Źleva na fota Dyłan Chili (zdymak siamji), sprava — Endru Chił na videa Minabarony Rasii
Kryminalnyja spravy ŭ dačynieńni da Chili i Chiła ŭzbudžanyja pa art. 430 KK DNR («Najomnictva»). Ciapier pałonnyja brytancy ŭtrymlivajucca ŭ adnym ź SIZA samaabvieščanaj DNR.
22-hadovaha Dyłana Chili zatrymali na KPP u Zaparožžy ŭ krasaviku, kali jon jechaŭ vyvozić ukrainskuju siamju z zony bajavych dziejańniaŭ. Jon zajmaŭsia humanitarnaj pracaj i dapamahaŭ miascovym žycharam u jakaści dobraachvotnika, śćviardžajuć u niaŭradavaj arhanizacyi Presidium Network, što akazvaje dapamohu žycharam Ukrainy, paciarpiełym ad vajny.
35-hadovaha Endru Chiła zatrymali ŭ tym ža miesiacy ŭ Mikałajeŭskaj vobłaści.
Rasijskaje dziaržaŭnaje ahienctva TASS śćviardžaje, što Dyłana Chili ŭziali ŭ pałon na kambinacie imia Iljiča pry akupacyi Maryupala, a Chiła — u Mikałajeŭskaj vobłaści.
«Ź imi viaducca śledčyja dziejańni, u chodzie jakich śledčym nieabchodna budzie atrymać dokazy ŭčynienych brytancami złačynstvaŭ, pakolki jany nie chočuć davać pakazańni i supracoŭničać u ramkach kryminalnych spraŭ, uzbudžanych ŭ dačynieńni da ich», — cytuje TASS svajho surazmoŭcu ŭ samaabvieščanaj DNR.
Raniej u červieni tak zvany Viarchoŭny sud samaabvieščanaj DNR prysudziŭ da śmiarotnaha pakarańnia brytancaŭ Šona Piniera i Ejdena Aślina, a taksama hramadzianina Maroka Saaduna Brahima, pryznaŭšy ich vinavatymi ŭ najomnictvie, sprobie hvałtoŭnaha zachopu ŭłady, a taksama ŭ prachodžańni navučańnia ŭ metach ažyćciaŭleńnia terarystyčnaj dziejnaści.
U čaćvier Jeŭrapiejski sud pa pravach čałavieka (JESPČ) zahadaŭ Rasii zabiaśpiečyć nievykanańnie śmiarotnaha prysudu Pinieru i Aślinu (raniej jon toje ž samaje i prysudziŭ i adnosna Brahima), ale Rasieja zajaviła, što bolš nie vykonvaje rašeńni JESPČ.
Ciapier sud u samaabvieščanaj DNR, lehitymnaść jakoha nie pryznaje suśvietnaja supolnaść, pradjaviŭ anałahičnyja abvinavačvańni Dyłanu Chili i Endru Chiłu.
Što viadoma pra Dyłana Chili i Endru Chiła
Pra zachop u pałon Dyłana Chili ŭ krasaviku raspaviała humanitarnaja arhanizacyja Presidium Network. U intervju Bi-bi-si jaje pradstaŭnik Daminik Birn skazaŭ, što Chili i jašče adzin brytaniec, 45-hadovy Poł Jury, pracavali dobraachvotnikami, dapamahajučy miascovym žycharam, kali rasiejskija vajskoŭcy ŭziali ich u pałon u Zaparožžy. Chili i Jury pracavali niezaležna ad arhanizacyi Presidium Network, ale padtrymlivali ź joju ciesny kantakt.
Pa dadzienych Presidium Network, u momant, kali ich aryštavali, Chili i Jury jechali na mašynie vyzvalać ukrainskuju siamju ź vioski na poŭdzień ad horada.
Pa słovach Birna, Chili — kuchar pa prafiesii. Jon žyvie ŭ horadzie Chantynhton pobač z Kiembrydžam. Arhanizacyja Presidium Network padtrymlivaje rehularny kantakt ź jaho siamjoj, jakaja vielmi napałochana. Jana znachodzicca na suviazi z brytanskim uradam i Čyrvonym Kryžam, jakija sprabujuć atrymać dostup da Chili, kab pravieryć jaho stan.
Birn padkreśliŭ, što Chili nie byŭ źviazany ni z uzbrojenymi siłami Ukrainy, ni ź mižnarodnymi lehijonami, a znachodziŭsia ŭ krainie vyklučna jak vałancior, dla dapamohi mirnamu nasielnictvu.
Što tyčycca Endru Chiła, to videa ź jahonym udziełam 29 krasavika raspaŭsiudziła Ministerstva abarony Rasiei, nazvaŭšy jaho brytancam, jaki zdaŭsia ŭ pałon rasiejskim vajskoŭcam u Mikałajeŭskaj vobłaści na paŭdniovym zachadzie Ukrainy.
Na videa pryhniečany čałaviek u vajennaj kurtcy nazyvaje siabie Endru Chiłam i kaža, što jon rodam ź Plimuta ŭ Vialikabrytanii. Adna ruka ŭ jaho ŭ hipsie, i jon pytajecca, ci ŭ biaśpiecy jon i ci moža atrymać miedycynskuju dapamohu.
Kamientujučy abvinavačvańni ŭ najomnictvie, pradjaŭlenyja brytancam Dyłanu Chili i Endru Chiłu ŭ samaabvieščanaj DNR, brytanskaje Ministerstva zamiežnych spraŭ rašuča asudziła vykarystańnie pałonnych u palityčnych metach.
«My padtrymlivajem pastajanny kantakt z uradam Ukrainy pa ich spravach, i całkam padtrymlivajem namahańni Ukrainy, nakiravanyja na ich vyzvaleńnie», — skazaŭ pradstaŭnik viedamstva.
