«Vyjšła važnaja statystyka Biełstata pa dynamicy VUP (vałavy ŭnutrany pradukt) i cenaŭ za travień i krasavik, — piša Alachnovič. —
Danyja pakazvajuć ustojlivuju tendencyju na skaračeńnie vypusku ŭ Biełarusi: z +2,7% u studzieni da -8,6% u traŭni.
Strata ŭ dynamicy składaje 11,3 pracentnaha punkta za 5 miesiacaŭ. Heta vielmi imklivaje padzieńnie vytvorčaści — i heta, mabyć, jašče nie dno.
Aleś Alachnovič
Raniej naša ekanamičnaja kamanda prahnazavała spad ekspartu na 40%. Indeks fizičnych abjomaŭ ekspartu paćviardžaje raniejšyja prahnozy. U suviazi sa źnižeńniem ekspartu ŭ krainy, jakija ŭviali sankcyi, strataj rynku Ukrainy i recesijaj u RF u krasaviku 2022-ha fizičny abjom ekspartu skaraciŭsia na 42,5% u paraŭnańni z krasavikom 2021-ha. Chacia ŭ studzieni 2022 hoda jaho padzieńnie składała tolki 1%.
Radykalnaha padzieńnia vartaści ekspartu pakul nie bačna vyklučna za košt vysokich cen. Siarednija ceny ekspartu ź Biełarusi vyraśli ŭ krasaviku na 35%.
U krasaviku Biełaruś praktyčna pierastała ekspartavać svaje tavary nie tolki va Ukrainu, ale i ŭ Vialikabrytaniju, a ekspart u ZŠA i ES skaraciŭsia na 74% i 38% adpaviedna. Rost ekspartu ŭ RF nie dazvoliŭ kampiensavać padzieńnie ekspartu ŭ inšyja krainy.
Takim čynam — try vysnovy:
— VUP Biełarusi imkliva skaračajecca. Pry hetym padzieńnie vypusku pradukcyi jašče navat nie dasiahnuła dna.
— Sankcyi pracujuć. U krasaviku 2022-ha fizičny abjom ekspartu skaraciŭsia na 42,5% u paraŭnańni z krasavikom 2021 h.
— Niahledziačy na šmatlikija zajavy, biełaruski režym nie zdoleŭ pieranakiravać patoki ekspartu z krain Zachadu i Ukrainy na RF».
