U kolki ciapier biełarusy vychodziać na piensiju
U Biełarusi z hetaha hoda mužčyny vychodziać na piensiju ŭ 63 hady, a žančyny — u 58 hadoŭ. Sioleta skončyłasia piensijnaja reforma, jakaja pačałasia ŭ 2017-m.
Raniej čynoŭniki abmiarkoŭvali dalejšaje pavyšeńnie piensijnaha ŭzrostu paśla 2022 hoda, ale havorka išła tolki pra žančyn. Jašče bolš pavysić piensijny ŭzrost raili i ŭ MVF.
U Minpracy ŭ traŭni hetaha hoda zajaŭlali, što pavyšeńnie piensijnaha ŭzrostu nie razhladajecca.
Udakładnim, što siaredniaja praciahłaść žyćcia žančyn u Biełarusi składaje kala 78 hadoŭ, a mužčyn — 64 hady.
Jak prapanujuć padniać piensijny ŭzrost u biznes-sajuzie
Žanna Tarasievič ličyć, što pryniatych u 2017 hodzie mier nie dastatkova, što Biełarusi patrebnaja jašče adna piensijnaja reforma. «Nam pryjdziecca viartacca da čarhovaj reformy. Budzie heta praz hod ci dva, skazać składana, tamu što źmianiajecca ekanamičnaja situacyja — ličyć kiraŭnik BSPN. — Ale my budziem stajać pierad vybaram — treba pravodzić reformu,
albo pavialičvać abaviazkovyja adličeńni z fondu apłaty pracy, albo nam pryjdziecca źnižać pamiery piensij.
Tamu što, chutčej za ŭsio, z-za deficytu resursaŭ Fondu biudžet pavinien budzie datavać fond, kab vypłačvać piensiju choć by na ŭzroŭni 40% ad siaredniaj zarpłaty».
Biźnies-sajuz vystupaje za pavyšeńnie piensijnaha ŭzrostu da 63 hadoŭ nie tolki dla mužčyn, ale i dla žančyn. Ale pastupova, na praciahu 10-15 hadoŭ.
— Z momantu raspracoŭki našaj kancepcyi piensijnaj sistemy prajšło amal 10 hadoŭ. Viadoma, treba pravodzić dadatkovyja daśledavańni, ad čahości admaŭlacca albo niejkija punkty prapisvać bolš vyrazna. Ale my ličym prapanovy całkam žyćciazdolnymi i chočam abmierkavać ich z nasielnictvam i pačuć ich mierkavańnie, — ličyć Žanna Tarasievič.
Na jaje dumku, u Biełarusi taksama treba vyraŭnoŭvać dolu adličeńniaŭ ad rabotnikaŭ i pracadaŭcaŭ. Ciapier heta 1% i 34% (stolki płaciać rabotnik i najmalnik adpaviedna).
— Pavoli my pavinny pryjści da suadnosin 50/50. Heta nie značyć, što ŭžo zaŭtra treba zabirać z zarobku rabotnikaŭ 14%, možna dadavać pa 0,5-1% u hod. Tady ŭ najmalnika budzie zacikaŭlenaść vypłačvać bolš vysokuju zarabotnuju płatu, a ŭ rabotnikaŭ — atrymać u budučyni bolš vysokuju piensiju.
Žanna Tarasievič źviartaje ŭvahu na toje, što ŭ Biełarusi piensii nie mocna dyfierencyravanyja. «U kahości nizkija, u kahości vysokija zarabotnyja płaty, a pry vychadzie na piensiju pamier dapamohi nie našmat adroźnivajecca adzin ad adnaho. Atrymlivajecca, što piensii amal nie zaležać ad adličeńniaŭ, jakija ažyćciaŭlalisia, kali čałaviek pracavaŭ», — kaža kiraŭnik BSPN.
