Jak chutka vyvučyć zamiežnuju movu? Voś 11 prostych paradaŭ 6

Fota: pixabay.com

Staŭcie kankretnyja i realnyja mety

Kali ŭžo vy vyrašyli vyvučyć zamiežnuju movu, vyznačcie dla siabie: čaho kankretna vy chočacie dasiahnuć i ŭ jaki termin? Mahčyma, vy aptymist i chočacie zahavaryć na novaj movie svabodna, ale heta moža być nie najlepšaj idejaj. Pastaŭcie maksimalna jasnyja mety — naprykład, być zdolnym čytać artykuł u haziecie na novaj movie i nie karystacca pry hetym słoŭnikam.

Racyjanalna ŭsio raspłanujcie

Pačynajcie vyvučeńnie zamiežnaj movy z taho, što składzicie płan zaniatkaŭ. Nadrukujcie sabie kalandar ź imi ci kupicie štodziońnik i zafiksujcie svoj raskład tam. Pamiatajcie: kali zapisać svoj płan na papiery, heta pavialičyć vierahodnaść taho, što vy jaho vykanajecie. U vypadku, kali vy vučycie movu całkam samastojna, pastarajciesia ŭklučyć u płan treniroŭku čatyroch asnoŭnych moŭnych navykaŭ: słuchańnia, čytańnia, maŭleńnia i pisańnia. 

Zajmajciesia rehularna

Dziŭna, kolki ŭsiaho možna vyvučyć, kali ŭsiaho niekalki dzion zajmacca zamiežnaj movaj. Jašče bolš dziŭna, jak šmat i jak chutka mova zabyvajecca, kali zakinuć zaniatki.

Vyvučeńnie zamiežnaj movy — toj vypadak, kali lepš rabić kožny dzień patrochu, čym pryśviačać zaniatkam ceły dzień, ale redka. Vy chutčej zdabudziecie pośpiech, kali budziecie zajmacca pa paŭhadziny kožny dzień, čym kali pryśviacicie movie, naprykład, 8 hadzin raz na tydzień.

Słuchajcie

Pierš čym vy pačniecie havaryć na novaj movie, vam treba navučycca słuchać, jak inšyja havorać na joj. Kožnaja mova, kali vy čujecie jaje ŭpieršyniu, hučyć dziŭna. Ale čym bolš vy čujecie jaje, tym bolš znajomaj jana robicca, i ŭ vyniku vam robicca lahčej jaje razumieć. Pamiatajcie, što my zdolnyja vymavić usio, prosta da niekatorych hukaŭ my nie pryvykli, tamu važna čuć ich čaściej, kab i samomu navučycca ich havaryć.

Rabicie toje, što vam cikava

Navat kali vy ŭ zachapleńni ad novaj movy, u niejki momant vy možacie adčuć, što raźbiracca ź joj dalej dla vas nievynosna ciažka. Tady pasprabujcie sumiaścić vyvučeńnie movy z rečami, jakija vam cikavyja.

Lubicie čytać? Čytajcie teksty na zamiežnaj movie. Hladzieć filmy na joj taksama moža być karysna, asabliva kali vy ŭklučycie padčas prahladu subtytry na toj ža movie. Taksama vam mohuć dapamahčy kampjutarnyja hulni i muzyka na movie, jakuju vy vyvučajecie.

Pakińcie zonu kamfortu

Budźcie hatovyja da taho, što ŭ pracesie navučańnia vy budziecie rabić pamyłki i što vy možacie apynucca ŭ niajomkich situacyjach. Takaja pierśpiektyva moža pužać, ale nasamreč heta adziny sposab udaskanalvać svajo viedańnie movy. Tamu razmaŭlajcie ź nieznajomcami na novaj movie — kali vy nie možacie naviedać krainu, movu jakoj vučycie, znachodźcie surazmoŭcaŭ praź internet. Čym čaściej vy heta robicie, tym kamfortniej dla vas hutaryć na novaj movie i, adpaviedna, tym lahčej vy budziecie siabie adčuvać, kali nastupny raz joj skarystajeciesia.

Nie niedaaceńvajcie važnaść pierakładu

Na roznych etapach navučańnia vam mohuć spatrebicca roznyja padychody. U niejki momant svajho vyvučeńnia movy, kali vy ŭžo navučylisia trochi na joj havaryć, možna adčuć, nibyta vaš prahres zapavolvajecca. U takim vypadku źviarnicie ŭvahu na praktykavańni na pierakład, bo jany dobra dapamahajuć pieraadoleć moŭnaje płato. Takija praktykavańni nie dajuć mahčymaści zamianiać niazručnyja słovy i prymušajuć vas šukać ich pierakład, u vyniku vy palapšajecie svajo viedańnie.

Pamiatajcie: uzrost — usiaho tolki mif

Šmat chto ličyć, što lepiej za ŭsio vučyć zamiežnuju movu ŭ dziacinstvie. Vierahodna, dzieci i darosłyja sapraŭdy pa-roznamu zasvojvajuć infarmacyju, ale heta nie pavinna prymušać vas dumać, što novuju movu vam užo nie zasvoić. Dzieci vučać movu instynktyŭna, a darosłyja sprabujuć sistematyzavać praces navučańnia, i abodva varyjanty prynosiać svaje vyniki. Kali heta vas nie pierakonvaje, uspomnicie staražytnych movaznaŭcaŭ, jakija ŭ darosłym uzroście vyvučali dziasiatki moŭ.

Vyvučajcie novyja słovy ŭ kantekście

Moža być ciažka, dy i prosta nudna, zubryć doŭhija śpisy novaj leksiki. U takim vypadku vam moža dapamahčy ŭmieńnie stvarać asacyjacyi pamiž słovami. Źviazvajcie słovy, jakija vy vučycie, ź situacyjami ci tekstami, jakija majuć dla vas značeńnie, i tady leksika budzie zapaminacca lahčej.

Idzicie (ci jedźcie) tudy, dzie havorać na movie, jakuju vy vyvučajecie

Viadoma, tak zrabić mohuć nie ŭsie. Ale ekśpierty ličać, što kali vy surjozna staviciesia da vyvučeńnia movy dy jašče i žadajecie atrymlivać ad pracesu zadavalnieńnie, važna nakiravacca tudy, dzie hutarać na movie vyvučańnia. Lahčej za ŭsio znajomicca z movaj pa knižkach i tablicach dziejasłovaŭ, ale jak tolki vy apyniaciesia ŭ novaj krainie, praz znajomstva ź ludźmi i kulturaj vy vyvučycie značna bolš, čym praz knižki doma.

Karystajciesia sučasnymi mietadami 

Isnuje šmat elektronnych resursaŭ, zdolnych zrabić navučańnie zamiežnaj movie cikaviejšym. Pasprabujcie, naprykład, skarystacca dla hetaha mabilnymi dadatkami: adzin z samych viadomych — heta Duolingo, ale vy biez prablem znojdziecie jašče šmat varyjantaŭ. Plus takich płatform u tym, što jany dazvalajuć vam samastojna padbirać temp i robiać jaho praces padobnym da hulni. Narešcie, nie zabyvajcie i pra YouTube — tam možna znajści videazaniatki pa vielmi roznych movach.

Na jakoj movie napisana słova «Kachańnie»? TEST

48

3

3

5

9

12

Nashaniva.com