Fota: AR
Byłaja pieršaja rakietka śvietu Rodžer Fiederer abviaściŭ, što žadaje ŭ 2023 hodzie, u svaje 41, viarnucca ŭ tenis. Vialikamu futbalistu Kryšcijanu Ranałdu 37 hadoŭ, ale ž jon pa-raniejšamu žadaje hulać u Lizie Čempijonaŭ. Šviedski forvard Złatan Ibrahimavič niadaŭna padoŭžyŭ kantrakt z futbolnym «Miłanam», pry tym što jamu ŭvohule ŭžo 40, piša The Times.
Žančyny nie adstajuć: niamieckaja tenisistka Taćciana Maryja ŭ hetym hodzie zhulała ŭ paŭfinale Uimbłdona — joj zaraz 34 hady.
Biełaruskija spartsmieny taksama zdolnyja doŭha vystupać na prafiesijnym uzroŭni, ale ž šmat u jakich śfierach u Biełarusi hety ŭzrovień, kali paraŭnoŭvać jaho z suśvietnym sportam, nižejšy. U nas niama svaich Ranałdu dy Ibrahimavičaŭ, tamu našym atletam, kab vydzialacca svaim doŭhažycharstvam, čaściej za ŭsio dastatkova kiravacca praviłami zdarovaha ładu žyćcia i nie razburać svajo cieła, naprykład, złoŭžyvańniem ałkaholu.
A voś suśvietnym zorkam, kab zastavacca na ŭzroŭni, patrebnyja samyja novyja technałohii. My raskažam, jakija.
Padrychtoŭka da nahruzak
Kali chočaš daŭžej pakazvać vysoki vynik, vielmi važna praduchilać traŭmy i dobra adnaŭlacca paśla nahruzak. Kali nie dapuskać traŭmaŭ ci chacia b pravilna ich vylečvać, heta dazvalaje padoŭžyć spartyŭnuju karjeru na niekalki hadoŭ, i čym raniej pačynać hetyja praktyki, tym lepš.
Zamiest chutkaj raźminki pierad nahruzkami spartsmieny ciapier vykonvajuć kompleksy praktykavańniaŭ, indyvidualna raspracavanyja dla ich fizijaterapieŭtami. Jość futbalisty, jakija źviartajucca da ekśpiertaŭ, kab vyśvietlić, dzie ŭ ich domie pavinny być vokny, kab ich son byŭ lepšym. Bo jany viedajuć, što niedachop snu i stomlenaść rana ci pozna pryviaduć da traŭmy.
I adnaŭleńnie paśla ich
Raniej masaž byŭ hałoŭnaj zbrojaj, dziakujučy jakoj atlety adnaŭlalisia paśla nahruzak. U 2022 hodzie masaž usio jašče važny, ale źjaviłasia šmat inšych mietadaŭ adnaŭleńnia. Spartsmienam prapanujuć masažnyja valiki, kampresijnaje adzieńnie (jano pamianšaje bol u muskułach paśla nahruzak), pnieŭmatyčnyja kampresijnyja hietry, masažory roznaha kštałtu i šmat usiaho inšaha.
Dla ŭzrostavych atletaŭ vielmi važna paźbiahać nakapleńnia stomlenaści i palapšać praces adnaŭleńnia, bo tak jany padtrymajuć svaje spartovyja pakazčyki i źniziać ryzyku traŭmaŭ. Tenisisty Rafael Nadal i Endzi Miurej, naprykład, karystajucca dla hetaha kryjaterapijaj, kali cieła padviarhajuć na niekalki chvilin upłyvu tempieratury ŭ -160 hradusaŭ. Ličycca, što heta źnižaje zapaleńnie ŭ muskułach i paskaraje adnaŭleńnie.
Pravilnaje charčavańnie
Niekali ličyłasia, što najlepšaja ježa dla spartsmiena — stejk i syryja jajki, ale ciapier navukoŭcy viedajuć pra spartovaje charčavańnie našmat bolš za heta. Naprykład, viadoma, što z uzrostam ciełu ŭsio ciažej pieratvarać białok u muskuły, to-bok čym starejšy spartsmien, tym bolš białku jamu treba.
Čas spažyvańnia białku taksama maje značeńnie. Kali jeści białkovyja pradukty adrazu paśla intensiŭnych trenirovak, heta budzie spryjać naroščvańniu novych muskułaŭ, a białkovaja ježa pierad snom dapamoža sintezu białku va ŭzrostavych spartsmienaŭ.
Vitaminnyja dadatki nakštałt višniovaha ci burakovaha soku — jašče adzin sposab palepšyć adnaŭleńnie paśla nahruzak.
Praca ź psichołaham
Raniej spartovyja psichołahi byli redkaściu, ciapier ža jany dastupnyja amal kožnamu elitnamu spartsmienu. Meta pracy ź imi — spryjać raźvićciu psichičnych jakaściej, jakija mohuć dapamahčy dasiahnuć spartovaha doŭhažycharstva.
Psichołahi kažuć, što kali maładych spartsmienaŭ bolš cikaviać ich vyniki i ličby na tabło, ich uzrostavym kaleham bolš važna adtočvać svajo majsterstva. Taki padychod dapamahaje im vystupać na bolš stabilnym uzroŭni i dabivacca bolšaha, a taksama maksimalna pavialičyć čas, kali jany pakazvajuć svaje najlepšyja vyniki. Maładym spartsmienam treba vučycca takomu padychodu, bolš stałyja atlety časta prychodziać da jaho sami.
Adsočvańnie bijałahičnych paramietraŭ
Stać spartovym doŭhažycharam było b ciažej, kali b nie isnavała samych roznych sposabaŭ adsočvać bijałahičnyja pakazčyki arhanizma. Elitnyja spartsmieny sočać za paramietrami svaich trenirovak, snu, charčavańnia, straty vadkaściej, pulsu — i heta daloka nie poŭny śpis. Trenieram i miedykam patrebnaja hetaja infarmacyja, kab praanalizavać, jak cieła spartsmiena reahuje na roznyja nahruzki i faktary stresu i kab adaptavać treniroŭki adpaviedna hetamu.
Akramia hetaha, žančyny-spartsmienki sočać za ŭłasnym mienstrualnym cykłam, kab aceńvać vahańni ŭzroŭniu harmonaŭ. Hetyja charaktarystyki mohuć upłyvać na siłu i ruchavaść sustavaŭ, a źmieny hetych faktaraŭ zdolnyja pavialičyć imaviernaść traŭmy.
Siłavaja i fizičnaja padrychtoŭka
Stareńnie arhanizma šmat u čym upłyvaje na spartovyja pakazčyki. Ale najbolšy niehatyŭny efiekt daje spad adnaŭleńnia muskułaŭ u spałučeńni z pastupovaj strataj muskulnaj masy — praces, jaki nazyvajuć sarkapienijaj. Jon pačynajecca paśla 35 hadoŭ i moža vyklikać źnižeńnie mocy čałavieka i jaho spartovaj techniki.
Zvyčajna sarkapienija była pryčynaj taho, čamu atlety ŭ vidach sportu, dzie važnaja fizičnaja moc i technika, nakštałt futbołu ci tenisu, raniej dasiahajuć karjernaha piku, čym spartsmieny, jakija važnaja tryvałaść — naprykład, viełasipiedysty ci biehuny na doŭhija dystancyi.
Ale ž ź ciaham času źjavilisia bolš daskanałyja prahramy pa siłavoj i fizičnaj padrychtoŭcy, jakija dazvalajuć adterminavać spad spartsmiena. Hetyja indyvidualnyja prahramy nakiravanyja i na naroščvańnie muskulnaj masy, i na pavyšeńnie ŭstojlivaści da stomlenaści, kab spartsmien moh daŭžej treniravacca i navat palapšać svaje vyniki.
Piać pryčyn, čamu varta pierasieści na rovar
Hadami štodzień visieŭ na turniku i vyras na 8 santymietraŭ. Realna?
