28 lipienia ŭ prakramloŭskich sacyjalnych sietkach było raspaŭsiudžana dva videa katavańniaŭ i pakarańnia ŭkrainskaha vajennapałonnaha. Videa spačatku byli raźmieščanyja ŭ rasijskim Telegram-kanale «Hruz 200», pryśviečanym stratam siarod ukrainskich sałdat, a zatym jany źjavilisia ŭ telehram-kanale «Rosič», kiravanym hrupaj najmitaŭ-nacyjanalistaŭ.
Roliki spačatku vitalisia administratarami kanała i bolšaściu karystalnikaŭ, jakija ich kamientavali, pakul praź niekalki hadzin ad ich raptam nie admovilisia, jak ad «vierahodnych fejkaŭ», nibyta ŭkinutych u prarasijskija kanały ahientami Ukrainy z metaj dyskredytacyi rasiejskaj armii.
Na kadrach vidać, jak sałdaty ŭ rasijskaj vajskovaj formie katujuć nažom źviazanaha ŭkrainskaha vajennapałonnaha, ździekujucca ź jaho, a zatym karajuć śmierciu strełam u hałavu.
Hałoŭnaha ŭdzielnika hetych katavańniaŭ, jaki krasavaŭsia ŭ kaŭbojskim kapielušy, užo sprabavali znajści roznyja ŚMI, ale ich sproby identyfikacyi byli pamyłkovymi.
Videazapis katavańniaŭ i pakarańnia vajennapałonnaha składajecca z dvuch videa, pa jakich składana vyznačyć miescaznachodžańnie i čas, ale zatoje jość niamała inšych detalaŭ, padrabiazna praanalizavanych Conflict Intelligence Team. Jany praanalizavali i kapialuš złačynca z uzoram u vyhladzie marskich rakavinak i kistačkami nad palami, i čorny branzalet na levaj ruce zabojcy, i bieły aŭtamabil z čornaj litaraj «Z», namalavanaj bałončykam na pasažyrskich dźviarach, i ŭkrainskaja vajskovaja kašula. Usio heta supastaŭlałasia z roznymi inšymi dastupnymi videa.
Ale, viadoma, hałoŭnaje, što dazvoliła vyznačyć złačynca i paraŭnać jaho na roznych videa, — heta jahony tvar. Praź jaho analiz z dapamohaj roznych kampjutarnych prahram udałosia vyznačyć, što sadysta-zabojcu zavuć Ačur-Suhie Monhuš, i jon tuviniec.
Paśla taho žurnalistam udałosia znajści kantakt i pahavaryć z Ačur-Suhie Monhušam. I choć toj admaŭlaŭ svajo dačynieńnie, jahonyja pakazańni kančatkova paćvierdzili jahonuju vinu, bo ŭ jaho śviedčańniach było šmat supiarečnaściaŭ i prosta chłuśni jakaja asprečvałasia faktami.
Tak, naprykład, Ačur-Suhie zajaviŭ, što taki kapialuš, jak u jaho, jość u vielmi mnohich ludziej, a aŭtamabil, jaki fihuruje na videa z katavańniami, jon nikoli nie bačyŭ. Pry hetym Monhuš pryznaŭ i niekalki razoŭ paŭtaryŭ, što na adnym ź videa, zroblenym na terytoryi zavoda «Azot», sapraŭdy jon.
Takim čynam, dziakujučy zvanku atrymałasia, pa-pieršaje, paćvierdzić, što čałaviek ź videa — sapraŭdy Ačur-Suhie Monhuš. U toj ž čas taksama vidavočna, što Monhuš kazaŭ niapraŭdu, kali admaŭlaŭ, što mašynu ź litarami «Z» jon nikoli nie bačyŭ, bo jana vyrazna bačnaja na videa, sapraŭdnaść jakoha Monhuš nie admaŭlaje.
Taksama jon śćviardžaje, što nie maje nijakaha dačynieńnia da bataljona «Achmat», ale prysutničaje na fota z «achmataŭcami», u tym liku z terytoryi Čačni. Kaža, što nikoli nie trymaŭ u rukach zbroju, ale na svajoj staroncy ŭ «Ukantakcie» (ciapier vydalenaj) vyviešvaŭ fota sa zbrojaj.
Da razmovy z Monhušam było dakładna ŭstanoŭlena, što čałaviek na videa «achmataŭcaŭ» z zavodu «Azot» — heta toj ža samy, chto fihuruje na videa z katavańniem, a taksama toje, što vielmi padobny na hetaha kata čałaviek pa proźviščy Monhuš vajavaŭ u «Achmacie», ale zastavałasia hipatetyčnaja mahčymaść, što ŭ «Achmacie» vajujuć dva vielmi padobnych čałavieka manhałoidnaj źniešnaści.
Adnak pryznańnie Monhuša ŭ tym, što čałaviek u kapielušy na videa z terytoryi zavoda «Azot» — heta jon, vyklučaje ŭsialakija sumnievy, što i sadyst u kapielušy jon taksama.
