Fota: Ministerstva ličbavaj transfarmacyi Ukrainy.
Bieśpiłotnyja latajučyja aparaty majuć vialikaje značeńnie va ŭmovach sučasnaj vajny. Hałoŭnaja pieravaha — supraćdziejańnie vojskam praciŭnika va ŭmovach zachavańnia žyćcia vajskoŭcaŭ.
Pieršy kantrakt na zakupku prafiesijnych vajskovych dronaŭ-raźviedčykaŭ užo padpisany z Polščaj. Hetyja aparaty zdolnyja zachodzić na varožuju terytoryju na 60—100 kiłamietraŭ. Na pieršym etapie płanujecca zakupka 200 takich aparataŭ za košt achviaravańniaŭ ukrainskaha «Monabanka», a taksama čatyroch kamplektaŭ udarnych dronaŭ-kamikadze.
U ramkach prajekta «Armija dronaŭ», akramia dziaržaŭnaha finansavańnia i achviaravańniaŭ kamiercyjnych struktur, praduhledžany zbor srodkaŭ ad ukraincaŭ i zamiežnikaŭ, a taksama achviaravańniaŭ ad nasielnictva ŭ vyhladzie ŭžo hatovych dronaŭ dla patreb ŭkrainskaj armii. Za pieršyja tydni ŭdałosia sabrać užo dziasiatki miljonaŭ dalaraŭ. Pa zamovie Hienštaba ŭžo arhanizavana navučańnie pa śpiecyjalnaści «apieratar drona» 150 vajskoŭcaŭ.
Padčas navučańnia vajskoŭcy adpracoŭvajuć sapraŭdnyja palotnyja zadačy, navyki maskiroŭki, raspracoŭku taktyki, kiravańnie dronami i inšyja zadačy, jakija buduć vykonvać na froncie.
Na siońnia va Ukrainie dziejničajuć dziasiatki kamiercyjnych i hramadskich arhanizacyj pa vytvorčaści dronaŭ. Bolšaść ź ich za apošnija miesiacy zasiarodziłasia mienavita na zadavalnieńni patrebaŭ ukrainskaha vojska.
Adnym z adroźnieńniaŭ vajskovaha drona ad cyvilnaha źjaŭlajecca bolšy adpor upłyvam z boku stancyj radyjoelektronnaj baraćby (REB) praciŭnika. Ale vajskoŭcam patrebnyja i značna bolš prostyja cyvilnyja drony dla raźviedki pazicyj voraha na linii sudakranańnia i pieršapačatkovaha navučańnia piłotaŭ.
Padrychtoŭka adnaho piłota moža zaniać ad dvuch tydniaŭ da miesiaca. Košt takich aparataŭ vahajecca ŭ miežach ad 50 dalaraŭ za prosty cyvilny dron da 5—6 miljonaŭ dalaraŭ za «Bajraktar». Unutry hetaha dyjapazonu znachodzicca astatnija vajskovyja i cyvilnyja drony, u jakich majuć patrebu Uzbrojenyja siły Ukrainy.
Ukraincy prajavili vydatnuju vynachodlivaść u stvareńni i vykarystańni bieśpiłotnikaŭ na vajnie. Armija navučylisia bić pa rasijanach na vialikaj adlehłaści z dapamohaj samarobnych snaradaŭ, jakija baražujuć. Byli vypadki, kali drony kamiercyjnaha kłasa skidali zarady na abjekty rasijan.
Praŭda, za apošnija niekalki miesiacaŭ na Danbasie rasijanam udałosia naładzić srodki radyjoelektronnaj baraćby i dobra intehravać ich u svaje bajavyja apieracyi, što ŭskładniaje vykarystańnie dronaŭ ukraincami.
U vyniku kožny raz, kali Ukraina adpraŭlaje nievialiki dron z dapamohaj radyjokiravańnia, rasijskaja sistema radyjoelektronnaj baraćby padchoplivaje jaho i adrazu ci biare na siabie, ci prosta vyklučaje kamandnuju suviaź i prymušaje jaho viarnucca.
Jakoje tut moža być rašeńnie? Albo vykarystoŭvać bolš zaprahramavanych dronaŭ, albo brać na ŭzbrajeńnie drony-kamikadze, jakija mohuć źniščać rasijskija sistemy radyjoelektronnaj baraćby.
Druhaja prablema, ź jakoj moža sutyknucca inicyjatyva — heta źniasilenaść i stomlenaść ukrainskaha hramadstva. Vajna idzie piaty miesiac, Rasija praciahvaje rujnavać ukrainskija harady, pradpryjemstvy i ekanomiku, i daloka nie kožny moža ŭvieś čas padtrymlivać takija inicyjatyvy dy danacić na armiju miesiac za miesiacam.
Danaty i achviaravańni biznesu — kropla ŭ mory na fonie ŭsiaho maštabu patreb Ukrainy ŭ vajnie z Rasijaj.
