Incydent adbyŭsia poźnim viečaram 25 žniŭnia. Samalot kampanii Ryanair, krychu nie daciahnuŭšy da Vilni, rezka paviarnuŭ na poŭdzień, u bok Minska, i amal dalacieŭ da Lidy.
Pavodle infarmacyi sajta Flightradar, heta adbyłosia ŭ 23.14 i praciahvałasia niekalki chvilin. Piłot byŭ vymušany ździejśnić taki manieŭr z-za ŭmoŭ nadvorja, kab paźbiehnuć navalnicy.
Abminuŭšy niebiaśpieku, samalot viarnuŭsia na raniejšy kurs i nieŭzabavie bieśpieraškodna pryziamliŭsia ŭ aeraporcie Vilni.
Padobnyja vypadki, uvohule ŭ avijacyi dastatkova zvyčajnyja, vyklikajuć vialikuju zaniepakojenaść paśla taho, jak pradstaŭniki biełaruskaha režymu 23 maja 2021 hoda vymusili łajnier avijakampanii Ryanair, jaki lacieŭ z Afin u Vilniu, ździejśnić ekstrannuju pasadku ŭ Miensku, zajaviŭšy, što atrymali paviedamleńnie pra bombu, jakaja nibyta znachodzicca na borcie.
Uvieś śpiektakl byŭ zładžany dziela zatrymańnia viadomaha apanienta ŭłady Ramana Pratasieviča, jaki lacieŭ hetym samalotam razam sa svajoj dziaŭčynaj Sofjaj Sapiehaj. Paśla hetaha ŭsie susiedzi Biełarusi, aprača Rasii, zabaranili biełaruskim samalotam vykarystoŭvać jeŭrapiejskuju pavietranuju prastoru i aeradromy, a amal usie krainy zachodniaha śvietu pierastali lotać nad Biełaruśsiu.
