzi chodziać u pryvatnyja kampanii padzarablać. Ale heta tolki niekalki razoŭ na tydzień pa 30 rubloŭ.
Ź dziaržaŭnymi ŭstanovami ciažka, bo prosiać dypłomy. A kali jon jość, to admaŭlajuć, kali čałaviek pa hetaj śpiecyjalnaści nie pracavaŭ, naprykład. A brać na inšuju pasadu biez dypłoma nie chočuć, — apisvaje prablemu vałanciorka. —
Adna žančyna-biežanka raskazvała, jak jaje suajčyńniki pryjechali z Polščy ŭ Biełaruś i skazali, što ciapier usie im pavinny. A jana adkazała im, što vy abłamalisia, heta nie Jeŭropa, tut nichto nikomu nie pavinien.
Da nas pryjechała maci z tryma dziećmi, jana va Ukrainie była paśpiachovym jurystam. Jak jana pojdzie pracavać dajarkaj za 300 rubloŭ? Tut, viadoma, jaje kvalifikacyja nijak nie kacirujecca».
Vałanciorka raskazvaje, što spačatku ludziej sialili ŭ sanatoryi, płacili za ježu dla ich, pieradavali humanitarnuju dapamohu. Zajmaŭsia hetym pieravažna Čyrvony Kryž. Ciapier ža dapamahajuć prosta nieabyjakavyja hramadzianie.
Varta dadać, što ŭ niekatorych inšych krainach dapamoha ŭciekačam taksama častkova ŭrazajecca. Tak, u Bałharyi z červienia spynili prahramu, pa jakoj ukrainskija ŭciekačy mahli žyć u hatelach na kurortach, praz nabližeńnie turystyčnaha siezona. U Polščy z nastupnaha miesiaca źbirajucca spynić vypłaty na pražyvańnie i charčavańnie.
Niekatoryja z ukrainskich uciekačoŭ źjazdžajuć ź Biełarusi ŭ Rasiju, bo tam abiacajuć bolš dapamohi ad uładaŭ.
«Matyŭ ludziej, jakija tudy jeduć, — instynkt samazachavańnia, — tłumačyć vałanciorka. — Ludzi prosta dumajuć, jak vyratavacca. Pieršapačatkova dla niekatorych adziny šaniec vyžyć byŭ — pryjechać u Biełaruś».
U 2014 hodzie byŭ pryniaty ŭkaz Łukašenki №420, pa jakim najmalniki, jakija pryciahvajuć hramadzian Ukrainy dla ažyćciaŭleńnia pracoŭnaj dziejnaści, vyzvalajucca ad vypłaty dziaržaŭnaj pošliny za vydaču śpiecyjalnych dazvołaŭ na rabotu. Ale heta tyčycca tolki hramadzian, jakija pražyvali na terytoryi Danieckaj i Łuhanskaj abłaściej.
Dla ŭciekačoŭ z Maryupala (a na Homielščynie takich šmat), Kijeva ci Čarnihava norma nie dziejničaje.
Na pramoj telefonnaj linii namieśnik staršyni Homielskaha harvykankama Siarhiej Andrejeŭ, da jakoha my źviarnulisia z pytańniem pra pracaŭładkavańnie biežancaŭ, pryznaŭ prablemu: ciapier rehijonu patrebnyja najpierš vuzkija śpiecyjalisty, a na vakansii biez vopytu i dypłoma svaich achvotnych chapaje.
«Śpiecyjalisty z dypłomam patrebnyja na pradpryjemstvy ŭ Homieli, naprykład na «Homielškło». Viedaju navat, što tam niekalki čałaviek z Ukrainy pracujuć. Patrebnyja vuzkija śpiecyjalisty: tokary, frezieroŭščyki, inžyniery. Mnie zdajecca, što tut samo pradpryjemstva za takoha čałavieka ŭchopicca i dapamoža jamu z dakumientami.
Kali prosta, naprykład, prybiralščykam, to tut svaich chapaje, treba ŭładkoŭvać», — prakamientavaŭ jon.
«Kali čałaviek — juryst, to ŭ nas znajści chutka jamu vakansiju nie atrymajecca. Jany jość, ale dobra apłatnuju padabrać dastatkova składana», — dadaŭ čynoŭnik.
Siarhiej Andrejeŭ tłumačyŭ, što ŭsio nie tak prosta praź biurakratyčnyja momanty
«Pa zakanadaŭstvie centr zaniataści pracuje tolki z žycharami horada Homiela. Kali navat, naprykład, pryjedzie čałaviek z Rečycy, my nie majem prava pastavić jamu status biespracoŭnaha, niejkija vypłaty rabić. Jon musić hetym zajmacca pa miescy rehistracyi.
Uličvajučy biahučuju situacyju, pytańnie ab nadańni hramadzianam Ukrainy pracy my padymiem», — adkazaŭ čynoŭnik.
Čytajcie taksama:
«Nu, zaklikali, dobra. Dalej što?» Padalak raskrytykavaŭ dziejnaść Cichanoŭskaj. Matolka jamu adkazaŭ
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
