«Vialikaj papularnaściu karystałasia ideja siłavoha zrynańnia kiroŭnaha režymu ŭ Biełarusi.
Adkazam na hety zapyt palityzavanaj hramadskaści stała źjaŭleńnie ŭ Abjadnanym pierachodnym kabiniecie, stvoranym Śviatłanaj Cichanoŭskaj, dvuch siłavikoŭ (z čatyroch čalcoŭ). Asabliva vialiki rezanans vyklikała pryznačeńnie adkaznym za abaronu byłoha vajskoŭca, padpałkoŭnika Valeryja Sachaščyka, jaki nabraŭ u apošni čas papularnaść.
Vidavočna, što staŭka na siłu stała siońnia daminantnym trendam u apazicyjnym asiarodździ. I pryčyna hetaj źjavy zrazumiełaja.
Mirnyja sposaby ŭpłyvu na źmieny ŭ krainie nie pracujuć i ich prosta niemahčyma prymianić. Usie lehalnyja miechanizmy palityčnaj baraćby likvidavali. Ułady prosta nie pakidajuć hramadstvu inšych varyjantaŭ.
Taksama heta reakcyja na masavyja palityčnyja represii, jakija nie spyniajucca, a nabyvajuć novyja rysy. Adčaj, niespraviadlivaść, biaśsille pierad biezzakońniem zusim naturalna sparadžajuć prahu pomsty. I hetaja žorstkaść narastaje z abodvuch palityčnych fłanhaŭ. Takoje pradčuvańnie hramadzianskaj vajny.
Pryčym kult siłavoha scenaryja aryjentavany nie tolki ŭ budučyniu, ale i ŭ minuŭščynu, u 2020 hod. U sacyjalnych sietkach stała papularnaj vysnova, što, maŭlaŭ, taktyka mirnaha pratestu była pamyłkaj.
Jašče adna pryčyna takich nastrojaŭ palahaje ŭ tym, što ŭ 2020 hodzie ŭ palityčnaje žyćcio ŭstupiła značnaja častka ludziej, jakija raniej palitykaj nie cikavilisia. Jany drenna razumiejuć pryrodu palityčnych pracesaŭ i lohka paddajucca na scenaryja prostych rašeńniaŭ składanych prablem. Takim prostym rašeńniem im zdajecca siłavoje zrynańnie režymu Łukašenki.
Narešcie, vajna va Ukrainie pavysiła popyt na siłavyja sposaby baraćby. A źjaŭleńnie va ŭkrainskich uzbrojenych siłach padraździaleńniaŭ biełaruskich dobraachvotnikaŭ uvohule vyklikała ejfaryju ŭ palityzavanaj častki apazicyjnaha elektaratu.
Entuzijazm prychilnikaŭ siłavoha scenaryja trochi ździŭlaje. Maŭlaŭ, voś, narešcie znajšli čaroŭnuju pałačku, panaceju — i režym budzie zrynuty.
Pakolki budučynia nikomu nie viadomaja, to nielha vyklučać nivodnaha varyjantu. Usio mahčyma. Adnak u hetym vidavočnym akcencie na siłavyja sposaby baraćby jość i niehatyŭny bok.
Pa-pieršaje, heta ŭtapičnaść samoj idei siłavoha zrynańnia ŭłady Łukašenki ŭ sučasnych biełaruskich umovach. U palitycy niama ničoha bolš niebiaśpiečnaha, čym iluzii. Razmovy ab stvareńni niejkaha biełaruskaha vojska za miežami krainy — heta niesurjozna.
Pa-druhoje, militarysckaja rytoryka adpudzić ad apazicyi značnuju častku publiki, jakaja raniej joj spačuvała. Narod baicca hramadzianskaj vajny, heta naturalny instynkt samazachavańnia. I, vybirajučy pamiž hramadzianskaj vajnoj i režymam Łukašenki, bolšaść biełarusaŭ, peŭna, vybiera łukašenkaŭskuju dyktaturu.
Pa-treciaje, takija razmovy dapamahajuć uładzie raźviančać ideju mirnaha pratestu. Hałoŭny kanstrukt dziaržaŭnaj prapahandy ciaham dvuch hadoŭ palahaje ŭ tym, što ŭ 2020 hodzie była sproba hvałtoŭnaha miaciažu. Pa BT uvieś čas pakazvajuć karcinki niejkich epizodaŭ siłavoha sutyknieńnia demanstrantaŭ z AMAPam, padrabiazna aśviatlajuć sudovyja pracesy, u jakich ludziej abvinavačvajuć u hvałcie («terarystyčnaja hrupa Aŭtuchoviča», «zmova» Ziankoviča, Fiaduty i inš.). A tut i vydumlać ničoha nie treba: biary i pakazvaj frahmienty Vilenskaj kanfierencyi z razvahami pra hramadzianskuju vajnu, hvałtoŭnaje zrynańnie režymu. Heta ŭzmocnić žorstkaść represij, sudy pačnuć vynosić śmiarotnyja prysudy.
Pa-čaćviortaje, staŭka na siłu stavić u niajomkaje stanovišča zachodnich partnioraŭ. Adna sprava — dapamahać imknieńniu biełaruskaha narodu da svabody ŭ ramkach demakratyčnych miechanizmaŭ, i zusim inšaja — padtrymlivać siłavy varyjant prychodu apazicyi da ŭłady. Heta drenna spałučajecca ź jeŭrapiejskimi kaštoŭnaściami i ŭjaŭleńniami ab demakratyi.
