Rasiejcam cikavaja adzieńnie tych brendaŭ, jakija pierastali pracavać u ich u krainie. Turapieratar FUN & SUN navat zapuściŭ pieršy arhanizavany šop-tur u Biełaruś. U brendach, jakija pieraličvajuć u anonsie, — Nike, Zara, Massimo Dutti, Calvin Klein, Leviʼs, Puma, Adidas i inšyja.
Za 4 dni/3 nočy z raźmiaščeńniem u 4-zorkavym hateli pryjdziecca zapłacić kala 1500 biełaruskich rubloŭ na dvaich. A «pakietny šop-tur z uklučanym pieralotam» abyjdziecca ŭ 2 500 rubloŭ za dvaich pa nižniaj płancy.
Arhanizavanyja šop-tury pakul jašče tolki startujuć, na 25 žniŭnia byŭ zapłanavany pieršy, ale samastojna rasiejcy ŭžo jeździać u Biełaruś u tym liku pa pakupki. Realt pahutaryŭ z Arturam (imia źmienienaje) — biełarusam, jaki zdaje apartamienty ŭ centry Minska.
— U apošnija dva hady z-za kavidnych abmiežavańniaŭ hości braniravali apartamienty litaralna na tydzień napierad, tamu što ŭvieś čas mianialisia ŭmovy pierasiačeńnia miažy. Ciapier situacyja źmianiłasia ŭ razy i ŭžo nabližajecca da dapandemijnaha pieryjadu, — kaža Artur. — U mianie ŭžo praktyčna ŭsio zabraniravana da siaredziny kastryčnika, zastałosia litaralna pa paru svabodnych dat u miesiac.
Bolš za toje, užo byli žadajučyja zabraniravać apartamienty na Novy hod, ale ja pakul na taki doŭhi termin nie zaziraju. Haściej z Rasii sapraŭdy šmat. Jany sami śmiajucca, što varyjantaŭ, kudy b jany mahli pryjechać na ciahniku ci mašynie, praktyčna nie zastałosia — Kazachstan, Armienija i Biełaruś. Viadoma, na samalocie jany mohuć palacieć i ŭ Turcyju, ale heta krychu inšyja finansavyja mahčymaści.
Artur kaža, što ŭ rasiejcaŭ papularnaściu karystajecca mienavita Minsk. A voś, naprykład, u Hrodna pryjazdžaje šmat litoŭcaŭ i łatyšoŭ.
— Ale litoŭcy i łatyšy jak praviła pryjazdžajuć na dzień i navat nie načujuć. Žartujuć, što, kali zastanucca, to zaŭtra mohuć užo i nie viarnucca. U Minsku turysty ź Litvy i Łatvii taksama jość, ale ich značna mienš, čym turystaŭ z Rasiei. Da kavidu rasiejcy zvyčajna braniravali žyllo na 1-2 dnia, tamu što jechali tranzitam u Jeŭropu. Ciapier jany branirujuć žyllo ad troch dzion da tydnia. Jany zastajucca ŭ Biełarusi i ź Minska jeździać u inšyja biełaruskija harady. Pryjazdžajuć u asnoŭnym na rańnich ciahnikach i čakajuć zasialeńnia.
Zvyčajna, pa nazirańniach Artura, turysty z Rasii pryjazdžajuć užo sa svajoj prahramaj.
— Čaściej za ŭsio jany padrychtavanyja i ŭžo viedajuć, kudy jechać. Časam, pakul jany čakajuć zasialeńnia paśla ciahnika, užo paśpiavajuć na ekskursiju pa Minsku schadzić i majuć niejkaje ŭjaŭleńnie pra horad. Časta biaruć mašyny ŭ arendu i padarožničajuć pa Biełarusi — jeździać u zamki, jašče adzin dosyć raskručany kirunak — Brest. U Minsku ja raju schadzić u «Piasočnicu», na vulicu Kastryčnickuju. U daviednikach hetaha miesca zvyčajna niama i turystam nie chapaje takoha sučasnaha Minska. Darečy, niadaŭna byli turysty, jakim spadabałasia na Plažy № 5 na Minskim mory. Maładym chłopcam taki adpačynak «zachodzić». Darečy, kali raniej čaściej pryjazdžali siemjami, to ciapier pryblizna 50 na 50 — siamiejnyja i tyja, chto pryjazdžajuć kampanijami.
Artur kaža, što adzin z asnoŭnych pytańniaŭ ad turystaŭ z Rasiei — u jakich HC u Minsku dobry vybar adzieńnia?
— Pastajanna pytajucca, dzie tut u nas HC. Im cikavaja, naprykład, Zara. Pra «MakDonalds» taksama cikaviacca. Ja zvyčajna raju Dana Mall, Green City i Galleria Minsk. Apošni, tamu što ŭ centry i niedaloka ad apartamientaŭ.
čto był kohda-to bližie k vokzału vsieho