Ina. Skryn ź videa
Na trecim hodzie šlubu Ina z mužam vyjavili, što niejak u ich nie kleicca. Dakładniej, kleicca ŭsio, akramia paścieli. Akazałasia, pa słovach Iny, u ich «roznyja pałavyja kanstytucyi»: «Mnie treba bolš seksu, čym jamu. Značna bolš».
Inie zdavałasia, što ź joj niešta nie tak. Potym zdavałasia, što heta z mužam niešta nie tak. Potym «kinulisia ŭ teoryju sieksałohii», kab razabracca, jak heta pracuje.
Kali pryjšło razumieńnie, što ŭ ich roznyja apietyty da seksu, paŭstała pytańnie, jak być. Tamu što «astatniaje ŭ adnosinach było šykoŭna».
Čamu nie raźvialisia? Ina kaža, što jany «amal raźvialisia» try razy. Ale vyrašyli, što navat kali znajści kahości lepšaha ŭ seksie, to «niejkaja fihnia» moža być u čymści inšym. Čamu nie pasprabavać spačatku tut niešta vypravić?
Adkrytyja adnosiny
Ina ź siamji, dzie baćki žyvuć, što nazyvajecca, usio žyćcio adzin z adnym. Jana kaža, što nie mahła ŭjavić, što ŭ jaje pary źjavicca niechta jašče. Ale adnojčy natknułasia na adkaz psichołaha na pytańnie, što rabić, kali ŭ partnioraŭ roznyja patreby ŭ seksie. Toj skazaŭ, što niekatoryja «adkryvajuć» šlub i «dabirajuć ubaku».
Muž pahadziŭsia pasprabavać. Ale spačatku stratehija muža była takaja — «rabi jak chočaš, ale ja nie chaču ničoha viedać». «Dziŭna, kaniečnie, ničoha nie viedać, kali ty viedaješ, što niešta moža być».
U vyniku pieršaja ž sproba zavieści seksualnaha partniora abiarnułasia tym, što muž «spaliŭ»: Ina skazała, što načavała ŭ siabroŭki, muž patelefanavaŭ siabroŭcy, taja ničoha nie viedała. «Usio było maksimalna kamična, jak pa padručniku».
Paśla hetaha vypadku para «pieriedamoviłasia» — tajamnicy tut nie pracujuć, nie budziem stavić adzin adnaho ŭ niajomkaje stanovišča, usie ŭsio razumiejuć.
Ina papiaredžvała muža, kali jana budzie adsutničać. Ale i joj takija ekśpierymienty davalisia niaprosta. «To mnie zdavałasia, što ja jamu zdradžvaju, to ja supakojvała siabie, što mnie dazvolili. Z maralnaha punktu hledžańnia, heta niaprostaje pytańnie akazałasia raptam», — kaža jana.
Praź niekalki miesiacaŭ Ina sustreła chłopca, jakoha spačatku nie razhladała ŭ jakaści partniora. Adnak vyjaviłasia, što im razam dobra.
I jana vyrašyła, što «adkrytyja» adnosiny «zakryvajucca», tamu što heta «hiemarna» — kožny raz daviedvacca, što za čałaviek tvoj novy partnior. Dziaŭčyna spyniłasia na dvuch partniorach, adzin ź ich — muž.
«Na toj momant heta jašče nie była jak takaja poliamoryja, — kaža Ina, — tamu što poliamoryja ŭklučaje słova «amor», zakachanaść. Na toj ža momant heta byli prosta palihamnyja adnosiny z majho boku, u mianie nie było nijakich pačućciaŭ da novaha partniora i nie mierkavałasia, što jany ŭźniknuć. Mužu taksama było spakajniej, što heta budzie adzin čałaviek, a nie ja z mužykami raźjazdžaju pa horadzie. Nu ci nie z mužykami, uličvajučy maju biseksualnaść», — dadaje jana.
Muž taksama moh schadzić na spatkańni. Inie važna było viedać, navošta jamu heta. «Tamu što sa mnoj było ŭsio zrazumieła: ja nie dabiraju nieabchodnaje mnie, a jamu mianie było dastatkova, tamu mnie było cikava, navošta jamu niechta jašče».
Poliamoryja
Z novym partnioram ekśpierymientavać było praściej. Dajšli da BDSM. «Heta bolš pra davier, pra emacyjnuju zaležnaść, pra vialikuju ŭklučanaść. Akazałasia, što emacyjny składnik taksama pačynaje źjaŭlacca ŭ hetych adnosinach».
Fota: pixabay.com
Ina adčuła, što ŭ jaje źjaŭlajucca pačućci da druhoha partniora.
Heta była najbolš składanaja razmova z mužam paśla toj, samaj pieršaj, kali para dumała, jak vyrašać prablemu. Mužu zdavałasia, što jamu naohuł nie zastaniecca miesca ŭ hetych adnosinach. Tam budzie seks, viečarynki, zabavy, a doma — sumny pobyt.
I niejki pieryjad tak i było. «Pierada mnoj adkryŭsia ceły śviet ekśpierymientaŭ», — kaža dziaŭčyna.
Muž prasiŭ raspaviadać, što adbyvajecca, što jana sprabuje, što joj padabajecca, u čym jon moža paŭdzielničać, što jon moža ź joju padzialić. «Dla nas heta było jakaram, kab nie hublałasia taja samaja blizkaść».
Abodva mužčyny čuli adzin pra adnaho. Adnojčy jany navat sustrelisia — pierakidvali rečy Iny z mašyny adnaho ŭ mašynu druhoha. Prosta pavitalisia, i ŭsio.
Praz try hady jany razam adznačali Novy hod u vialikaj kampanii. Častka siabroŭ navat viedała, chto hety čałaviek.
U siamji źjaviŭsia «miemasny čacik na traich», tamu što Ina stamiłasia kidać «miemasiki» na dva baki.
Jakaja była reakcyja znajomych?
Siabroŭki skazali: dyk, moža, i nie toj, i nie druhi? Moža, treci patrebny? U chodzie abmierkavańniaŭ pytańnie źviałosia da inšaha: navošta dva?
«U kožnym ź ich mnie padabałasia toje, što nie moža spałučacca ŭ adnym čałavieku. Umoŭna, u mužy ja caniu stabilnaść, razumieńnie taho, što heta maja apora. A z partnioram naadvarot — u mianie byli takija absalutna padletkavyja adnosiny, dzie jon — volny mastak, viečna niama hrošaj, zatoje my budziem palić na bałkonie, sustrakać śvitanki. Heta nie moža spałučacca ŭ adnym čałavieku», — tłumačyć jana.
Z časam paŭstała inšaja prablema: Ina stała žyć na dva damy.
«U mianie byŭ niejki punkcik, ja sprabavała chłopcaŭ vyraŭniać u pravach, choć pieršapačatkova heta była durnaja ideja: muž, zrazumieła, mieŭ bolš pryjarytetny status i aficyjna, i ŭ maim ujaŭleńni. Ale ŭ tydni siem dzion, nijak nočy napałovu nie dzielacca. I heta nasamreč była prablema. Tamu što ŭ toj momant mnie stali pradjaŭlać: niešta ty tam stała zastavacca čaściej, a ŭ nas byli takija i takija płany».
Fota: pixabay.com
Jak znachodzić čas na dvaich partnioraŭ?
Ciažka. «Dźvie štuki manahamnych adnosin, hruba kažučy. Kali adbyvajecca svarka z hetaha boku, ciažka jaje nie ŭnieści svaim nastrojem, jašče niejak u inšyja adnosiny. Ciažka nie ŭklučyć partniora ŭ abmierkavańnie kanfliktu ź inšym partnioram: «Nu, skažy, što ja ž maju racyju».
Reŭnaść
Z boku muža reŭnaści asabliva nie było. «A kali jana była, to my jaje prahavorvali, što jaho chvaluje, čamu, što my možam z hetym zrabić. Z boku druhoha partniora reŭnaści było značna bolš, tamu što jon zahadzia byŭ u bolš projhryšnaj situacyi, jamu zaŭsiody mianie było mała. Jon — prychilnik manahamnych adnosin. U jaho nie było inšych adnosin».
Muž chadziŭ na spatkańni, ale dalej spatkańniaŭ, miarkuje Ina, sprava nie dachodziła. Jana taksama adčuvała reŭnaść. «I heta taksama byŭ momant prahavorvańnia».
Ina kaža, što ŭ adnosinach lohka stracić siabie. I ŭ manahamnych, kali ludzi imknucca źlicca da «my». I ŭ takich palihamnych. «Kali ciabie pieraciahvajuć jak koŭdru, znajści siabie i zastacca ŭ svaich patrebach vielmi ciažka». Pa dapamohu jana źviartałasia da psichaterapieŭta.
Parady
Ina daje parady tym, chto choča pasprabavać poliamornyja adnosiny, kab uvachodžańnie i vychad ź ich byli bolš lohkimi.
Treba zrazumieć, navošta vam heta, jakuju metu vy stavicie. Mała kamu nasamreč patrebnaja poliamoryja. Čaściej za ŭsio heta žadańnie ekśpierymientu. Kali heta sapraŭdy toje samaje adčuvańnie, što i toj, i inšy čałaviek važnyja, to heta padobna da poliamoryi.
Treba adkazać na pytańnie, vam z hetym dakładna budzie okiej? Usim?
Treciaja parada. Treba vyznačyć farmat adnosin. Kali čakańnie i realnaść razychodziacca, heta składana razrulvać, asabliva kali jość try čałavieki, i kožny dumaŭ, što jano budzie niejak inakš.
«Sumujučy ŭsie parady, hałoŭnaje — heta ŭmieńnie razmaŭlać, viedać, što vam treba, što partnioru treba. Jak i lubyja adnosiny, tolki ŭ padvojnym pamiery. Pavodle majho dośviedu, heta nie byŭ pieryjad blizkaści z mužam. Heta byŭ kampramis, a kampramis heta takaja štuka, kali drenna i tamu, i inšamu», — niečakana reziumuje jana.
Ina, nie raskryvajučy padrabiaznaściaŭ, kaža, što hetaja historyja skončyłasia. Ale zapeŭnivaje, što poliamoryja dla jaje šlubu «spracavała na toj momant».
Čytajcie taksama:
«Jon nie viedaŭ, što mnie padabajucca dziaŭčaty». Biseksuałka raskazała pra svoj dośvied
Intymny pirsinh palapšaje arhazm? Asabisty dośvied dziaŭčyny
«Zamiest partniora ŭjaŭlaju inšaha čałavieka. Čamu?» Zadajem niajomkija pytańni pra seks
