Tamara Padymaka i Maryna Kijaviec
Jak paviedamlajuć krynicy «Našaj Nivy», zatrymańni adbylisia siarod ludziej, jakija raniej paśpieli zaśviacicca ŭ palityčnaj aktyŭnaści ŭ 2020-2021 hodzie.
«Heta byŭ niejki rejd, bo za dzień zatrymali adrazu niekalki čałaviek. Pryčym vobšuki i zatrymańni ładzili nie miascovyja milicyjanty, a supracoŭniki HUBAZiKa ź Minska», — kaža adzin z našych surazmoŭcaŭ.
Viadoma taksama, što zatrymańni pravodzili supracoŭniki AMAPa i «Ałmaza» — ci to z Bresta, ci to ź Minska.
Padčas pieratrusaŭ u zatrymanych kanfiskoŭvali telefony, ćviordyja dyski i noŭtbuki. U kahości znajšli majku z Pahoniaj.
Miascovyja kažuć pra zatrymańnie dzieviaci čałaviek, ale nam viadomyja nie ŭsie imiony.
Dźviuch žančyn siońnia asudzili za raspaŭsiudžvańnie ekstremisckich materyjałaŭ (reposty z «Zierkała»). Tamary Padymaka dali 30 bazavych štrafu, Marynie Kijaviec — 29 bazavych. Jašče adnoj žančynie vypisali 15 sutak aryštu nibyta za niepadparadkavańnie.
«Jana vychodziła z domu. Padyšli mužčyny ŭ čornym, skazali: adčyniajcie kalitku. Jana spytała: vy chto, pa jakim pytańni? Piarečyła. U vyniku jany zajšli sami, ale ničoha nie znajšli i zatrymali jaje nibyta za niepadparadkavańnie», — raskazvajuć nam.
Pra los Aleny Pucykovič, da jakoj učora taksama prychodzili, dakładna nie viadoma. Ale, kažuć, jaje sabaku zastrelili.
Zatrymanych mužčyn buduć sudzić zaŭtra. Siarod ich Andrej Bieleńki — były namieśnik načalnika Ivanaŭskaha RAUS, jaki zvolniŭsia ź milicyi jašče da vybaraŭ. A taksama Andrej Dražyn — jon u 2020 hodzie atrymaŭ štraf u 1160 rubloŭ za bečebe-šyldu z nazvaj vulicy, jakaja visieła na jaho domie šeść hadoŭ.
Učora padčas pieratrusu na haražnaj bramie Andreja Dražyna zaŭvažyli namalavany hierb Pahonia, jaki tam mieścicca ŭžo kala 10 hadoŭ. Zahadali zafarbavać.
«Hetaja brama była niabačnaja jak z darohi, tak i z boku susiedziaŭ. Ale miascovym milicyjantam usio adno patelefanavali ź Minska i skazali, kab jany heta ŭsio zafarbavali. Paźniej pryjazdžali, kab spraŭdzić, ci vykanany hety zahad», — kažuć «Našaj Nivie».
