Fota: Radyjo Svaboda
Cichanoŭskaja nahadała ab pramovie Uinstana Čerčyla, ź jakoj jon vystupiŭ u Ciurychu paśla Druhoj suśvietnaj vajny. Čerčyl tady kazaŭ, što trahiedyja moža pieratvarycca ŭ abiacańnie i što byłyja ahresary i ich achviary mohuć pabudavać novaje hodnaje žyćcio na jeŭrapiejskim kantyniencie.
Adnak, na dumku Śviatłany Cichanoŭskaj, i praz 80 hadoŭ paśla toj pramovy Čerčyla trahiedyja Jeŭropy jašče nie zakončyłasia, «ahoń vajny znoŭ haryć na našym kantyniencie. I znoŭ razdajucca hałasy, jakija zaklikajuć nas ułahodžvać, a nie supraćdziejničać pavodzinam, jakija supiarečać usiamu, za što vystupaje hetaja arhanizacyja (PARIE)».
Havoračy pra Biełaruś, Cichanoŭskaja zajaviła:
«Spadaryni i spadary, my pavinny raz i nazaŭždy pakłaści kaniec trahiedyi Jeŭropy. U Biełarusi heta niespraviadlivaje pazbaŭleńnie voli, katavańni i śmiarotnaje pakarańnie. Dyktatura i cenzura. Karupcyja i kradziež našych nacyjanalnych resursaŭ. Prodaž našaha suvierenitetu dla zachavańnia ŭłady. Pryziamleńnie mižnarodnaha rejsu dla zachopu aktyŭnych hramadzian. Žorstkaje abychodžańnie ź mihrantami dla stvareńnia chaosu na našych miežach. I vykarystańnie našaj krainy ŭ jakaści startavaj placoŭki dla napadu i pahroz našym susiedziam. Heta nie toje, čaho my, biełarusy, žadajem dla svajoj krainy… ci dla Jeŭropy. Naša pieramoha na vybarach 2020 hoda stała hučnym i jasnym pasłańniem: my jeŭrapiejcy, my žadajem viartańnia našaj krainy nazad — nazad biełarusam i nazad u Jeŭropu».
Cichanoŭskaja taksama skazała, što letašni jaje vystup u Jeŭrapiejskim parłamiencie u Strasburhu byŭ papiaredžańniem ab tym, što trahiedyja Biełarusi stanie novaj trahiedyjaj Jeŭropy, kali na jaje nie budzie dadzieny rašučy, pryncypovy i praktyčny adkaz. Jana ličyć, što ŭ śviatle apošnich padziej mieła racyju i što jaje letašniaja pramova stała jašče bolš aktualnaj:
«Ci budzie trahiedyja Jeŭropy praciahvacca, tamu što dobryja ŭrady admaŭlajucca ad svaich kaštoŭnaściaŭ i nie ŭ stanie dziejničać svoječasova? Ukraincy nie admovilisia ad hetych kaštoŭnaściaŭ. I jany pakazali śmiełaść dziejničać. Jany viedajuć, što zamach na ich suvierenitet jość zamach na suvierenitet usich. Jany viedajuć, što ŭkus miadźviedzia tolki raspalić jaho apietyt.
Ukraincy praciahvajuć zmahacca i ličać, što trahiedyja Jeŭropy praciahvajecca. My, biełarusy, taksama nie admovilisia ad hetych kaštoŭnaściaŭ. Našy ludzi praciahvajuć supraciŭlacca navat paśla masavych represij za apošnija dva hady. Amal 2000 čałaviek byli zatrymanyja za pratesty suprać vajny va Ukrainie. Partyzany ŭnutry Biełarusi ŭčynili bolš za 80 dyviersij suprać rasijskich vajskoŭcaŭ. I da 1500 biełaruskich dobraachvotnikaŭ dałučylisia da ŭkrainskaj armii. Adzin ź ich — Cimur Mickievič. Jamu było 17 hadoŭ, kali jaho pabili milicyjanty da nieprytomnaha stanu ŭ pieršyja dni našych mirnych pratestaŭ u 2020 hodzie. Jon tydzień byŭ u komie. Jaho maci pamierła ad stresu. Našy ludzi dapamahli Cimuru ŭciačy ŭ Čechiju, dzie daktary pastavili jaho na nohi. Hetaj viasnoj jon pajechaŭ abaraniać Ukrainu. Cimur razumieje, što pahroza, ź jakoj siońnia sutykajecca Ukraina, bolšaja, čym pahroza tolki adnoj krainie. Što baraćba va Ukrainie — heta baraćba «za našu i za vašu svabodu».
Na dumku demakratyčnaj lidarki Biełarusi, supracoŭnictva z PARIE pavinna budavacca pa dvuch asnoŭnych kirunkach — instytucyjnym budaŭnictvie i raźvićci hramadstva. Jana zaklikała Radu Jeŭropy stvaryć kaardynacyjny kamitet pa dačynieńniach ź Biełaruśsiu, jaki pavinien składacca z pradstaŭnikoŭ roznych orhanaŭ Rady Jeŭropy i pradstaŭnikoŭ demakratyčnych sił i hramadzianskaj supolnaści Biełarusi.
Śviatłana Cichanoŭskaja znoŭ nahadała deputatam PARIE, što biełarusy kulturna i histaryčna naležać da Jeŭropy, i zajaviła, što hety fakt jaje abnadziejvaje.
Na dumku Cichanoŭskaj, hetaja hrupa budzie sumiesna vyznačyć pryjarytetnyja napramki supracoŭnictva, spłanuje, padrychtuje i zapuścić prahramy i prajekty dapamohi i kantrolu za ich realizacyjaj. Heta zrobić Biełaruś bližejšaj da Rady Jeŭropy.
«Spadarstva, historyja našaha kantynienta pakazvaje nam šlach. Našy kaštoŭnaści — naša siła. I siońnia my pavinny vykarystoŭvać usie našy siły, kab abaraniać hetyja kaštoŭnaści — dziela ŭsioj Jeŭropy. U našych siłach pakłaści kaniec trahiedyi Jeŭropy raz i nazaŭždy. A taksama pieradać abiacańnie Jeŭropy ŭsim tym, chto imkniecca žyć razam u svabodzie, miry i praćvitańnia. Davajcie zrobim heta. Dziakuj vam! Žyvie Biełaruś, słava Ukrainie, žyvie Jeŭropa!» — skazała na zakančeńnie Śviatłana Cichanoŭskaja.
Vystup Śviatłany Cichanoŭskaj zaviaršyŭsia doŭhimi vopleskami deputataŭ, jakija vitali demakratyčnuju lidarku Biełarusi stojačy.
U svaim zaklučym vystupie paśla debataŭ Cichanoŭskaja, adkazvajučy na pytańni, zaklikała siabroŭ PARIE nie nazyvać Łukašenku prezidentam, bo jon prajhraŭ vybary i nie maje lehitymnaści, utrymlivaje ŭładu siłaj. Z režymam biez vyzvaleńnia palitviaźniaŭ niemahčymyja nijaki dyjałoh i pieramovy, treba razmaŭlać ź biełaruskimi demakratyčnymi siłami, padkreśliła jana. Taksama Cichanoŭskaja kazała pra pakiet reformaŭ, padrychtavany demakratyčnymi siłami, kab «być padrychtavanymi, kali padźmie viecier mahčymaściaŭ».
