Siarhiej Siarhiejeŭ — architektar i dyzajnier z 25-hadovym stažam. Prajektavaŭ pryvatnyja damy ŭ Ispanii, ZŠA, Rasii. Mabyć, jaho možna nazvać ekśpierymientataram: niekatoryja tvareńni admysłoŭca sapraŭdy nie nazavieš standartnymi. Adno z apošnich — malusieńkija apartamienty płoščaj usiaho 4 kvadratnyja mietry.
— U Sankt-Pieciarburhu davoli šmat apart-kompleksaŭ. Pamiaškańni ŭ ich vyhladajuć jak zvyčajnyja kvatery, ale jurydyčna źjaŭlajucca kamiercyjnymi abjektami, tamu ŭ ich nielha prapisacca. Ale žyć i pracavać možna. U adnym takim budynku ja znajšoŭ nievialikuju kładoŭku. Vyśvietliłasia, što da jaje možna padvieści kanalizacyju i vientylacyju. U vyniku nabyŭ jaje za $5000 i stvaryŭ interjer, raźličany na adnaho čałavieka, — raspaviadaje Siarhiej.
Za košt vysokich trochmietrovych stolaŭ dyzajnieru ŭdałosia źmiaścić u prastoru dva pavierchi. Na pieršym raźmiaščajecca kuchnia ź plitoj (schavanaja ŭ vysoŭnaj skryni), mikrachvaleŭkaj, chaładzilnikam i pracoŭnaj pavierchniaj. Jašče tut jość maleńki stolik i kresła, a za dźviaryma chavajecca sanvuzieł z dušam (zrobleny pa pryncypie hiermietyčnaj kapsuły). Nu a na druhim paviersie ŭstanoŭleny paŭnacenny łožak pamieram 1,40 na 2 mietry.
Pa słovach Siarhieja, jon patraciŭ na ramont bolš hrošaj, čym płanavaŭ, dy i pa terminach usio raściahnułasia na piać miesiacaŭ zamiest dvuch. Usio tamu, što ŭsiaredzinie moh pracavać usiaho adzin budaŭnik.
— Paśla taho jak ja vystaviŭ abjekt na prodaž, jaho nabyli na praciahu tydnia prykładna za $10 000. Nakolki ja viedaju, novy ŭładalnik budzie zdavać jaho turystam.
U 2019 hodzie Siarhiej razam sa svajoj dziaŭčynaj kupiŭ adnušku ŭ «Minsk-Śviecie» i znoŭ samastojna zajmaŭsia joju.
— My žyviom na try krainy, i kvatera ŭ Minsku pavinna była stać adnoj z kropak, dzie my možam spynicca. Nam padabaŭsia hety rajon, tut usio davoli chutka raźvivajecca: adkryvajucca kramy, restarany. Možna ledź nie ŭ tepcikach spuskacca na kavu — vielmi zručna.
Atrymanyja 44,5 «kvadrata» čarnavoha azdableńnia na 22-m paviersie novaha vyšynnaha doma abyšlisia pary ŭ $65 000 pa kursie. Nastupnyja miesiacy adnapakajoŭka stajała niekranutaj — u Siarhieja nie chapała na jaje času. Znajści jaho «dapamoh» karanavirus.
— Ja nakidaŭ ideju i pryjechaŭ jaje ŭvasablać. Bolšuju častku rabot ja vykanaŭ svaimi rukami: tynkavaŭ i farbavaŭ ścieny, układvaŭ plitku, majstravaŭ podyum i korpusnuju meblu. Dziakujučy hetamu, zekanomiŭ prystojnyja hrošy.
Siarhiej pryznaŭsia, što jamu padabajecca pieraŭtvarać nievialikija prastory, u jakich, na pieršy pohlad, niemahčyma štości raźmiaścić.
— Ludzi nabyvajuć kvatery, u jakich 15-20% płoščy źjadaje ich nieracyjanalnaje vykarystańnie. Tamu, pradumvajučy płaniroŭku, ja starajusia, kab kožny kvadratny mietr byŭ zadziejničany. Va ŭłasnym žylli ja chacieŭ zrabić maksimalnuju kolkaść funkcyjanalnych zon. Tut jość i kuchnia sa stałovaj i barnym kutkom, i spalnia z haścinaj. Heta dastatkova šmat. A za košt vialikich voknaŭ i šklanych pieraharodak stvarajecca adčuvańnie, što kvatera kudy prastarniejšaja, čym jość nasamreč.
Vizualna pavialičvajuć pamiaškańnie i ciomna-šeryja stoli pad bietonnyja pierakryćci, jakija kantrastujuć ź biełymi ścienami. Heta davoli biudžetny i prosty sposab dadać pakoju niedastatkovaj vyšyni.
— Ścieny častkova pafarbavanyja, častkova aformlenyja pad dekaratyŭnuju cehłu. Spačatku ja sprabavaŭ zrabić adbitak z dapamohaj śpiecyjalnaha silikonavaha valika, ale z hetaha ničoha nie vyjšła. Tady ja kupiŭ tannuju hipsavuju sumieś, nanios jaje špatalem (prykładna 5 mm u taŭščyniu), daŭ paŭhadziny padsochnuć, a paśla kavałkam armatury vyrazaŭ kontury cahlin i krychu ich šlifavaŭ. Atrymałasia pryhoža.
Pa ŭsioj kvatery na padłozie vykładzieny łaminat, a ŭ vannym pakoi — plitka (z padahrevam).
Adnym z važnych dyzajnierskich rašeńniaŭ Siarhiej ličyć raźmiaščeńnie kuchni prama ŭ kalidory. Takim čynam jamu ŭdałosia zachavać dadatkovyja mietry dla inšych zon.
— Istotnym plusam źjaŭlajecca toje, što padčas hatavańnia vy zastajaciesia ŭ kantakcie z haściami, jakija mohuć siadzieć choć u haścinaj, choć u spalni. Pry hetym ad ich vačej schavanyja takija niepryvabnyja elemienty, jak, naprykład, myjka z brudnym posudam.
Kuchonny harnitur architektar raspracoŭvaŭ samastojna, a źbirali jaho hrodzienskija mebielščyki. Choć hety praces i adbyvaŭsia na adlehłaści, upisałasia ŭsio idealna.
— Ja praduhledzieŭ u kvatery nie tolki abiedziennuju hrupu, ale i barnuju stojku, kab možna było stvarać sabie rozny nastroj. Za barnaj stojkaj možna papracavać abo prosta vypić bakał vina, a za stałom — sabrać haściej.
Asobnaj uvahi zasłuhoŭvaje haścioŭnia, jakaja ŭzvyšajecca na draŭlanym pamoście.
— My daviedalisia, što na apošnim paviersie stoli vyšejšyja, čym na astatnich. I hetyja lišnija 30 sm ja transfarmavaŭ u podyum. Jon jakraz ustaŭ va ŭzrovień z voknami, i ciapier usio vyhladaje tak, byccam jany vyrastajuć z padłohi, niby francuzskija bałkony.
Darečy, u podyum ubudavany muzyčny centr, a jašče tut praduhledžana niekalki lukaŭ, za jakimi chavajucca miescy dla zachoŭvańnia.
Naohuł, z hetym u kvatery ŭsio ŭ paradku, zapeŭnivaje architektar: šafy dla rečaŭ majucca i ŭ piarednim pakoi, i navat za draŭlanaj panellu ŭ spalni.
— Čym mienš rečaŭ pierad vačyma, tym lepš vyhladaje dyzajn.
Mahčyma, mienavita pa hetaj pryčynie ŭ adnapakajoŭcy minimum dekoru. Zatoje jon ekskluziŭny: usie karciny pisaŭ asabista Siarhiej.
Aśviatleńnie ŭ kvatery taksama pradumanaje: jość niekalki scenaryjaŭ padśvietki: bolš jarki i ŭračysty režym ci bolš intymny.
Na ramont abjekta hieroj patraciŭ 4 miesiacy i kala $35 000 u ekvivalencie. Kaža, što ciapier za takija hrošy realizavać taki prajekt niemahčyma: usio ž budmateryjały istotna padaražali.
U ciapierašni čas adnapakajoŭka ŭ «Minsk-Miry» pradajecca za 114500 u. a.
— U apošni čas my redka byvajem u Biełarusi, tamu vyrašyli, što kvatera nam tut ni da čaho. Tym bolš my ŭžo paśpieli atrymać asałodu ad jaje i hatovyja ruchacca dalej. Treba prydumlać niešta novaje, — dadaje Siarhiej.
U Raŭbičach na prodaž vystavili asabniak za 2 młn dalaraŭ. Voś jak vyhladaje siońnia samy darahi dom Biełarusi znutry FOTA
Cikavaje architekturnaje rašeńnie: u starym budynku ŭ Breście adkryli kramu, zachavaŭšy aŭtentyčnyja ścieny
Jak pradać nieruchomaść u Biełarusi, kali vy znachodziciesia za miažoj?
hospadzie... chto ŭ vas zahałoŭki prydumvaje? nu peŭna toj, kamu nieviadomy fantastyka i dyzajn