Sankcyi, uviedzienyja ŭ dačynieńni da Rasii i Biełarusi, mocna zakranuli aŭtamabilnuju śfieru. Da nas užo praktyčna spynilisia pastaŭki novych aŭto, a ceny na toje, što zastałosia ŭ najaŭnaści, zaŭvažna padraśli. Tym nie mienš, prablemy, źviazanyja z novymi mašynami, zakranajuć daloka nie ŭsich, čaho nie skažaš pra situacyju z aŭtamabilnymi zapčastkami i raschodnikami.
«Vybar zaŭvažna zvuziŭsia, zamiest 4-5 varyjantaŭ ciapier prapanujecca tolki adzin. Pa niekatorych pazicyjach uvohule ničoha nie zastałosia. Asabliva vostra stajać pytańni z matornymi alivami, filtrami i inšymi raschodnikami», — kaža supracoŭnik adnoj z bujnych firm-pastaŭščykoŭ.
Praz składanaści z pastaŭkami, ceny na zapčastki i alivy ŭ Biełarusi pajšli ŭharu, asabliva, kali paraŭnać ich z cenami ŭ susiednich krainach.
Asabliva roźniacca ceny na tavary, jakija vyrablajuć niepasredna ŭ ES. Siarod zapčastak, jakija ŭ Biełarusi značna daražejšyja, čym u susiedniaj Polščy abo Litvie, — detali sčapleńnia, kamplekty HRM, matornyja alivy.
Dla nahladnaści my paraŭnali ceny na niekalki papularnych detalaŭ u troch krainach.
Tak, naprykład, kamplekt sčapleńnia dla VW/Audi z dyzielnym ruchavikom abjemam dva litry ŭ Biełarusi pradajecca pa cenach ad 564 rubloŭ (kala 210 jeŭra), u toj čas jak u Litvie taki samy kamplekt kaštuje ŭsiaho 108 jeŭra (kala 290 rubloŭ). U Polščy hetaja detal taksama pradajecca krychu tańniej za 300 rubloŭ.
Na bolš darahich detalach, roźnica ŭ canie stanovicca jašče bolš zaŭvažnaj. Poŭny kamplekt sčapleńnia z machavikom i vycisknym padšypnikam u Biełarusi pradajecca amal za 2000 rubloŭ (kala 720 jeŭra), u toj čas, jak u Polščy ci Litvie jaho možna nabyć prykładna za 350 jeŭra.
U vypadkach, kali vy znojdziecie kramu, jakaja hatovaja aformić TaxFree, to ad cany tavaru, nabytaha u Litvie ci Polščy, možna adniać jašče ad 11,5 da 19%.
Raniej taksama byŭ sens nabyvać darahija zapčastki za miažoj, ale ekanomija ŭ pieršuju čarhu atrymlivałasia za košt viartańnia padatku na dadanuju vartaść (PDV).
«Ciapier ža my bačym, što navat bieź viartańnia PDV mnohija pazicyi ŭ Polščy i Litvie možna kupić u dva razy tańniej. Raniej takoha nie było, roźnica, kali i była, to kala 5-10%. Vyhada źjaŭlałasia tolki pry viartańni PDV. Ciapier vynikaje, što kali aformić TaxFree, to ŭ Jeŭropie možna nabyć zapčastki za 40% ad biełaruskaj cany», — zaŭvažaje śpiecyjalist sa śfiery.
Pa jaho słovach, niekatoryja drobnyja pradprymalniki ŭžo pačali samastojna pryvozić chadavyja zapčastki ź ES, kab potym pierapradać u Biełarusi.
«Heta asabliva raspaŭsiudžana ŭ pryhraničnych rehijonach, ciapier na rynkach Bresta i Hrodna pradajecca davoli šmat takich zapčastak.
Jość ludzi, jakija hatovyja 3-7 dzion čakać, pakul im pryviazuć niešta pad zamovu z-za miažy, bo roźnica atrymlivajecca istotnaja, tym bolš, što niekatoryja pazicyi ŭ Biełarusi ŭvohule stali niedastupnymi».
Vialikaja roźnica nazirajecca i ŭ cenach na kamplekty HRM.
Poŭny kamplekt HRM z pompaj usio na toj ža dvuchlitrovy ruchavik ad VAG kaštuje ŭ Biełarusi 735 rubleŭ (kala 270 jeŭra). U Litvie — 140 jeŭra (kala 380 rubloŭ).
Nastupnaja katehoryja tavaraŭ, ceny na jakija ŭ nas taksama našmat vyšejšyja, čym u ES, — matornyja alivy.
Tak, naprykład, ceny na 4 litry alivy SHELL Helix HX8 5W-40 u Biełarusi pačynajucca sa 144 rubloŭ, tym časam u Litvie jon kaštuje 35 jeŭra (kala 95 rubloŭ).
Praz składanaści z pastaŭkami i vysokimi cenami ŭ Biełarusi ŭsio čaściej možna sustreć u prodažy alivu, pryviezienuju ź ES, kaža supracoŭnik adnoj ź firm-pastaŭščykoŭ.
«Šmat alivy jedzie z Polščy, drobnyja pradprymalniki kuplajuć adrazu pa niekalki ŭpakovak, atrymlivajuć źnižku ŭ pradaŭca, plus viartajuć PDV (da 19% ad koštu tavaru)».
Kali situacyja nie źmienicca, miarkuje naš surazmoŭca, to patok zapčastak ź ES, jakija ŭvoziać šerymi mietadami, budzie raści.
Čytajcie taksama: Rynak novych aŭtamabilaŭ ruchnuŭ. Napieradzie — deficyt
Biełarusy zastanucca biez novych Volkswagen?
Pa zakonie možna, a pa fakcie — nie. Čamu ŭ Biełaruś niemahčyma ŭvieźci elektramabil biez spłaty myta?
