Vidavočna, što Uładzimir Pucin — vielmi bahaty čałaviek. Žurnalisty ŭžo znachodzili vializny pałac na bierazie Čornaha mora, prylehłyja da jaho vinahradniki, łyžny kurort i viłu na poŭnačy Leninhradskaj vobłaści. Adnak dakumientalna paćvierdzić, što ŭsio heta naležyć mienavita Pucinu, nie ŭdavałasia.
I paśla kožnaha hučnaha rasśledavańnia chtości sa starych siabroŭ prezidenta Rasii zajaŭlaŭ, što nieruchomaściu nibyta vałodaje mienavita jon. Naprykład, pałacam u Hielendžyku — partnior Pucina pa dziudo Arkadź Ratenbierh, a viłaj u Leninhradskaj vobłaści — Siarhiej Rudnoŭ, syn jašče adnaho tavaryša Pucina.
Žurnalisty znajšli ahulnaje va ŭsich hetych aktyvaŭ — kampanii, na jakija jany zapisanyja (uklučajučy znakamity pałac), vykarystoŭvajuć ahulnuju IT-infrastrukturu.
Vyvučyŭšy adrasy na damienie llcinvest.ru, «Mieduza» i OCCRP znajšli dziasiatki kampanij, čyje supracoŭniki i ŭładalniki vykarystoŭvajuć takija paštovyja skryni.
Uładalnik damiena llcinvest.ru — kampanija «Maskamsuviaź», ciesna źviazanaja z bankam «Rasija». Z uciečki mietadanych klijentaŭ «Maskamsuviazi», da jakoj atrymali dostup žurnalisty «Mieduzy» i OCCRP, vynikaje, što z dapamohaj pošty na hetym damienie rehularna kamunikavali kiraŭniki, uładalniki i supracoŭniki vonkava nijak nie źviazanych pamiž saboj kampanij.
U «Maskamsuviazi» na zapyt žurnalista, jaki pradstaviŭsia patencyjnym klijentam, adkazali, što z pryvatnymi asobami nie pracujuć.
Usiaho rasśledavalnikam udałosia znajści 86 kampanij, jakija vykarystoŭvajuć elektronnuju poštu na llcinvest.ru.
Ahulny košt aktyvaŭ, jakimi jany vałodajuć, — kala 4,5 miljarda dołaraŭ (suma aktyvaŭ usich kampanij z apošnich dastupnych štohadovych spravazdač, jakija udałosia znajści). Heta asabniaki, samaloty biznes-kłasa, jachty i prosta bankaŭskija rachunki ź vializnymi sumami hrošaj.
U mnohich kampanij adny i tyja ž dyrektary, jurydyčnyja adrasy i aŭdytary.
Niekatorymi napramuju vałodaje bank «Rasija». Dziasiatki zapisanyja na akcyjanieraŭ «Rasii», u tym liku siabra Pucina, miljardera Juryja Kavalčuka i «siabroŭku Pucina», jak pra jaje pišuć u niezaležnaj presie, Śviatłanu Kryvanohich (vydańnie «Prajekt» adznačała, što dačka Kryvanohich, jakaja naradziłasia ŭ 2003 hodzie, «fienamienalna padobnaja na prezidenta RF»).
Jašče 18 kampanij na pieršy pohlad nie majuć nijakaha dačynieńnia da banka, ale, jak vyśvietlili «Mieduza» i OCCRP, zapisanyja na jaho šarahovych supracoŭnikaŭ.
«Adzinaje tłumačeńnie, jakoje prychodzić u hałavu, — usie hetyja kampanii abjadnanyja ahulnaj sistemaj kiravańnia», — zajaviŭ «Mieduzie» i OCCRP ekśpiert pa karupcyjnych pytańniach.
Jon adznačyŭ, što «hrupa kampanij» LLCInvest sfarmavałasia vakoł ludziej, jakija byli blizkija da Pucina jašče padčas jaho pracy ŭ meryi Sankt-Pieciarburha ŭ 1990-ch hadach.
Ekśpiert vykazaŭ zdahadku, što hetaje niefarmalnaje abjadnańnie moža być uładkavanaje jak kaapieratyŭ, čalcy jakoha, vierahodna, abmieńvajucca majomaściu i pasłuhami.
Ad pres-sakratara Pucina Dźmitryja Piaskova žurnalisty atrymali karotki adkaz: «Prezident Rasijskaj Fiederacyi nijakim čynam nie źviazany i nie afilavany z nazvanymi vami abjektami i arhanizacyjami».
Navošta patrebnyja takija składanyja schiemy
«Hrupa kampanij» LLCInvest, vierahodna, dziejničaje pa pryncypie, apisanym jašče ŭ 2010 hodzie ŭciekačom za miažu, biznesmienam Siarhiejem Kaleśnikavym. Jak śćviardžaŭ Kaleśnikaŭ u svaim adkrytym liście da tahačasnaha prezidenta Dźmitryja Miadźviedzieva, jon raskryŭ schiemu, z dapamohaj jakoj Pucin (u toj čas — premjer-ministr RF) moh źbirać aktyvy na sotni miljardaŭ rubloŭ ad blizkich jamu aliharchaŭ u svojeasablivy «inviestycyjny fond» dla asabistaha karystańnia.
Prykładna hetak ža, ličyć ekśpiert pa karupcyi, uładkavanaja i «hrupa LLCInvest» — tolki mienš centralizavana i z zachavańniem vialikich zaściaroh: kab źnizić ryzyku ad raskryćcia ŭsioj schiemy jaje ŭdzielnikam.
Navat u damašnim stryp-kłubie — dvuchhałovyja arły. Kamanda Navalnaha pakazała sotni fatahrafij z «pałaca Pucina»
Za apošni čas raptoŭna i pry dziŭnych abstavinach pamierli minimum šeść rasijskich top-mieniedžaraŭ i miljanieraŭ. Voś chto heta byŭ
Śpiecsłužby, kachanki, zahadkavyja śmierci…
