Pasolstva Rasii ŭ Šviejcaryi hatova źviarnucca ŭ pravaachoŭnyja orhany hetaj krainy z-za karykatur na Uładzimira Pucina, apublikavanych u šviejcarskaj haziecie Neue Zürcher Zeitung (NZZ). Pra heta havorycca ŭ liście na imia hałoŭnaha redaktara NZZ, apublikavanym na sajcie dypmisii ŭ subotu, 16 lipienia.
Padstavaj dla zvarotu staŭ materyjał, jaki vyjšaŭ u drukavanaj viersii vydańnia 9 lipienia i apublikavany na sajcie vydańnia 25 červienia. Artykuł byŭ pryśviečany miemam, źviazanym z vajnoj Rasii va Ukrainie. Siarod ilustracyj u padborcy jość vyjava Pucina z kłounskim nosam i malunkam viasiołki na tvary. Tvit supravadžajecca chešteham «Pucin — vajenny złačyniec».
Inšy tvit ŭ artykule pakazvaje Pucina ŭ jaho pracoŭnym kabiniecie na ŭnitazie. U padborku taksama ŭvajšła vyjava prezidenta Ukrainy Uładzimira Zialenskaha ŭ vobrazie Kapitana Amieryki — hieroja komiksaŭ Marvel, što ŭ rasijskim pasolstvie taksama paličyli niedarečnym.
«Zachavalisia videazapisy vielmi nieadnaznačnych «pierfomansaŭ» z udziełam budučaha prezidenta Ukrainy z zaškalvajučym uzroŭniem pošłaści, jakija vy lohka možacie znajści ŭ internecie. Adnak nie, u «NCC» jon namalavany ŭ vyhladzie mahutnaha «Žaleznaha čałavieka», — napisana ŭ zvarocie.
Pasolstva RF prystrašyła hazietu sudovym pazovam
«Małaviadomaja maładaja žurnalistka Łanhšvahier «pieraplunuła» ŭsich svaich tavaryšaŭ pa piaru, dadumaŭšysia supravadzić nibyta naiŭna-zachoplenaje sačynieńnie ab «kreatyŭnych» miemach ukrainskaj fabryki trolaŭ, jakaja znachodzicca za miažoj razumieńnia, karykaturaj rasiejskaha lidara z adsyłkami da kłaŭnady, ŁHBT-supolnaści i «vajennych złačyncaŭ», — havorycca ŭ liście rasiejskaj ambasady.
Jaho aŭtary taksama śćviardžajuć, što Pucin «źjaŭlajecca hłyboka vierujučym pravasłaŭnym čałaviekam i vystupaje za zachavańnie tradycyjnych chryścijanskich kaštoŭnaściaŭ u rasiejskim hramadstvie», a nie «prychilnikam ŁHBT-supolnaści». «U suviazi z čym viasiołka na tvary ni da čoha», — pišuć dypłamaty.
Vykarystanaje ŭ materyjale aznačeńnia «vajenny złačynca» ŭ adnosinach da Pucina dypmisija nazvała «biazdokaznaj pramoj abrazaj». «Pakidajem za saboj prava ŭ suviazi z hetaj i mahčymymi budučymi publikacyjami paklopnickaha i abraźlivaha charaktaru ŭ dačynieńni da vyšejšych słužbovych asob Rasii ŭ vašym vydańni źviartacca ŭ šviejcarskija pravaachoŭnyja orhany, u tym liku ŭ suviazi z parušeńniem pałažeńniaŭ art. 173 i 174 Kryminalnaha kodeksa Šviejcaryi (raspaŭsiud źviestak, jakija abražajuć honar i hodnaść trecich asob, a taksama paklop)», — papiaredzili aŭtary.