Azierbajdžanskija vajskoŭcy
«3 žniŭnia prezident (Nahorna-Karabachskaj Respubliki) Araik Aruciunian padpisaŭ ukaz, zhodna ź jakim z 3 žniŭnia 2022 hoda ŭ respublicy abvieščany častkovuju vajskovuju mabilizacyju», — havorycca va ŭkazie, apublikavanym na sajcie Aruciuniana.
Pa źviestkach ministerstva abarony niepryznanaj Nahorna-Karabachskaj respubliki, kala 14:00 azierbajdžanskija padraździaleńnia «vykarystali ŭdarnyja bieśpiłotniki, u vyniku čaho śmiarotna paranieny adzin vajskoviec». Paźniej tam paviedamili pra ranieńnie jašče vaśmiarych. Uvohule karabachski bok paviedamiŭ pra jak minimum adnaho zahinułaha i vaśmioch paranienych, a ŭ Azierbajdžanie pierad tym zajavili pra adnaho zahinułaha vajskoŭca.
U 2020 hodzie Nahorny Karabach užo byŭ u centry šaścitydniovaj vajny, jakaja zabrała žyćci bolš za 6500 čałaviek, pierš čym zaviaršyłasia pahadnieńniem ab spynieńni ahniu pry pasiarednictvie Rasii. Pavodle tahačasnaj damovy, Armienija pieradała Azierbajdžanu častku terytoryj, jakija kantralavała dziesiacihodździami, a Rasija nakiravała kala 2000 «miratvorcaŭ» dla nahladu za pieramirjem.
Ciapier Azierbajdžan patrabuje poŭnaj demilitaryzacyi Nahornaha Karabacha i vyvadu armianskich vajskoŭcaŭ. Pra vyvad rasijskich «miratvorcaŭ» havorki pakul nie viadziecca.
«Azierbajdžanskaja Respublika nieadnarazova zajaŭlała, što, nasupierak trochbakovaj dekłaracyi, prysutnaść Uzbrojenych siłaŭ Armienii i niezakonnych armianskich uzbrojenych farmavańniaŭ na terytoryjach Azierbajdžana, dzie časova dysłakavanyja miratvorcy Rasijskaj Fiederacyi, zastajecca krynicaj niebiaśpieki. Demilitaryzacyja hetych terytoryj, poŭny vyvad adtul armianskich vojskaŭ i razzbrajeńnie niezakonnych armianskich uzbrojenych farmiravańniaŭ absalutna nieabchodnyja», — zajaviła Minabarony Azierbajdžana.
