Voś što paviedamiła pra ceny na elektraenierhiju ŭ Estonii BT.
«Hadzina pracy televizara pry novych taryfach na elektryčnaść budzie kaštavać hramadzianam 20 jeŭracentaŭ, zaradka telefona — 8 centaŭ. Nibyta drobiaź, ale jość krynicy vydatkaŭ i bolš surjoznyja: praca chaładzilnika — 1 jeŭra 20 centaŭ, heta značyć amal 30 jeŭra ŭ dzień. Bojler dla padahrevu vady — 8 jeŭra ŭ hadzinu, pralnaja mašyna — amal 3 jeŭra. Sumarny rachunak budučaj zimy žurnalisty pryvodzić nie ryzykujuć, ale vidavočna, što ŭsie radaści žyćcia mohuć sabie dazvolić tolki miljaniery. Zvyčajnym estoncam pryjdziecca vybirać: albo chaładzilnik, albo duš, albo myćcio», — paviedamlajecca ŭ siužecie.
Kali vieryć prapahandystam z BT, za dzień karystańnia chaładzilnikam estoncu treba addać 30 jeŭra na elektraenierhiju, a ahułam za miesiac — 900 jeŭra.
Chłuśnia!
Žurnalisty estonskaha vydańnia Delfi i praŭda padličyli, kolki budzie kaštavać vykarystańnie elektrapryboraŭ. Ale hetyja padliki byli zroblenyja dla vielmi redkich pikavych pieryjadaŭ, kali cana na elektraenierhiju dasiahaje 4000 jeŭra za miehavat-hadzinu.
Paŭtorymsia, što 4000 jeŭra — rekordny pik. Siaredniesutačnaja ž cana enierhii ŭ Estonii našmat nižejšaja, u dziasiatki razoŭ. Naprykład, u niadzielu, 21 žniŭnia, jana skłała 143,87 jeŭra za miehavat-hadzinu. U načnyja časy cana na elektryčnaść uvohule padała da 44 centaŭ za miehavat-hadzinu. Heta ŭ 9 tysiač razoŭ mienš za pikavy pakazčyk!
Takim čynam, nijakija 900 jeŭra za elektraenierhiju na adzin chaładzilnik estoncy nie płaciać.
Ale čamu adbyvajucca takija skački cen, z 4000 jeŭra da 44 centaŭ?
Estonija źjaŭlajecca častkaj adkrytaha rynku elektraenierhii pad nazvaj Nord Pool, u jaki taksama ŭvachodziać Narviehija, Šviecyja, Finlandyja, Danija, Łatvija i Litva.
Tut varta patłumačyć, jak pracuje rynak elektraenierhii ŭ Skandynavii i krainach Bałtyi. Ceny na elektraenierhiju tut rynkavyja, jany vyznačajucca na biržy i mianiajucca kožnuju hadzinu, u zaležnaści ad popytu i prapanovy.
Čym bolš adnaŭlalnaj enierhii vyrablaje rehijon u hety momant, tym nižejšy tam košt elektraenierhii.
Pradaŭcy elektraenierhii kožny dzień raźmiaščajuć na biržy zakaz, kolki elektraenierhii spatrebicca ich klijentam na nastupny dzień.
Pieršymi dla zadavalnieńnia popytu na rynak dapuskajecca zialonaja i atamnaja enierhietyka, bo ich pradukcyja tańniejšaja. Kali adnaŭlalnaj enierhii dastatkova dla pakryćcia spažyvańnia, to cana na elektraenierhiju na rynku taksama budzie nizkaj.
A voś kali adnaŭlalnyja krynicy enierhii nie zadavalniajuć popyt (jon zanadta vysoki albo kali ŭmovy nadvorja nie spryjajuć vietrakam i soniečnym panelam), to dostup da rynku atrymlivajuć słancavyja, vuhalnyja i hazavyja elektrastancyi. Elektraenierhija, jakaja vyrablajecca na ich, daražejšaja, i ich vykarystańnie ciahnie canu na biržy ŭvierch.
