Fota ilustracyjnaje
Jak patłumačyŭ padčas sumiesnaha pasiadžeńnia kamitetaŭ infrastruktury i nacyjanalnaj abarony namieśnik ministra infrastruktury Rafał Viebier, adna z papravak, pryniatych u čaćvier Siejmam, tyčycca vydačy vizaŭ kiroŭcam ź Biełarusi, jakija pracujuć u polskich transpartnych kampanijach u Polščy.
Namieśnik ministra patłumačyŭ, što jany chočuć, kab uvieś hety praces adbyvaŭsia ŭ Polščy, kab kiroŭcam nie treba było viartacca dla adnaŭleńnia vizaŭ u Biełaruś. Bo niama harantyj, što jany adtul viernucca, a deficyt kiroŭcaŭ vielmi vialiki.
Heta, pa słovach Viebiera, važna, kali havorka idzie pra biaśpieku polskaha transpartu, «asabliva ciapier, kali buduć pavialičvacca ekspartnyja patreby Polščy ŭ roznych vidach syraviny i tavaraŭ z Ukrainy aŭtamabilnym transpartam».
Zhodna z papraŭkaj, dla kiroŭcaŭ-biełarusaŭ, jakija pracujuć na polskija firmy, u jakich užo na vosień (1 vieraśnia 2022 hoda i paźniej) vypadaje apošni dzień terminu dziejańnia nacyjanalnaj vizy (albo terminu znachodžańnia pa vizie), ci apošni dzień ich dazvołu na časovaje znachodžańnie, hetyja terminy aŭtamatyčna padaŭžajucca da 31 śniežnia 2022 hoda. Padoŭžanaja viza budzie davać prava na pierasiačeńnie miažy ŭ metach hruzapieravozki.
Nalepki, jakija śviedčać pra padaŭžeńnie vizy, buduć vydavać ułady vajavodstvaŭ. Kali pavodle svaich dakumientaŭ kiroŭca-biełarus pavinien byŭ pa ich zakančeńni vyjechać z terytoryi Polščy 1 vieraśnia 2022 hoda i paźniej, to hety termin dla jaho padaŭžajecca da 24 žniŭnia 2023 hoda.
Taksama padaŭžajecca dziejańnie vydadzienych kiroŭcam-biełarusam «kartaŭ pobytu», polskich paśviedčańniaŭ asoby zamiežnika: kali ich apošni dzień dziejańnia vypadaje na termin ad 1 vieraśnia hetaha hoda, jany padaŭžajucca da 24 žniŭnia 2023-ha. Pry hetym pa padoŭžanych kartach znachodžańnia nielha budzie vyjazdžać za miežy Polščy.
Taksama da 24 žniŭnia 2023 hoda budzie ličycca lehalnym znachodžańnie ŭ Polščy pa šenhienskich vizach i inšych dakumientach, vydadzienych Polščaj i inšymi krainami Šenhiena i jakija dazvalajuć pierasiakać miažu, a taksama ŭ ramkach biaźvizavaha ruchu, kali termin znachodžańnia pa hetych dakumientach kančajecca 1 vieraśnia 2022-ha i paźniej, a samo znachodžańnie pačałosia raniej.
