Jens Stołtenbierh
Kiraŭnik NATA Jens Stołtenbierh, vystupajučy na samicie, adznačyŭ, što pierad arhanizacyjaj paŭstali najvialikšyja vykliki z časoŭ Druhoj suśvietnaj vajny:
«My ŭchvalili novuju Stratehičnuju kancepcyju. U joj apisvajecca asiarodździe biaśpieki, ź jakim sutykajecca Aljans, paćviardžajucca našy kaštoŭnaści i apisvajecca klučavaja meta i najvialikšaja adkaznaść NATA pa zabieśpiačeńni našaj kalektyŭnaj abarony na asnovie 360-hradusnaha padychodu.
Dakumient vyznačaje try asnoŭnyja zadačy NATA — strymlivańnie i abaronu; praduchileńnie kryzisaŭ i kiravańnie imi; i kaapieratyŭnaja biaśpieka. U nastupnyja hady my budziem kiravacca hetym u našaj pracy ŭ duchu transatłantyčnaj salidarnaści».
U novaj Stratehičnaj kancepcyi Paŭnočnaatlantyčny aljans vykazaŭsia adnosna Rasii i Kitaja. Dekłaracyja krain-členaŭ składajecca z 22 punktaŭ.
Pra Rasiju tam havorycca:
«Rasijskaja Fiederacyja źjaŭlajecca najbolš značnaj i niepasrednaj pahrozaj biaśpiecy sajuźnikaŭ, miru i stabilnaści ŭ jeŭraatłantyčnym rehijonie. Jana imkniecca stvaryć śfiery ŭpłyvu i pramoha kantrolu z dapamohaj prymusu, padryŭnoj dziejnaści, ahresii i anieksii, vykarystoŭvaje zvyčajnyja, kibier— i hibrydnyja srodki suprać nas i našych partnioraŭ. Vajskovaja rytoryka i dakazanaja hatoŭnaść vykarystoŭvać siłu dla dasiahnieńnia svaich palityčnych metaŭ padryvajuć zasnavany na praviłach mižnarodny paradak».
Taksama ŭ tekście adznačana, što Rasija madernizuje svaje jadziernyja siły i pašyraje svaje novyja razburalnyja sistemy padvojnaj dastaŭki, adnačasova vykarystoŭvajučy prymusovuju jadziernuju sihnalizacyju. Heta nakiravana na destabilizacyju krain na ŭschodzie i poŭdni Aljansu. Na Krajniaj Poŭnačy zdolnaść sarvać padmacavańnie sajuźnikaŭ i svabodu sudnachodstva praz Paŭnočnuju Atłantyku — stratehičny vyklik dla Aljansu.
«Naroščvańnie maskoŭskich vojskaŭ, u tym liku ŭ rehijonach Bałtyjskaha, Čornaha i Mižziemnaha moraŭ, razam z vajskovaj intehracyjaj ź Biełaruśsiu kidajuć vyklik našaj biaśpiecy i intaresam», — dadali ŭ NATA.
Pry hetym u tekście adznačajuć, što NATA nie imkniecca da kanfrantacyi i nie ŭvasablaje pahrozy dla Rasii, adnak budzie «adkazna reahavać na rasijskija pahrozy i varožyja dziejańni». Abiacajuć značna ŭzmacnić strymlivańnie i abaronu dla ŭsich sajuźnikaŭ, pavysić ustojlivaść suprać rasijskaha prymusu.
«U śviatle jaje varožaj palityki i dziejańniaŭ, my nie možam ličyć Rasijskuju Fiederacyju našym partnioram. Tym nie mienš, my pa-raniejšamu hatovyja zachavać adkrytyja kanały suviazi z Maskvoj, kab kiravać i źmiakčać ryzyki, praduchilać eskałacyju i pavyšać prazrystaść. My imkniemsia da stabilnaści i pradkazalnaści ŭ jeŭraatłantyčnaj prastory».
Adnosna Kitaja ŭ Aljansie ličać, što «zajaŭlenyja ambicyi i palityka prymusu Kitajskaj Narodnaj Respubliki kidajuć vyklik intaresam, biaśpiecy i kaštoŭnaściam», što dekłaruje NATA:
«KNR vykarystoŭvaje šyroki śpiektr palityčnych, ekanamičnych i vajennych instrumientaŭ dla pavieličeńnia svajoj hłabalnaj prysutnaści i mahutnaści prajektaŭ, zastajučysia nieprazrystym adnosna svajoj stratehii, namieraŭ i vajskovaha naroščvańnia.
Škodnasnyja hibrydnyja i kibierapieracyi KNR i jaje kanfrantacyjnaja rytoryka i dezynfarmacyja nacelenyja na sajuźnikaŭ i škodziać biaśpiecy Aljansu».
Kitaj imkniecca kantralavać klučavyja technałahičnyja i pramysłovyja siektary, krytyčnuju infrastrukturu, a taksama stratehičnyja materyjały i łancužki pastavak. Jon vykarystoŭvaje svaje ekanamičnyja ryčahi dla stvareńnia stratehičnych zaležnaściaŭ i ŭzmacnieńnia ŭpłyvu, imkniecca padryvać zasnavany na praviłach mižnarodny paradak, u tym liku ŭ kaśmičnaj, kibier— i marskoj śfierach.
«Pahłybleńnie stratehičnaha partniorstva pamiž Kitajem i Rasijaj i ich uzajemnyja sproby padarvać zasnavany na praviłach mižnarodny paradak supiarečać našym kaštoŭnaściam i intaresam.
My pa-raniejšamu adkrytyja dla kanstruktyŭnaha ŭzajemadziejańnia z KNR, u tym liku dziela stvareńnia ŭzajemnaj prazrystaści, z metaj abarony intaresaŭ biaśpieki Aljansu».
Taksama ŭ NATA adznačyli, što buduć nadalej, jak i z Rasijaj, dypłamatyčnym šlacham sprabavać likvidavać napružanaść.
