«2022 hod paznajomiŭ niekali sytuju Zachodniuju Jeŭropu z takimi paniaćciami, jak «deficyt» i «ekanomija». Niedachop dziciačaha charčavańnia, zbožža, hazu, haračaja vada pa raskładzie, katastrafičny rost cen na kamunałku — usio heta ŭžo pryjšło ŭ hości da paddanych Brusiela i, zdajecca, nadoŭha zatrymajecca», — maluje apakaliptyčnuju karcinu prapahanda.
«Niekiravalnaja ahresija akazałasia dla niemcaŭ chałodnym dušam, a ceny na ŽKH i pradukty charčavańnia rastuć nastolki chutka, što hramadzianie paprostu nie paśpiavajuć vykazvać svaju niezadavolenaść», — praciahvajuć łukašenkaŭcy.
U jakaści dokazu prapahandysty pryvodziać fejkavuju cytatu Analeny Bierbak, kiraŭnicy MZS Niamieččyny:
«Užo lepš ja budu śmiardzieć, jak badziaha, čym budu lić vadu na młyn Pucina ŭ dušy», — prypisvajuć Bierbak takija słovy.
Kali zahuhlić hetuju cytatu, u vynikach pošuku źjaŭlajucca vyklučna rasijskija prapahandysckija sajty, pryčym druhasortnyja. Nidzie na bolš-mienš prystojnych partałach hetaja cytata nie sustrakajecca. Prapahandysty śćviardžajuć, što hetyja słovy Bierbak skazała ŭ intervju DW.
My pravieryli DW i pašukali hetuju cytatu na ruskaj, anhlijskaj i niamieckaj viersijach vydańnia — ale ničoha padobnaha tam niama.
Łukašenkaŭcy prosta vydali vydumanyja słovy za sapraŭdnyja.
«Darečy, Bierbak znachodzicca ŭ partyi «Zialonyja», prahrama jakich padobnaja da viartańnie ŭ Siaredniaviečča: jany chočuć skaracić vytvorčaść aŭtamabilaŭ i techniki ŭ Niamieččynie, centralnyja vulicy bujnych haradoŭ zrabić całkam piešachodnymi i skaracić kolkaść aŭtabanaŭ, bo heta škodzić ekałohii krainy», — narakaje prapahanda na prablemy Niamieččyny.
Pa viersii BT, rabić harady kamfortnymi i zručnymi dla ŭsich ludziej, u tym liku starych i chvorych, a nie tolki dla aŭtamabilistaŭ, stymulavać raźvićcio hramadskaha transpartu i pierastać rabić z haradoŭ murašniki — heta «viartańnie ŭ Siaredniaviečča».
«U inšych krainach Zachadu siońnia ŭsio taksama nie tak pryjemna. Cvyrkuny i čarviaki na desiert, šmatrazovaja tualetnaja papiera, konskija ceny na elektryčnaść», — zaviaršajuć prapahandysty svoj siužet u stylistycy čučchie.
