Maksim Bahdanovič viadomy tym, što samastojna pastupiŭ u Harvard i ciapier hatovy padzialicca kansultacyjaj, jak padrychtavacca da pastupleńnia ŭ amierykanskija ŭniviersitety.
Jon źviartajecca da vučniaŭ 9—10 kłasaŭ i ich baćkoŭ, abiacajučy prakansultavać u telehramie luby čas.
«Hałoŭnaja ŭmova — kab patencyjnyja abituryjenty pisali samastojna (a nie ich baćki!) i pažadana pa-biełarusku. Tamu kali vy baćka, to možacie pakazać hety post svajej dačcy ci synu i skazać, što jość taki Maksim i jon budzie rady dapamahčy.
Pryncypova biaspłatna. Lepš za ŭsio pisać ciaham nastupnych dvuch tydniaŭ uviečary pa minskim časie. Ź vieraśnia pačynajecca vučoba i budzie krychu składaniej. Ale ŭsio roŭna pišycie!
Ja natchniŭsia tym, što mnie siońnia z majoj himnazii napisała talenavitaja i matyvanaja vučanica 8-aj kłasy i skazała, što choča pastupić u Harvard. Z razmovy mnie padałosia, što ŭ jaje jość usio, što nieabchodna: matyvacyja i čas. Nasamreč bolš i nie treba — inšaje prychodzić z pracaj. Ja ŭpeŭnieny ŭ jaje atrymajecca.
Mnie zusim nie škada 15 chvilin svajho času, kali ŭ vyniku jeść vierahodnaść źmianić žyćcio biełarusa tak ža radykalna, jak Harvard źmianiŭ mianie».
«Univiersitet staŭ dla mianie nie toje što sacyjalnym liftam, a cełaj katapultaj i ja nievierahodna za heta ŭdziačny. Pieradaju estafietu», — napisaŭ jon.
Ja budu rady ŭ pierapiscy padkazać resursy dla padrychtoŭki da ekzamienaŭ, napisańnia ese, detali pracesu padačy, atrymańnia finansavaj dapamohi i hd.
Adzinaje, što mnie važna — kab čałaviek byŭ sam zamatyvavany, a nie baćkami. Ja i raniej tak čas ad času davaŭ parady tym, chto mnie pisali (i ŭžo zaraz niekatoryja ź ich vučacca na poŭnaj stypiendyi ŭ prestyžnych univiersitetach!), ale nikoli publična nie prapanoŭvaŭ. Vypraŭlajusia.
Mahčyma pa vyniku našych pierapisak napišu nievialički hajd i apublikuju tut. Ja dumaju što bolšaści talenavitych biełaruskich školnikaŭ ničoha nie pieraškadžaje pasprabavać i patencyjna źmianić svaje žyćcio i žyćcie našaj krainy da lepšaha. Usie mahčyma!» — dadaŭ jon.
