Pa źviestkach rasijskich pravaabarončych arhanizacyj i ŚMI, z pačatku vajny vajskoŭcy z 22 rehijonaŭ paviedamili, što nie chočuć vajavać. «Viorstka» paličyła ŭsie vypadki, pra jakija stała viadomyja z kanca lutaha: pavodle adkrytych źviestak, jak minimum 1793 rasijaniny zajavili, što chočuć skłaści zbroju.
Infarmacyja pra 1 559 vypadkaŭ publikavałasia ŭ ŚMI. vajskoŭcy — nie mienš za 234 čałaviek — utrymlivajucca ŭ Łuhanskaj vobłaści, infarmacyja pra heta atrymanaja ad ich baćkoŭ.
Ad udziełu ŭ vajennych dziejańniach na terytoryi Ukrainy, pa źviestkach niekalkich rasijskich pravaabarončych arhanizacyj i ŚMI, na siońniašni dzień admovilisia žychary jak minimum 22 rehijonaŭ krainy. Siarod ich: Sachalinskaja, Čelabinskaja, Samarskaja, Naŭharodskaja, Rastoŭskaja, Pskoŭskaja, Arenburhskaja, Leninhradskaja, Smalenskaja, Razanskaja i Maskoŭskaja vobłaści, Krasnadarski, Staŭrapolski i Prymorski krai, Respubliki Buracija, Tyva, Chakasija, Dahiestan, Čačnia, Paŭnočnaja Asiecija, Kabardzina-Bałkaryja i Karačajeva-Čarkiesija. A taksama — žychary anieksavanaha Kryma i samaabvieščanaj Paŭdniovaj Asiecii.
Voś tolki niekalki najbolš viadomych i masavych vypadkaŭ:
U Krasnadarskaj rocie AMAP «Płastun» 12 bajcoŭ admovilisia pierasiakać miažu Ukrainy ŭ Krymie i abhruntavali heta niezakonnaściu zahadu. Paśla hetaha vajskoŭcaŭ zvolnili.
300 kantraktnikaŭ čaści ŭ Bujnaksku (Dahiestan) samavolna pakinuli miesca bajavych dziejańniaŭ z-za prablem z abmundziravańniem i ŭzbrajeńniem. Doma ich sustreli jak dezierciraŭ. Pad ciskam svajakoŭ i miascovych uładaŭ častka ź ich znoŭ pajechała va Ukrainu.
115 supracoŭnikaŭ Rashvardyi i jašče 24 vajskoŭcy z Kabardzina-Bałkaryi pakinuli pole boju. Paźniej ich zvolnili za «nizkija maralna-dziełavyja jakaści» i «niazdolnaść vykonvać bajavyja zadačy». Hetaje zvalnieńnie ŭsie jany abskardzili ŭ sudzie.
300 kantraktnikaŭ z samaabvieščanaj Paŭdniovaj Asiecii viarnulisia dadomu praź piać dzion paśla taho, jak pačali ŭdzieł u bajavych dziejańniach. Rašeńnie jany pryniali, kali adzin ź ich tavaryšaŭ pa słužbie padarvaŭsia na minie, a kamandavańnie zabaraniła zabrać jaho cieła.
80 kantraktnikaŭ i sałdat terminovaj słužby z Kryma admovilisia brać udzieł u vajnie.
Z Pskova admovilisia 60 vajskoŭcaŭ.
Jak minimum 42 čałavieki z Tyvy skłali zbroju, ale 29 ź ich praciahvajuć słužbu na inšych pasadach.
Jašče 11 bajcoŭ AMAP z Chakasii viarnulisia na radzimu z pola boju, kab zvolnicca sa słužby. Suprać žurnalista Michaiła Afanaśjeva, jaki napisaŭ pra heta, paśla raspačali kryminalnuju spravu. Ciapier jon znachodzicca ŭ SIZA.
12 lipienia va Ułan-Ude pryziamliŭsia samalot z 150 kantraktnikami, jakija padali rapart na admovu ad słužby. Nieŭzabavie paśla taho, jak fond «Svabodnaja Buracija» paviedamiŭ pra ich viartańnie, sajt Fonda zabłakavali.
Čytajcie taksama:
Rasijskich sałdat, što admovilisia vajavać, trymajuć u padvale pad Łuhanskam
