Arciom musiŭ vyjści na volu 29 červienia, adbyŭšy całkam termin pa spravie paškodžańnia mašyny supracoŭnika DVP Alaksandra Hiejca, ale hetaha nie adbyłosia — jaho ŭziali pad vartu pa novaj kryminalnaj spravie pa art. 369 Kryminalnaha kodeksa.
Arciom na sudzie vinu nie pryznaŭ i zajaviŭ, što novaja kryminalnaja sprava — heta pomsta načalnika kałonii № 15, dzie jon padviarhaŭsia katavańniam i źbićciu. U vyniku sudździa Ksienija Nikifarava skłała prysudy pa dvuch kryminalnych spravach (navat pa toj, pa jakoj Arciom całkam adbyŭ termin) i pryznačyła palitviaźniu ŭ sumie try hady kałonii, dva ź jakich jon adbyŭ. Arciomu zastałosia adbyvać jašče kala hoda źniavoleńnia.
«Načalnik kałonii skazaŭ, što «ja ciabie ŭ spakoi nie pakinu i zrablu ŭsio, kab dadać tabie termin». «U mianie jość znajomyja sudździa, prakurory», — heta jahonyja słovy. I kali sprava pa art. 411 KK [złosnaje parušeńnie režymu] była prypyniena, to toj ža śledčy, jaki vioŭ spravu pa art. 411 KK, pačaŭ pravierku pa art. 369 KK».
Nahadajem, Arcioma Aniščuka asudzili da dvuch hadoŭ pazbaŭleńnia voli i etapavali ŭ mahiloŭskuju kałoniju №15, dzie jon zaznaŭ katavańni. Palitviaźnia ŭ vieraśni pieraviali z mahiloŭskaj kałonii ŭ babrujskuju kałoniju № 2, dzie jon taksama padviarhaŭsia cisku. Tam Arciom daviedaŭsia, što suprać jaho mahiloŭskimi śledčymi pravodzicca pravierka pa fakcie «abrazy milicyjaniera ŭ zakrytym telehram-čacie».
28 červienia, za dzień da vyzvaleńnia, Arciomu ŭručyli pastanovu prakurora Mahilova, zhodna ź jakoj Aniščuka uziali pad vartu ŭžo pa novaj kryminalnaj spravie. Pry hetym na momant ździajśnieńnia «złačynstva» dziejničała staraja redakcyja artykuła 369 Kryminalnaha kodeksa, jakaja nie praduhledžvała mieru strymańnia ŭ vyhladzie ŭtrymańnia pad vartaj.
Novaja sprava nibyta była zaviedzienaja 27 śniežnia 2021 hodu, i tolki 20 maja Arciom staŭ padazravanym pa joj. 8 červienia jaho etapavali ŭ śledčuju turmu № 4 na 10 dzion dla «praviadzieńnia śledčych dziejańniaŭ», dzie jamu vystavili abvinavačvańnie pa art. 369 KK. Spravu zaviali za paviedamleńnie ŭ zakrytym telehram-čacie ŭ vieraśni 2020 hoda, ale pad vartu jaho vyrašyli ŭziać ciapier — kali Arciom musiŭ vyjści na volu.
Čytajcie pa spasyłcy: Palitviazień praz dva tydni musiŭ vyjści na volu. Kab jaho nie vypuskać, zaviali novuju kryminalnuju spravu
